Búgin oblys ákimi Nurlybek Nálibaevtyń qatysýymen Qyzylordadaǵy Óner ortalyǵynda «Júieli qaiyrymdylyq: Turaqtylyq, seriktestik, mura» taqyrybynda IV Ulttyq qaiyrymdylyq konferentsiiasy ótti, dep habarlaidy Dalanews.kz
Memleket basshysynyń arnaiy tapsyrmasymen 2022 jyly qurylǵan «Qazaqstan halqyna» qoǵamdyq qory jyl saiyn óńirlermen, iri biznes sýbektilerimen jáne kommertsiialyq emes uiymdarmen ózara is-qimyl sheńberinde ulttyq qaiyrymdylyq konferentsiiasyn ótkizip keledi. Basqosýǵa «Qazaqstannyń Azamattyq aliansy» ZTB prezidenti Baný Nurǵazieva, «Qazaqstan halqyna» qorynyń basqarma tóraǵasy Lázzat Shyńǵysbaeva, oblystyq máslihat tóraǵasy, jaýapty sala basshylary, qor qyzmetkerleri men ziialy qaýym ókilderi qatysty.
Aimaq basshysy «Qazaqstan halqyna» qoǵamdyq qorynyń óńir turǵyndaryna kórsetken qoldaýy jaily aitty.
«Prezidentimiz Qasym-Jomart Kemelulynyń tikelei bastamasymen densaýlyq saqtaý, bilim berý, áleýmettik qoldaý salalaryndaǵy máselelerdi sheshý maqsatynda qurylǵan «Qazaqstan halqyna» qoǵamdyq qorymen tyǵyz áriptestik bailanys ornatylyp, birlesken jobalar iske asyp keledi. Qor qurylǵaly beri 10 mlrd. teńgeden astam qarjy aimaǵymyzdaǵy mańyzdy áleýmettik jobalarǵa baǵyttaldy.
Atap aitsaq, densaýlyq saqtaý salasyna qaralǵan 4 mlrd. 800 mln. teńgege oblystyq balalar aýrýhanasynda, Jańaqorǵan, Aral aýdandarynda «Qamqorlyq» ortalyqtary ashyldy. Aral aýdanyndaǵy ortalyq qyzmetin kórshi Aqtóbe oblysynyń, Jańaqorǵan aýdanyndaǵy ortalyq qyzmetin Túrkistan oblysynyń turǵyndary da paidalanyp, ońaltý sharalarymen qamtyldy.
Qor qajetti dári-dármek alý, ortalyqtardy jabdyqtaý, meditsina mamandaryn shetelde oqytýǵa da qoldaý kórsetti. Oblystyq onkologiia ortalyǵyna quny 1 mlrd. 100 mln. teńge turatyn, respýblika boiynsha 3 oblysta ǵana bar skrining júrgizýge arnalǵan jyljymaly meditsinalyq keshen tabystady. Keshen qazirgi tańda óńirimizdiń shalǵai eldi mekenderindegi turǵyndarǵa úzdiksiz qyzmet etýde.
«Qazaqstan halqyna» qory kelesi jyly meditsina salasyndaǵy jobalarǵa 2 mlrd. 600 mln. teńge bólýdi josparlaǵan. Oǵan onkologiialyq aýrýlardy tiimdi emdeýge arnalǵan joǵary tehnologiialyq jabdyqtar (lineinyi ýskoritel) satyp alynady.
Sondai-aq, aýtizmge shaldyqqan jáne basqa da psihikalyq buzylystary bar balalardy áleýmettendirýge arnalǵan ortalyq ashylady. Ortalyq jyl saiyn 600 balaǵa qyzmet kórsetpek.
Bilim berý salasyna 2 mlrd. 600 mln. teńge bólindi. «Aýyldyq aimaqtardaǵy tirek mektepterdiń áleýetin damytý» jobasy aiasynda 2023-2025 jyldary 2 mlrd. teńge bólinip, 8 mekteptiń fizika, himiia, biologiia, robototehnika, kompiýterlik kabinetteri qaita jabdyqtaldy, aýyl balalary jazǵy lagerlerde demaldy.
Erekshe bilim berýdi qajet etetin balalarǵa arnalǵan arnaiy internattardyń materialdyq-tehnikalyq bazasy jańǵyrtyldy. «Bolashaq injenerler» jobasy aiasynda 9 mektepke robototehnika qurylǵylary alynyp, tiisti mamandar arnaiy oqýdan ótti. Qorqyt Ata atyndaǵy Qyzylorda ýniversitetiniń 500-den astam stýdentiniń «Kýrsera» álemdik platformasynda bilim alýyna múmkindik jasaldy.
