Búgin N. Bekejanov atyndaǵy oblystyq qazaq akademiialyq mýzykalyq drama teatrynda áleýmettik salaǵa baǵyttalatyn biýdjet qarajatyn tiimdi paidalaný týraly respýblikalyq seminar-keńestiń sektsiialyq otyrysy ótti. Oǵan Parlament Senaty men Májilisiniń depýtattary Naýryzbai Baiqadamov, Rýslan Rústemov, Murat Ábenov, Murat Ergeshbaev, ministrlikter, ortalyq atqarýshy organdar ókilderi, óńirlerden kelgen delegattar, oblystyq basqarma, departament, inspektsiia, mekeme basshylary men qyzmetkerleri qatysty,- dep habarlaidy Dalanews.kz
Úkimet basshysy Oljas Bektenov Qyzylorda oblysynyń qarajatty tiimdi paidalaný tájiribesin respýblikaǵa úlgi retinde qoldanýdy tapsyrǵan bolatyn. Eki kúndik seminar-keńestiń alǵashqy otyrysyn Eńbek jáne halyqty áleýmettik qorǵaý ministri Svetlana Jaqypova ashty.
Jiynda áleýmettik saladaǵy mańyzdy bastamalar talqylandy. Oqý-aǵartý vitse-ministri Edil Ospan, Densaýlyq saqtaý vitse-ministri Ardaq Amangeldiev, Týrizm jáne sport vitse-ministri Baýyrjan Rapikov, Mádeniet jáne aqparat vitse-ministri Aibek Sydyqov, Qurylys jáne TÚKSh isteri komiteti tóraǵasynyń mindetin atqarýshy Qanat Myńbaev, «Otbasy bank» AQ basqarma tóraiymy Lázzat Ibragimova, «NIT AQ ókili Ádilet Aisaýtov kún tártibindegi máselelerge qatysty sóz sóiledi.
Biýdjet qarajatyn tiimdi paidalaný, únemdeý baǵytynda atqarylǵan jumystar men qabyldanǵan sharalar týraly oblys ákiminiń birinshi orynbasary Daniiar Janalinov, oblys ákiminiń orynbasary Meirambek Shermaǵanbet baiandama jasady.
Qyzylorda oblysynyń tájiribesin óńirlerge úlgi etip kórsetý zor senim men úlken jaýapkershilik júkteidi.
Biyl oblys biýdjeti 823 mlrd. 400 mln. teńgege jetip, 2022 jyldan beri 226 paiyzǵa ósti. Onyń 477 mlrd. 600 mln. teńgesi (58%-y) áleýmettik salaǵa bólindi. Bul qarajat aimaqtaǵy eń ózekti degen máselelerdi sheshýge, turǵyndardyń ómir súrý sapasyn jaqsartýǵa, aýqymdy áleýmettik-infraqurylymdyq jobalardy iske asyrýǵa baǵyttalýda.
Sońǵy 3 jylda bilim, mádeniet jáne sport salalaryna bólingen qarjynyń maqsatty jumsalýyna júrgizilgen monitoring qorytyndysymen birqatar shyǵys yqshamdaldy. Qarjylyq zańsyzdyqtyń aldyn alýda naqty sharalar qabyldandy.
Balabaqshalardaǵy memlekettik tapsyrystyń tiimdi igerilýin 2023 jyldan beri qoldanysqa engizilgen «Feis-baqylaý» mobildik qosymshasy arqyly baqylaý múmkindigi týdy, iaǵni jalǵan tirkelgen balalar belgili boldy. Sonymen qatar, 2023-2025 jyldary osy mobildik qosymsha arqyly balalardyń kúndelikti balabaqshaǵa kelýi qadaǵalanyp, emhananyń jalǵan anyqtamalaryn, negizsiz demalys kúnderin anyqtaý esebinen 41 mlrd. teńge únemdeldi.
