Qyzylordanyń Qazaq eli astanasy bolǵanyna jáne «Qazaq» ataýynyń qaitarylǵanyna 100 jyl tolý mereitoiy aiasynda Syrdariia ózeniniń sol jaǵalaýyndaǵy 320 páterlik 4 kópqabatty turǵyn úi kesheni paidalanýǵa berildi. Keiingi jyldary erekshe qarqynmen damyǵan sol jaǵalaý sáýletti turǵyn úilermen tolyǵa tústi. Saltanatty rásimge ziialy qaýym ókilderi, el aǵalary, qala turǵyndary qatysty, dep habarlaidy Dalanews.kz.
Aimaq basshysy Nurlybek Nálibaev turǵyn úi qurylysy salasynda atqarylǵan jumystarǵa toqtalyp, jańa qonys ielerin quttyqtady.
«Syr óńirinde Prezidentimizdiń, Úkimettiń erekshe qoldaýymen turǵyndardy baspanamen qamtamasyz etýge baǵyttalǵan memlekettik áleýmettik saiasat nátijeli iske asyrylýda. Sońǵy úsh jylda qarjylandyrýdyń barlyq kózinen oblysymyzda 2 mln. 500 myń sharshy metr turǵyn úi paidalanýǵa berildi. Kezekte turǵan azamattarǵa 5 myńnan astam páter satyp alynyp, 25 myńǵa jýyq turǵyn qonys toiyn toilady.
Barlyq aýdan ortalyqtarynda jańadan salynǵan 1500-ǵa jýyq páter tabystaldy. Biyl biýdjetten turǵyn úi qurylysy men jeke salýshylardan daiyn 3 800 páterdi satyp alýǵa 58 mlrd. 785 mln. teńge bólindi. Qarjylandyrýdyń barlyq kózinen 870 myń sharshy metr turǵyn úi beriledi.
Qyzylorda qalasynyń ózinde sońǵy úsh jylda 5 600 páter jerlesterimizdiń igiligine ainaldy. Ótken aida 280 páterlik 7 kópqabatty turǵyn úige kezekte turǵan azamattar qonystandy. Erekshe atap ótý qajet, ótken jyldan bastap qalamyzda zamanaýi jańa dizainmen 7, 9, 12 qabatty turǵyn úiler boi kóterýde.Búgin – memleket qoldaýymen baspanaly bolǵan ár otbasy úshin erekshe qýanyshty kún! Jańa baspanalaryńyzdyń irgetasy berik, qabyrǵasy myǵym, ár otbasynyń shańyraǵy tatýlyq pen berekege toly bolǵai!», – dedi Nurlybek Mashbekuly.
Is-sharada jańa turǵyn úidi salǵan qurylysshylarǵa oblys ákiminiń Alǵys haty tabystalyp, Jalaǵash aýdanynyń qurmetti azamaty, «Qurmet» ordeniniń iegeri Ómirbek Shámenov quttyqtaý sóz sóiledi.
