Búgin oblys ákimi Nurlybek Nálibaev "Dostyq úiinde" ardagerler jáne ziialy qaýym ókilderimen kezdesti. Oǵan Halyq Qaharmany, armiia generaly Muhtar Altynbaev, kórnekti memleket jáne qoǵam qairatkeri, diplomat, Túrki memleketteri uiymy aqsaqaldar keńesiniń múshesi, Qyzylorda oblysynyń qurmetti azamaty Ikram Adyrbekov qatysty, dep habarlaidy Dalanews.kz.
Aimaq basshysy halqymyz ult jylnamasyndaǵy jańa kezeńge qadam basqanyn aityp, Konstitýtsiialyq reformaǵa toqtaldy.
"Prezidentimizdiń Jarlyǵymen 21 qańtarda Ata Zańymyzǵa ózgerister engizýge qatysty usynystardy tujyrymdaityn Konstitýtsiialyq reformalar jónindegi komissiia quryldy. Komissiianyń qorytyndy sheshiminiń nátijesimen Memleket basshymyz 2026 jylǵy 15 naýryzda respýblikalyq referendým ótkizý jóninde Jarlyqqa qol qoidy. Konstitýtsiia jobasynda Uly Dalanyń myńjyldyq tarihynyń sabaqtastyǵy saqtalyp, memlekettiń ýnitarly sipaty men shekarasyna, aýmaqtyq tutastyǵyna qol suǵýǵa bolmaityny naqtylanǵan. Eldigimizdiń basty nyshany sanalatyn jańa qujatta "Adam memleket úshin emes, memleket adam úshin" qaǵidaty aiqyndalǵan. Prezidentimizdiń bastamasymen qolǵa alynǵan saiasi naýqandar men reformalardy júzege asyrýda Syr jurtshylyǵy bereke-birliktiń, tatý tirliktiń úlgisin kórsetip keledi. Memleket basshymyz Qasym-Jomart Kemeluly Syr boiynda ótken Ulttyq quryltaida: "Sońǵy jyldary Qyzylorda oblysy zaman talabyna sai ósip-órkendep jatyr", – dep erekshe atap ótip, atqarylǵan jumystarǵa oń baǵasyn berdi. Aldaǵy ýaqytqa da Syr óńiriniń áleýmettik-ekonomikalyq jaǵdaiyn jaqsartýǵa, sáýlettik kelbetin jańartýǵa, zamanaýi ǵimarattardyń boi kóterýine baǵyttalǵan jańa jobalar josparlanǵan. Bul bastamalar ardagerlerimizdiń aqyl-keńesimen, turǵyndarymyzdyń suranysyna sáikes iske asýda. Elimizdiń turaqty damýy men halyqtyń birligin saqtaýda ardaqty ardagerlerimizdiń orny erekshe", – dedi N.Nálibaev.
Jiynda Muhtar Altynbaev pen Ikram Adyrbekov sóz sóilep, atqarylǵan jumystarǵa oń baǵasyn berdi. Sonymen qatar memleket jáne qoǵam qairatkerleri Bekmyrza Elamanov, Ibragim Ábibýllaev, oblystyq ardagerler keńesiniń tóraǵasy Serik Dúisenbaev, Qorqyt ata atyndaǵy Qyzylorda ýniversitetiniń basqarma tóraǵasy – rektory, oblystyq "Ádiletti jáne Progressivti Qazaqstannyń Halyqtyq Konstitýtsiiasy úshin!" óńirlik koalitsiia jetekshisi Naýryzbai Baiqadamov Konstitýtsiialyq reformaǵa qatysty pikirlerin ortaǵa saldy.
Sondai-aq Konstitýtsiialyq reforma jóninde jarty jylǵa jýyq ýaqytqa sozylǵan, ártúrli alańdarda júrgizilgen jalpyhalyqtyq talqylaýlar qoǵamnyń saiasi belsendiligi men azamattyq jaýapkershiliginiń aiqyn kórinisi ekeni aityldy. El taǵdyryna qatysty mańyzdy sheshimderdi halyqtyń tikelei daýys berýine usyný – demokratiianyń shynaiy ári myzǵymas qaǵidaty. Jańa Konstitýtsiia jobasynda memleketimizdiń irgeli negizderi, basty qundylyqtary men dúnietanymdyq ustanymdary júielenip, zamanaýi talaptarǵa sai jańǵyrtyldy.
Eske salsaq, qalamyzda ótken tarihi mańyzdy jiynda Memleket basshysy Qyzylorda qalasynda 48 mlrd 500 mln teńgege perzenthana, 14 mlrd 780 mln teńgege emhana salynatynyn, 36 mlrd 400 mln teńgege kópbeiindi aýrýhananyń qurylysy bastalǵanyn jariialaǵan edi. Ótken aptada atalǵan meditsina nysandarynyń jáne Titov qystaǵynda aýysymyna 400 kelýshige arnalǵan emhananyń irgetasy qalandy.
