Búgin Qyzylordadaǵy «Óner ortalyǵynda» kórnekti aqyn, Qazaqstannyń eńbek sińirgen qairatkeri Ulyqbek Esdáýlettiń «Syr men jyr» atty shyǵarmashylyq keshi ótti. Keshti oblys ákimi Nurlybek Nálibaev, memleket jáne qoǵam qairatkerleri, ziialy qaýym ókilderi, ónersúier qaýym tamashalady, - dep habarlaidy Dalanews.kz
Aimaq basshysy qazaq poeziiasynda ózindik qoltańbasy bar aqynnyń shyǵarmashylyǵyna, búgingi keshtiń rýhani mańyzdylyǵyna toqtaldy.
«Biyl naýryz aiynda Býrabaida ótken Ulttyq quryltaida Memleket basshymyz Qasym-Jomart Kemeluly quryltaidyń kelesi 5-shi otyrysyn Syr boiynda, bir ǵasyr buryn Qazaq eliniń astanasy bolǵan Qyzylorda qalasynda ótkizýdi usyndy. Alqaly jiynda qabyldanǵan tarihi sheshim aimaq jurtshylyǵynyń mereiin asqaqtatty. Prezidentimiz halqymyzdyń «qazaq» degen baiyrǵy ataýy qaitarylǵan, tarihi ádildik ornaǵan Qyzylordadaǵy mańyzdy oqiǵalar el jadynda saqtalýǵa tiis ekenin atap ótti.
Bul – biz úshin zor mártebe, Prezidentimizdiń óńirimizde atqarylyp jatqan jumystarǵa bergen oń baǵasy dep bilemiz. Búgingi shyǵarmashylyq kesh – osy ataýly dataǵa arnalǵan sharalardyń biregeii. Oily da syrshyl, qiialy ushqyr, lirik aqyn Ulyqbek Esdáýlet – tarih tereńine boilap, tamyryn qalammen arshyp, ult murasyn biik kótergen erekshe daryn iesi.
Sizdi Syr tórindegi shyǵarmashylyq keshińizben shyn júrekten quttyqtaimyz! Qalamyńyzdan qýat ketpesin! Shabytyńyz sharyqtai bergei! Denińizge saýlyq, otbasyńyzǵa qut-bereke, amandyq tileimin!», – dedi Nurlybek Mashbekuly.
Keshte aqynnyń sózine jazylǵan tanymal ánder oryndaldy. Olardyń arasynda T.Muhamedjanovtyń «Aq jelken», «Beý, balalyq» jáne I.Krýtoidyń «Aq besik» týyndylary ónersúier qaýymnyń kóńilinen shyqty.
Qyzylorda oblysynyń qurmetti azamaty, aqyn Shákizada Ábdikárimov jáne «Daryn» memlekettik jastar syilyǵynyń laýreaty, respýblikalyq «Ana tili» gazetiniń bas redaktory Erlan Júnis aqynǵa jyly lebizderin bildirdi.
