Búgin oblys ákimi Nurlybek Nálibaev Qyzylordada jańadan salynatyn nysandardyń qurylys alańyna bardy.
Aimaqta Memleket basshysy Qasym-Jomart Kemelulynyń tapsyrmasymen densaýlyq saqtaý salasyn damytýǵa baǵyttalǵan keshendi sharalar nátijeli júzege asýda. Bul sharalardyń basty maqsaty – halyqtyń meditsinalyq qyzmetterge qoljetimdiligin arttyrý.
Oblys ortalyǵynda, naqtyraq aitqanda Prezident parki aýmaǵynda 48,5 mlrd teńgege 200 oryndyq perinataldyq ortalyq pen sol jaǵalaýda 14,78 mlrd teńgege 500 oryndyq emhananyń qurylysy bastalady. Bolashaq perinataldyq ortalyq ana men balaǵa mamandandyrylǵan zamanaýi meditsinalyq kómek kórsetedi. Ortalyqta qabyldaý-qaraý, statsionarlyq, diagnostikalyq, operatsiialyq, reanimatsiialyq jáne ákimshilik bólimder bolady. Sondai-aq, jerasty ótkeli arqyly bailanysqan jeke zerthana ǵimaraty men as blogy qarastyrylǵan.
Meditsinalyq mekeme júkti áielderge, bosanýshylarǵa jáne jańa týǵan nárestelerge arnalǵan statsionarlyq bólimder, operatsiialyq blok, reanimatsiia, zerthanalar jáne injenerlik-qyzmettik infraqurylymmen tolyq qamtamasyz etiledi. Jobalyq sheshimder sanitarlyq-epidemiologiialyq talaptar men zamanaýi meditsinalyq standarttarǵa sáikes júzege asyrylady.
Al 500 oryndyq emhana – turǵyndarǵa ambýlatoriialyq-emhanalyq, diagnostikalyq jáne kúndizgi statsionarlyq meditsinalyq kómek kórsetetin kópsalaly mekeme. Nysan sol jaǵalaý aýmaǵynda boi kóteredi. Munda jalpy jáne akýsherlik-ginekologiialyq tirkeý, pediatriia, mamandandyrylǵan jáne shuǵyl meditsinalyq kómek, profilaktika jáne mektep meditsinasy bólimderi qarastyrylǵan. Sondai-aq 50 tósektik kúndizgi statsionar, dárilik qamtamasyz etý, ortalyq sterilizatsiia, kir jýý orny, meditsinalyq qaldyqtardy saqtaý, oqý kabinetteri, 50 oryndyq aýditoriia, 200 oryndyq konferents-zal jáne injenerlik-tehnikalyq infraqurylym bar.
Budan bólek, Qyzylorda qalasyndaǵy Titov móltek aýdanynda 10 mlrd teńgege 400 oryndyq emhananyń qurylysy bastalady. Jańa ǵimaratta balalar men eresekterge arnalǵan emdeý-profilaktikalyq bólimsheler, kúndizgi statsionar, fýnktsionaldyq diagnostika, stomatologiia, áielder konsýltatsiiasy, beiindi mamandar kabinetteri, ákimshilik jáne klinikalyq-diagnostikalyq zerthana ornalasady.
