Búgin oblys ákimi Nurlybek Nálibaevtyń qatysýymen Qyzylordadaǵy qaita salynǵan Prezident parkiniń saltanatty ashylý rásimi ótti. Rásimge quqyq qorǵaý organdarynyń birinshi basshylary, máslihat depýtattary, ziialy qaýym ókilderi, barlyq aýdannan kelgen delegattar arnaiy qatysty, dep habarlaidy Dalanews.kz
Aimaq basshysy qala turǵyndaryn saiabaqtyń ashylýymen quttyqtap, óńirde «Taza Qazaqstan» jalpyulttyq jobasy aiasynda atqarylǵan jumystardy atap ótti.
«Prezidentimiz Qasym-Jomart Kemeluly: «Týǵan jerimizdi eshkim syrttan kelip tazalap, kórkeitip bermeidi. Otanymyzdy taza ustaý – ár azamattyń qasterli paryzy», – degen bolatyn.
«Taza Qazaqstan» jalpyulttyq jobasy turǵyndar arasynda tazalyq mádenietin keńinen nasihattaýǵa, týǵan jerimizdi kórkeitýge tyń serpin berdi. Joba aiasynda sanitarlyq tazalyq, abattandyrý, turǵyndardyń ómir súrýine qolaily jaǵdai jasaýda keshendi jumystar atqarylýda. Biýdjet qarajatynan bólek, kásipkerlerdiń demeýshiligimen ortalyq alańdar, demalys oryndary, oiyn, sport alańdary qaita jańǵyrtylyp, turǵyn úiler men áleýmettik nysandar zamanaýi úlgide jóndeýden ótkizilip keledi.
Óńirimizde birkelki dizain kod bekitilip, oblys ortalyǵynan bastap barlyq eldi mekender biregei arhitektýralyq talaptarǵa sáikestendirildi. Qyzylorda qalasynda 2 mlrd. 905 mln.teńgege 83 eski kópqabatty turǵyn úidiń qasbetteri zamanaýi paneldermen qaptaldy. Biyl da bul jumys jalǵasyn taýyp, 900 mln. teńgege qosymsha 21 turǵyn úi jańǵyrtylýda. Ótken jyly 1 mlrd. 300 mln. teńgege 20 kópqabatty turǵyn úidiń aýlalaryna balalar oiyn, sport alańdary salynyp abattandyryldy.
Oblys ortalyǵynda jańa nysandar boi kóterip, jasyl jelek pen saiabaqtar sany kóbeiip, ozyq sáýlet úlgisi qalyptasýda. Óskeleń urpaq úshin taza, jaily ári qaýipsiz orta qurý aldaǵy ýaqytta da jalǵasady. «Taza Qazaqstan» jalpyulttyq jobasy aiasyndaǵy aktsiialarǵa, tabiǵat qorǵaý sharalaryna jastar men qoǵam belsendileri qatysyp, úles qosýda.
Saiabaqty sapaly etip qaita salǵan «Alem Qurylys» kompaniiasynyń ujymyna Syr jurtshylyǵynyń, Ózimniń atymnan shynaiy alǵysymdy bildiremin! Egemen elimizdi kórkeitý jolyndaǵy isterimiz tabysty bolsyn!» – dedi aimaq basshysy.
Aita ketý kerek, jańa saiabaq aýmaǵyna zamanaýi sýburqaqtar, amfiteatr, sport, oiyn, bi, shahmat, basketbol, fýtbol alańdary, biiktigi 50 metrlik ainalmaly sholý dóńgelegi, velosiped jáne júgirý jolaqtary, sanitarlyq pýnktter ornatylǵan. Jalpy 31 gektarǵa 2 myńnan astam aǵash, 50 myńnan astam sándik buta jáne 17 túrli kópjyldyq gúl egildi.
Saiabaq aýmaǵyn tiimdi paidalaný maqsatynda birqatar iri joba qolǵa alynǵan. Atap aitqanda, 6 gektar jerge 300 oryndyq zamanaýi balalar lageri, 2,4 gektarǵa Botanikalyq bilim berý ortalyǵy, 8,2 gektarǵa toǵyz qabatty 15 turǵyn úi salynýda. Budan bólek, 200 tósektik jańa perinataldyq ortalyq qurylysy qarqyn aldy. Jaqyn kúnderi 5,5 gektar aýmaqta jańa drama teatr men zamanaýi Prezidenttik kitaphana qurylysy bastalady.
Rásimde Prezident parkindegi jumystardy sapaly atqarǵan merdiger mekeme ókilderi men ekologiialyq aktsiialarǵa belsendi atsalysqan eriktiler oblys ákiminiń Alǵys hatymen marapattaldy. Qoǵam qairatkeri Jarylqasyn Sháripov izgi lebizin bildirdi.
