Qyzylorda oblysynyń ákimi Nurlybek Nálibaev memleket jáne qoǵam qairatkeri Muhtar Abraruly Qul-Muhammedpen kezdesti. Qairatkerdiń Syr eliniń damýyna qosqan úlesin atap ótip, izgi tilegin bildirdi, dep habarlaidy Dalanews.kz.
«Batyr atamyz Baýyrjan Momyshulynyń «Ár adamǵa baqyt pen bedel aqylmen, kóp izdenispen, adal eńbekpen keledi» degen ulaǵatty sózi bar. Mándi de maǵynaly ǵumyr keship, abyroiǵa, syi-qurmetke bólengen aǵa býyn arasynda Muhtar Abrarulynyń tulǵalyq kelbeti, adami bolmysy óz aldyna bólek.
Siz Qyzylorda oblysynyń ákimi retinde Syr óńiriniń áleýmettik-ekonomikalyq damýyna tyń serpin berdińiz. Bir ǵana mysal, 2007 jyly oblys biýdjeti 36 mlrd. teńge bolsa, bir jarym jylda 90 mlrd. teńgege jetti.
Az ýaqyttyń ishinde aimaq ekonomikasynyń san salasyndaǵy ózekti máselelerdi respýblikalyq deńgeide batyl kóterip, Qyzylorda qalasyndaǵy kópqabatty turǵyn úilerdiń problemalaryn sheshýge, injenerlik infraqurylym júielerin jańǵyrtýǵa yqpal ettińiz. Oblys aýmaǵynda 21 mekteptiń, Jańaqorǵan aýdanynda jyl boiy jumys jasaityn balalar tynyǵý lageriniń qurylysy bastaldy, 1 200 oryndyq 11 irgeli mektep salyndy. Densaýlyq saqtaý salasynda 11 nysannyń qurylysy bastalyp, Aral, Qazaly aýdandarynda 100 oryndyq aýrýhana, Jańaqorǵan aýdandyq ortalyq aýrýhanasy ǵimarattary boi kóterdi.
Sizdi halqymyz memleket jáne qoǵam qairatkeri ǵana emes, Táýelsiz Qazaqstannyń qurylýy men qalyptasý kezeńinen búginge deiingi damýyna súbeli úles qosqan kóshbasshy azamat, Alash arystarynyń ozyq ideialaryn jalǵastyrýshy tulǵa retinde airyqsha qurmetteidi, – dedi Nurlybek Mashbekuly.
Muhtar Qul-Muhammedke aimaqtyń áleýmettik-ekonomikalyq damýyna sińirgen eńbegi úshin «Qyzylorda oblysynyń qurmetti azamaty» ataǵyn berý týraly sheshim 2022 jyly qabyldanǵan bolatyn. Sol sheshimniń negizinde berilgen ataq jáne Qyzylorda oblysynyń Qurmet gramotasy búgingi kezdesýde tabystalyp, Syr jurtshylyǵynyń atynan syi-siiapat kórsetildi.
M.Qul-Muhammed ár jyldary Parlament Senatynyń depýtaty, Prezidenttiń Baspasóz hatshysy, keńesshisi, Prezident Ákimshiligi Basshysynyń orynbasary, Memlekettik hatshy qyzmetterin atqarǵan. Eki márte Senat depýtaty retinde Parlamentte turǵyndardyń ómir súrý sapasynyń jaqsarýyna baǵyttalǵan zańdardyń qabyldanýyna yqpal etti. Tórt márte Mádeniet jáne aqparat ministri qyzmetin atqarǵan ýaqytta elimizdiń mádeni-rýhani damýyna, ulttyq qundylyqtardyń jańǵyrýyna jol ashty. 2007-2008 jyldary Qyzylorda oblysynyń ákimi retinde ilkimdi isterdiń bastamashysy bolyp, óńirdiń ósip-órkendeýine serpin bergen jobalardy júzege asyrdy.
Kezdesýde qoǵam qairatkerleri Jarylqasyn Sháripov, Ibragim Ábibýllaev, Bekmyrza Elamanov, Májilis depýtaty Marhabat Jaiymbetov quttyqtaýlaryn jetkizdi.
Muhtar Abraruly kórsetilgen qurmetke alǵysyn bildirip, izgi tilegin aitty.