Orta bilim berý salasynda da birinshi kezekte mektepterdegi synyp jiyntyqtary men oqýshylardyń tolymdylyǵy zerdelendi. Eki jylda 76 synyp jiyntyǵynan 968 mln. 900 mln.teńge yqshamdaldy.
Mektep direktorlary jumysty óz dárejesinde oryndamaǵandyqtan, saǵat bólinisinde kemshilikterge jol bergendikten tolyq emes júktememen eńbek etetin adam sany 5000-ǵa jetken. Artyq shtattyq birlikter, tolyq emes júktememen jumys isteitin qyzmetkerler sanyn qysqartý úshin jańa oryndar ashýdy túbegeili toqtatýǵa ýaqytsha moratorii jariialandy. Búginde tolyq emes júktememen eńbek etetin 975 shtattyq birliktegi 3762 pedagogtiń máselesi sheshimin tabýyna bailanysty 6 mlrd. 200 mln. teńge únemdeldi.
Sondai-aq, oblystaǵy 7 bastaýysh, 7 keshki mekteptiń jelisi qysqartylyp, jyl saiyn 720 mln. teńge kóleminde únemdelýde.
Atqarylǵan sharalar jáne basqa da shyǵystardy qaita qaraý nátijesinde jalpy 15 mlrd. 600 mln. teńge yqshamdaldy. Budan bólek, suiyq otynmen jylytylatyn 198 bilim berý mekemesine 1 jylǵa qaralatyn 5 mlrd. teńgeniń maqsatty jumsalýy da qatań baqylaýda.
Sońǵy úsh jylda 7,8 mlrd. teńgege 24 mektep kúrdeli jóndeýden, 2,6 mlrd. teńgege 79 mektep aǵymdaǵy jóndeýden ótti. Oǵan qosa 22,9 mlrd teńgege 6 mektepke qosymsha ǵimarat, 12 jańa ǵimarat salyndy.
Bilim berý mekemeleri 3,5 mlrd teńgege pándik kabinet, interaktivti panel, LED ekran jáne robot qurylǵylarmen qamtyldy, 2,1 mlrd. teńgege qaýipsizdikti qamtamasyz etý, iaǵni beinebaqylaý júieleri, týrniket, dabyl núkteleri ornatyldy,
861,6 mln. teńgege jylý júieleri jańartyldy. Memleket basshysynyń bastamasymen júzege asyrylǵan «Keleshek mektepteri» ulttyq jobasy aiasynda ashylǵan jańa mektepter men basqa da jańa nysandardy ustap turý qarjysy jyl basynda bekitilgen qarjyny ońtailandyrý arqyly júzege asyrylýda.
Balalarǵa arnalǵan shyǵarmashylyq jáne sporttyq tapsyrysty qoldaýǵa 2021-2025 jyldarǵa 28,6 mlrd. teńge qaralyp, 12,6 mlrd. teńge igerildi. 2023 jyldan beri 13 mlrd. teńgesi, biyl 9,6 mlrd. teńge bólinip, onyń 6 mlrd. teńgesi biýdjetke qaitaryldy. Igerilgeni 616,5 mln.teńge (sport – 211,1 mln. teńge, mádeniet – 405,4 mln. teńge).
Qalǵan 2,7 mlrd. teńge shilde aiynda máslihat sheshimimen oblystyq bilim basqarmasyna aýystyryldy. Sebebi 1 maýsymnan biryńǵai memlekettik tapsyrys pilottyq jobasy iske asyrylýda. Ońtailandyrý arqyly únemdelgen biýdjet qarajaty áleýmettik mańyzdy máselelerge, onyń ishinde áleýmettik nysandar salýǵa baǵyttalýda.
Yqshamdalǵan qarjy bilim sapasyn arttyrýǵa investitsiia retinde qaita quiylýda. Basqa salalarda da biýdjet qarajaty únemdelip, yqshamdalyp birinshi kezektegi máselelerdi sheshýge jumsalyp keledi.
