قىزىلوردا وبلىسىنىڭ اكىمى نۇرلىبەك نالىبايەۆ «With you E&C Kyzylorda» كورەي كومپانياسىنىڭ ديرەكتورى حۆانگ سونسينگپەن كەزدەستى،– دەپ حابارلايدى Dalanews.kz
باسقوسۋدا تۇرمىستىق قاتتى قالدىقتى قايتا وڭدەۋگە باعىتتالعان بىرلەسكەن جوبانى جۇزەگە اسىرۋ ماسەلەلەرى تالقىلاندى.
ايماق باسشىسى اتالعان جوبا ءوڭىردىڭ ەكولوگيالىق ماسەلەلەرىن شەشۋدەگى ماڭىزدى قادام ەكەنىن اتاپ ءوتتى.
«قازاقستان مەن كورەيا – جىلدار بويى اشىق جانە سەنىمدى قارىم-قاتىناس ورناتقان ستراتەگيالىق سەرىكتەستەر. كومپانيالارىمىز ادال ەڭبەگىمەن ايماقتىڭ مادەني-رۋحاني، اگرارلىق جانە الەۋمەتتىك-ەكونوميكالىق دامۋىنا زور ۇلەسىن قوسۋدا. وزدەرىڭىزگە بەلگىلى، 2024 جىلى 12 ماۋسىمدا استانا قالاسىندا وتكەن «قازاقستان-كورەيا» بيزنەس فورۋمى اياسىندا «قىزىلوردا قالاسىندا تۇرمىستىق قاتتى قالدىقتى كادەگە جاراتاتىن، سۇرىپتايتىن جانە قايتا وڭدەيتىن زاۋىت سالۋ» جوباسىن ىسكە اسىرۋ جونىندەگى مەموراندۋمعا قول قويىلدى. مەملەكەت باسشىسى قاسىم-جومارت كەمەل ۇلىنىڭ ءىرى قالالاردا تۇرمىستىق قاتتى قالدىقتى قايتا وڭدەيتىن زاۋىتتار سالۋ تاپسىرماسىنا سايكەس، وبلىس اۋماعىندا الداعى ەكى جىلدا قۇنى 81 ملن. اقش دوللار بولاتىن 9 جوبانى جۇزەگە اسىرۋ كوزدەلگەن. اتالعان جوبالار ىسكە قوسىلعاندا ءوڭىردىڭ بارلىق اۋدانى مەن قىزىلوردا قالاسى وڭدەۋ زاۋىتتارىمەن تولىق قامتىلادى.
بۇگىنگى كەزدەسۋدىڭ باستى ماقساتى – قىزىلوردا وبلىسىندا تۇرمىستىق قاتتى قالدىقتى قايتا وڭدەۋگە باعىتتالعان بىرلەسكەن جوبانى جۇزەگە اسىرۋدى پىسىقتاۋ. اكىمدىك قولدانىستاعى زاڭناما اياسىندا جوبانى جان-جاقتى قولدادى. قىزىلوردا قالاسى ماڭىنان 4 گەكتار جەر ۋچاسكەسى تابىستالدى»، – دەدى نۇرلىبەك ماشبەك ۇلى.
ايتا كەتەيىك، 2023 جىلى قازاقستانداعى كورەيا رەسپۋبليكاسى باس كونسۋلدىعىنىڭ رەسمي شاقىرتۋىمەن ايماق باسشىسى باستاعان دەلەگاسيا كورەيا رەسپۋبليكاسىندا بولىپ، ەكىجاقتى كەزدەسۋلەر مەن ءىس-شارالار ۇيىمداستىرىلدى. سەۋل ۇلتتىق عىلىمي-تەحنيكالىق ۋنيۆەرسيتەتى پرەزيدەنتىمەن كەزدەسۋدىڭ ناتيجەسىندە ءبىلىم جانە عىلىم سالاسىندا ءتيىمدى بايلانىستار ورناتىلدى. 2023 جىلى قاراشا ايىندا قورقىت اتا ۋنيۆەرسيتەتىندە «جاساندى ينتەللەكت مەكتەبى» اشىلدى. وندا جاساندى ينتەللەكت، كيبەرقاۋىپسىزدىك جانە ينفورماتيكا سالالارىنىڭ جوعارى ءبىلىمدى كادرلارى دايارلانادى.
ايماقتا تۇرمىستىق قاتتى قالدىقتى وڭدەپ، جيناپ، سۇرىپتايتىن 15 كومپانيا جۇمىس ىستەپ جاتىر. وتكەن جىلى جينالعان 303 مىڭ توننا تۇرمىستىق قاتتى قالدىقتىڭ 91،2 مىڭ تونناسى، ياعني 30،1 پايىزى وڭدەلدى.
