Qazaqstannan 16 myń litrden astam janar-jaǵarmai materialdaryn zańsyz áketýdiń 392 áreketi anyqtaldy, dep habarlaidy dalanews.kz.
«Kúsheitilgen baqylaý nátijesinde jalpy kólemi 16 myń litrden asatyn janar-jaǵarmai materialdaryn zańsyz áketýdiń 392 deregi anyqtaldy. Kóp jaǵdaida janarmai arnaiy jasalǵan qosymsha baktar men kanistrlerge quiylyp shyǵarylmaq bolǵan», – dep málimdedi Memlekettik kirister komiteti.
Vedomstvonyń málimetinshe, baqylaý Premer-ministrdiń tapsyrmasy boiynsha kúsheitilip, ishki naryqty qorǵaýǵa jáne munai ónimderiniń zańsyz áketilýine jol bermeýge baǵyttalǵan.
Tekserý avtomobil ótkizý beketterinde de, shekara mańyndaǵy mobildi toptar arqyly da júrgizilýde. Sonymen qatar janarmai quiý beketterindegi otyn satý kólemi men shaǵyn munai óńdeý zaýyttarynyń qyzmetine kúndelikti monitoring jasalyp jatyr.
Memlekettik kirister komitetiniń málimetinshe, kúsheitilgen baqylaý bastalǵaly mobildi toptar 122 avtotsisternany tekserip, birqatar jaǵdaida saraptama júrgizý úshin janarmai synamalaryn alǵan.
Máselen, 6 shildede Batys Qazaqstan oblysyndaǵy «Syrym» ótkizý beketinde júk kóliginiń qosymsha bagyna jasyrylǵan 1,2 myń litr dizel otynyn zańsyz áketý áreketi toqtatyldy. Al 8 shildede Pavlodar oblysynda mobildi top 4 myń litrden astam benzindi ilespe qujattarsyz tasymaldaǵan avtokólikti ustady.
Sonymen qatar Jol kartasy aiasynda shekara mańyndaǵy janarmai quiý stansalary men shaǵyn munai óńdeý zaýyttaryna qatysty 103 hronometrajdyq tekserý taǵaiyndalǵan.
