2025 jylǵy 13 mamyrdaǵy Úkimet otyrysynda Qyzylorda oblysynda «Qorqyt Ata» arnaıy ekonomıkalyq aımaǵyn (AEA) qurý týraly sheshim qabyldandy, dep habarlaıdy Dalanews.kz
Memleket basshysynyń halyqqa Joldaýynan týyndaıtyn negizgi mindetterdiń biri – aerohabtardy damytý, áýejaılardyń, avtomobıl magıstraldarynyń ınfraqurylymyn jetildirý.
Osy baǵytta Qyzylorda qalasyndaǵy halyqaralyq áýejaıdyń jańa termınalyna irgeles 550 gektar aýmaqta «Qorqyt Ata» arnaıy ekonomıkalyq aımaǵy qurylady. Bul bastama - óńir ekonomıkasyn ártaraptandyrýǵa, munaı óndirisine táýeldilikti tómendetýge jáne jańa óndiristik baǵyttardy qalyptastyrýǵa baǵyttalǵan strategıalyq qadam.
AEA qurylymyna avıasıaǵa qyzmet kórsetý, kóterme-bólshek saýda, qoımalaý jáne saqtaý, sondaı-aq, ónerkásiptik aımaqtary kiredi. Arnaıy ekonomıkalyq aımaqta qurylys ındýstrıasy, jeńil jáne tamaq ónerkásibi, mashına jasaý, kólik-logıstıka, tehnologıalar men ınovasıalar salalarynda ınvestısıalyq jobalardy júzege asyrý josparlanǵan.
Atap ótý qajet, AEA qurýdyń belgilengen qaǵıdalaryna sáıkes, 28 ekonomıkalyq qyzmet túriniń tizbesi kelisildi.
«Qorqyt Ata» AEA qurylýy ınvestısıa tartýǵa, óndiristik qýatty arttyrýǵa jáne Qyzylorda oblysynyń eksporttyq áleýetin damytýǵa jańa múmkindikter ashady.
