Búgin oblys ákimi Nurlybek Nálibaevtyń tóraǵalyǵymen Konstitýtsiialyq reformalar jónindegi óńirlik aktiv otyrysy ótti. Oǵan máslihat depýtattary, quqyq qorǵaý organdarynyń, basqarmalar men aýmaqtyq departamentterdiń basshylary, qoǵamdyq keńestiń músheleri, ziialy qaýym, buqaralyq aqparat quraldarynyń ókilderi qatysty.
Memleket basshysynyń bastamasymen elimizde jańa Ata Zańnyń jobasy ázirlendi. Osy maqsatta 130 adamnan turatyn Konstitýtsiialyq komissiia quryldy. Bir aptaǵa jýyq jumys jasaǵan komissiia jeke azamattardan, saiasi partiialardan, qoǵamdyq uiymdar men sarapshylardan túsken usynystardy egjei-tegjeili taldady.
Ashyq qoǵamdyq talqylaýlardyń, jańa normalar men erejelerdi jan-jaqty ári tiianaqty pysyqtaýdyń nátijesinde Ata zańnyń jańa jobasy ázirlenip, buqaralyq aqparat quraldarynda jariialandy.Aimaq basshysy jańa Konstitýtsiia jobasynyń mańyzdylyǵyna toqtalyp, Syr óńiri jurtshylyǵyn bul bastamaǵa joǵary jaýapkershilikpen, belsendi atsalysýǵa shaqyrdy.
«Memleket basshymyz Qasym-Jomart Kemeluly 2025 jylǵy 8 qyrkúiekte halyqqa arnaǵan Joldaýynda Qazaqstanda bir palataly Parlament qurý jóninde bastama kóterdi. Bul usynys Konstitýtsiialyq reformany júzege asyrýǵa negiz bolyp, Parlamenttik reforma jónindegi arnaiy Jumys toby quryldy.
Qazan aiynan beri elimizdegi saiasi partiialardan, sarapshylardan, saiasi-qoǵamdyq institýttardan, úkimettik emes uiymdardan, azamattarymyzdan Parlamenttik reformaǵa qatysty usynystar jinaqtaldy.
Memleket basshymyz Syr óńirinde ótken Ulttyq quryltaidyń qorytyndy besinshi otyrysynda Jumys tobynyń usynystaryn negizge ala otyryp, Qazaqstannyń aldaǵy saiasi baǵyt-baǵdaryn aiqyndap berdi. Prezidentimiz Quryltaida elimizdegi buǵan deiingi aýqymdy saiasi reformalarynyń jalǵasy retinde Konstitýtsiialyq reformaǵa qatysty óz ustanymdaryn jetkizdi. El tarihyndaǵy mańyzdy sheshimderdi usyndy.
Jańa Ata Zańnyń jobasyndaǵy birqatar baptar men bólimderdiń mazmuny tutas konstitýtsiialyq modeldi aitarlyqtai jańǵyrtýǵa, saiasi-qoǵamdyq institýttardy jetildirýge, azamattardyń quqyqtary men bostandyqtaryn qorǵaý tetikterin kúsheitýge negiz bolady. Bul – el tarihyndaǵy mańyzdy ári taǵdyrly qadam bolmaq», – dedi N.Nálibaev.
Jiynda QR Parlamenti Senatynyń janyndaǵy Senatorlar keńesiniń múshesi, Qyzylorda oblysynyń qurmetti azamattary Bekmyrza Qaiypuly men Murat Baqtiiaruly, oblys prokýrory Rizabek Kárimuly, oblystyq máslihattyń tóraǵasy, Konstitýtsiialyq komissiianyń múshesi Murat Jolkeldiuly, Qazaqstannyń Eńbek Eri, Konstitýtsiialyq komissiianyń múshesi Imamzada Qýanyshbaiuly óz usynys-pikirlerin bildirdi.
