Qyzylorda oblysynyń ákimi Nurlybek Nálibaev «With you E&C Kyzylorda» korei kompaniiasynyń direktory Hvang Sonsingpen kezdesti,– dep habarlaidy Dalanews.kz
Basqosýda turmystyq qatty qaldyqty qaita óńdeýge baǵyttalǵan birlesken jobany júzege asyrý máseleleri talqylandy.
Aimaq basshysy atalǵan joba óńirdiń ekologiialyq máselelerin sheshýdegi mańyzdy qadam ekenin atap ótti.
«Qazaqstan men Koreia – jyldar boiy ashyq jáne senimdi qarym-qatynas ornatqan strategiialyq seriktester. Kompaniialarymyz adal eńbegimen aimaqtyń mádeni-rýhani, agrarlyq jáne áleýmettik-ekonomikalyq damýyna zor úlesin qosýda. Ózderińizge belgili, 2024 jyly 12 maýsymda Astana qalasynda ótken «Qazaqstan-Koreia» biznes forýmy aiasynda «Qyzylorda qalasynda turmystyq qatty qaldyqty kádege jaratatyn, suryptaityn jáne qaita óńdeitin zaýyt salý» jobasyn iske asyrý jónindegi memorandýmǵa qol qoiyldy. Memleket basshysy Qasym-Jomart Kemelulynyń iri qalalarda turmystyq qatty qaldyqty qaita óńdeitin zaýyttar salý tapsyrmasyna sáikes, oblys aýmaǵynda aldaǵy eki jylda quny 81 mln. AQSh dollar bolatyn 9 jobany júzege asyrý kózdelgen. Atalǵan jobalar iske qosylǵanda óńirdiń barlyq aýdany men Qyzylorda qalasy óńdeý zaýyttarymen tolyq qamtylady.
Búgingi kezdesýdiń basty maqsaty – Qyzylorda oblysynda turmystyq qatty qaldyqty qaita óńdeýge baǵyttalǵan birlesken jobany júzege asyrýdy pysyqtaý. Ákimdik qoldanystaǵy zańnama aiasynda jobany jan-jaqty qoldady. Qyzylorda qalasy mańynan 4 gektar jer ýchaskesi tabystaldy», – dedi Nurlybek Mashbekuly.
Aita keteiik, 2023 jyly Qazaqstandaǵy Koreia Respýblikasy Bas Konsýldyǵynyń resmi shaqyrtýymen aimaq basshysy bastaǵan delegatsiia Koreia Respýblikasynda bolyp, ekijaqty kezdesýler men is-sharalar uiymdastyryldy. Seýl Ulttyq ǵylymi-tehnikalyq ýniversiteti prezidentimen kezdesýdiń nátijesinde bilim jáne ǵylym salasynda tiimdi bailanystar ornatyldy. 2023 jyly qarasha aiynda Qorqyt ata ýniversitetinde «Jasandy intellekt mektebi» ashyldy. Onda jasandy intellekt, kiberqaýipsizdik jáne informatika salalarynyń joǵary bilimdi kadrlary daiarlanady.
Aimaqta turmystyq qatty qaldyqty óńdep, jinap, suryptaityn 15 kompaniia jumys istep jatyr. Ótken jyly jinalǵan 303 myń tonna turmystyq qatty qaldyqtyń 91,2 myń tonnasy, iaǵni 30,1 paiyzy óńdeldi.