Aldaǵy jyly bilim berý salasynda taǵy 2 mlrd. teńgeniń jobalary júzege asady. Atap aitqanda, oblystyń 50 mektebine «Bilim-Innovatsiia» litseileriniń tájiribesi engiziledi, fizika, himiia, biologiia kabinetteri jabdyqtalady, 8 shaǵyn jinaqty mekteptiń materialdyq bazasy nyǵaitylady.
Qor aimaǵymyzdaǵy sport infraqurylymyn damytýǵa 2 mlrd. 700 mln. teńge bólip, nátijeli jumystar atqaryldy. Biyl 348 mln. teńgege Shieli aýdanynyń Dosbol datqa aýylynda, Jalaǵash aýdanynyń Aqqyr aýylynda zamanaýi sport keshenderi salynyp, el igiligine tabystaldy. Syrdariia, Qarmaqshy aýdandaryndaǵy sport keshenderi jańa qural-jabdyqtarmen qamtamasyz etildi.
Aimaǵymyzdyń áleýmettik-ekonomikalyq damýyna, turǵyndarymyzdyń ál-aýqatyn arttyrýǵa eleýli úles qosqany úshin «Qazaqstan halqyna» qorynyń ujymyna Syr jurtshylyǵynyń atynan taǵy da zor alǵysymyzdy bildiremiz», – dedi N.Nálibaev.
Jiynda Lázzat Shyńǵysbaeva sóz sóilep, qor qyzmetiniń mańyzdylyǵyna toqtaldy.
«Júieli qaiyrymdylyq – bul ýaqytsha shara emes, uzaq merzimdi ózgeristerge jol ashatyn naqty is. «Qazaqstan halqyna» qory úshin bul – adamdardyń ómirin ózgertetin, bolashaqqa úmit syilaityn turaqty jobalar. Biz memleket, qoǵam jáne biznes áriptestigi arqyly ǵana shyn máninde eleýli nátijelerge qol jetkize alamyz. IV konferentsiia – bul úsh jyldyq eńbektiń qorytyndysy ǵana emes, jańa kezeńniń bastaýy. Bul – tájiribe almasý, birlesken sheshimder izdeý jáne qordyń óńirlerge kórsetken naqty kómegin tanystyrý alańy. Munyń barlyǵy keler urpaqtyń murasyna ainalady», – dep atap ótti.
Aitýly sharaǵa elimizdiń barlyq óńirinen kelgen 500-ge jýyq delegat qatysty.
Konferentsiia mazmuny «Turaqtylyq», «Seriktestik» jáne «Mura» atty úsh negizgi bólimnen turady, árbir bólim júieli qaiyrymdylyqtyń mańyzdy bir qyryn ashyp kórsetýdi maqsat etken. Qordyń qoldaýyna ie bolǵan 12 azamat óz oqiǵalary týraly, igi istiń ómirinde, ujymynda qandai oń ózgeristerge jol ashqanyn aityp berdi.
Óner ortalyǵynyń foiesinde ótken «Qazaqstan halqyna» qorynyń jobalar kórme-jármeńkesi bilim berý, densaýlyq saqtaý jáne áleýmettik qoldaý salasyndaǵy bastamalardy biriktirdi. Qonaqtarǵa jańa jabdyq qana emes, ózgeristerdiń naqty nátijeleri kórsetildi.
Aita keteiik, búginde qordyń jáne oblystyq biýdjettiń qarjysyna qalamyzdyń sol jaǵalaýynda quny 2 mlrd. 900 mln. teńge bolatyn múmkindigi shekteýli jandarǵa arnalǵan dene shynyqtyrý-saýyqtyrý kesheniniń qurylysy qarqyndy júrýde. Nysan aldaǵy qazan aiynda paidalanýǵa beriledi.
Kelesi jyly 6 sport mektebi jabdyqtalady. Múgedektigi bar balalar men jastar innovatsiialyq protezdik-ortopediialyq quraldarmen qamtamasyz etildi. «Úi jaǵdaiynda múgedektigi bar balalardy ońaltý» jobasy aiasynda 283 mln. teńgege 95 qural-jabdyq satyp alyndy. Qarmaqshy aýdanyndaǵy múmkindigi shekteýli balalarǵa áleýmettik qyzmet kórsetetin «Dámetken Ana» ortalyǵynyń materialdyq bazasy nyǵaityldy. Búginde ortalyqta ońaltý qyzmetin alatyn 30 bala bar.
