Qyzylorda oblysynyń ákimi Nurlybek Nálibaev Jalaǵash aýdanynyna jumys sapary barysynda dene shynyqtyrý-saýyqtyrý kesheniniń ashylý rásimine qatysty. Rásimde Parlament Senaty men Májilisiniń depýtattary Rýslan Rústemov, Murat Ábenov, Marhabat Jaiymbetov, Murat Ergeshbaev jáne ziialy qaýym ókilderi men el aǵalary, aýdan turǵyndary boldy, – dep habarlaidy Dalanews.kz
Aimaq basshysy jalaǵashtyqtardy Ulystyń uly kúnimen jáne jańa nysannyń ashylýymen quttyqtady. Óńirdiń áleýmettik-ekonomikalyq damýyndaǵy jetistikterge, qurylys, sport salalaryndaǵy jańalyqtarǵa toqtaldy.
«Prezidentimiz Qasym-Jomart Kemeluly «Buqaralyq sportty damytý arqyly biz kásibi sportqa jol ashamyz jáne eń bastysy, ult saýlyǵyn jaqsartamyz» degen bolatyn.
Turǵyndar sportty ómir saltyna ainaldyrý úshin osyndai keshender qoljetimdi bolýy kerek. Al sport adamnyń densaýlyǵyn, kúsh-jigerin shyńdaidy.
Ótken jyly qazan aiynda Qyzylorda qalasynda «Ústel tennisi» ortalyǵy paidalanýǵa berilgeni belgili. Halyqaralyq standarttarǵa sáikes keletin 11 myń oryndyq Ortalyq stadion aldaǵy mamyr aiynda el igiligine tabystalmaq. Jaqyn kúnderi kópbeiindi «Qyzylorda Arena», dene shynyqtyrý-saýyqtyrý keshenderiniń qurylysy bastalady.
Jyl basynan beri Qarmaqshy aýdanynyń III Internatsional, Dúr Ońǵar, Syrdariia aýdanynyń Besaryq aýyldarynda jańa keshender iske qosylǵan edi. Naýryz merekesi qarsańynda dál osyndai sport kesheni kúni keshe Qarmaqshy aýdanynyń Aqai aýylynda jáne Shieli aýdanynyń Jaqaev aýylynda ashyldy. Búgin Ulystyń uly kúninde Jalaǵash aýdanyndaǵy jańa sport keshenin el igiligine tabystaýdamyz.
Barshańyzdy jańa nysannyń ashylýymen shyn júrekten quttyqtaimyn! Osy jerde shynyqqan jetkinshekter bolashaqta dúbirli dodalarda elimizdiń, aimaǵymyzdyń namysyn qorǵap, kók bairaǵymyzdy biikte jelbiretsin! Ulys oń, aq mol bolsyn!», – Nurlybek Mashbekuly.
Rásimde Jalaǵash aýdanynyń áleýmettik-ekonomikalyq damýyna úles qosqan azamattar men ǵimaratty salǵan merdiger mekeme qyzmetkerleri oblys ákiminiń Alǵys hatymen marapattaldy. Parlament Májilisiniń depýtaty Murat Ábenov jiylǵan halyqty jańa nysannyń ashylýymen quttyqtady.
Eske salaiyq, jýyrda Qarmaqshy aýdany Aqai aýylynda dene shynyqtyrý-saýyqtyrý kesheni ashylǵan bolatyn.
