Resei Qaýipsizdik keńesi tóraǵasynyń orynbasary Dmitrii Medvedev Iran iadrolyq qarýdyń ornyna "iadrolyq qarýdan kem túspeitin basqa qarýǵa" ie ekenin aitty. Onyń sózinshe, bul – Ormýz buǵazy. Al odan da qýatty qural Bab-el-Mandeb buǵazyn jabý bolýy múmkin. Bul týraly ol Tegeranda Irannyń qaza tapqan Joǵarǵy kósemi Áli Hameneimen qoshtasý rásimine barǵan saparynyń qorytyndysy boiynsha jýrnalisterge málimdedi, dep habarlaidy dalanews.kz.
"Iran shynaiy iadrolyq qarýdyń ornyna ózinen iadrolyq qarýdan kem túspeitin basqa qarýdy tapty. Ol – Ormýz buǵazy. Qazir áńgime de osynyń tóńireginde júrip jatyr, bul buǵazdyń aldaǵy ýaqytta qalai jumys isteitini jóninde kelisimder jasalýda", – dedi Medvedev.
Resei Qaýipsizdik keńesi tóraǵasynyń orynbasary Iran biliginde taǵy bir "termoiadrolyq qarý" bar ekenin eskertti. Ol – Bab-el-Mandeb buǵazy. Medvedevtiń aitýynsha, eger bul buǵaz jabylsa, munai tasymaly men ózge de júk tasymaldary toqtap qalýy múmkin.
Bab-el-Mandeb buǵazy Qyzyl teńizben jalǵasady. Ol bir jaǵynan Djibýti men Eritreianyń, ekinshi jaǵynan Iemenniń arasynda ornalasqan. Iemen jaǵalaýyndaǵy aýmaqty Irannyń odaqtasy sanalatyn shiit-hýsitter baqylap otyr.
"Mundai jaǵdai jasalsa, munai jáne basqa da barlyq tasymaldar tolyqtai buǵattalýy múmkin. Mundaiǵa jetpeidi dep úmittenemin. Biraq bul óńirde qaqtyǵysqa umtylyp otyrǵan barlyq elder muny este ustaýy kerek", – dedi ol.
