Qyzylorda oblysynda qolaily investitsiialyq klimat qalyptasyp, iri investitsiialyq jobalar júzege asýda. Bul týraly Astanadaǵy Ortalyq kommýnikatsiialar qyzmetinde ótken brifingte oblys ákimi Nurlybek Nálibaev baiandady, dep habarlaidy Dalanews.kz.
«2022-2024 jyldary oblys ekonomikasyna 1 trln. 600 mlrd. teńgege jýyq investitsiia tartyldy. Biylǵa 631 mlrd. 400 mln. teńge josparlanǵan. Búginde jańa jobalardy iske qosý arqyly investitsiia 750 mlrd. teńgeden asyp, jospar artyǵymen oryndaldy. 2021 jylmen salystyrǵanda investitsiia kólemi 233 paiyz artsa, jeke investitsiia úlesi 70 paiyz. Ekonomikany ártaraptandyrýda aldaǵy jyldary 2,8 trln teńgeniń 98 investitsiialyq jobasy josparlanǵan. Bul 12 myń jańa jumys ornyn qurýǵa múmkindik beredi.
Biyl 300 mlrd. teńgeden astam qarjyǵa 27 investitsiialyq joba iske qosyldy. Shilde aiynda 5 mlrd. teńgege «Qyzylorda Saz-M» seriktestiginiń tolyq avtomattandyrylǵan kirpish zaýyty ashyldy. Zaýyt jylyna 90 mln. kirpish shyǵaryp, jergilikti qurylysqa qajetti suranystyń 90 paiyzyn qamtamasyz etedi.
«Qyzylorda nan» seriktestiginiń nan óndirý kesheni iske qosyldy. Keshenniń jalpy quny 5 mlrd. 600 mln. teńge bolatyn nan-toqash, konditerlik-makaron ónimderin (jalpy qýattylyǵy 7,8 myń tonna) shyǵaratyn 4 tsehy jumys jasaýda.
Budan bólek, 753 mlrd. 300 mln. teńgege 14 iri jobanyń qurylysy bastalýda. Olardy atap ótsek, 414 mlrd. 700 mln. teńgege «Shalqiia» ken-baiytý fabrikasy, 161 mlrd. 400 mln. teńgege kaltsiilengen soda zaýyty, 60 mlrd. teńgege «Seven Rivers Technologies» kompaniiasynyń bótelke shyǵaratyn zaýyty, 37 mlrd. 800 mln. teńgege ońtústik koreialyq «With you e&c Qyzylorda» kompaniiasynyń turmystyq qatty qaldyqtar óńdeý zaýyty. «Tabiǵi tas Qyzylorda» seriktestiginiń 17 mlrd. 300 mln. teńge qarjy salynǵan, qýattylyǵy jylyna 1 mln. 100 myń tonna ák shyǵaratyn zaýyty kelesi jyly iske qosylady (92 jumys orny qurylady).
Ótken aptada ǵana ispandyq «Roca Group» kompaniiasymen jylyna 500 myńǵa deiin sanitarlyq-tehnikalyq ónimder shyǵaratyn joǵary tehnologiialyq zaýyt salý jóninde investitsiialyq kelisimge qol qoiyldy. Elimizde salynatyn alǵashqy zaýyttyń quny 44 mlrd. teńge, 300-ge jýyq jańa jumys orny ashylady.
Joba 2027 jyly iske qosylady
Óńirde agrarlyq-indýstriialyq klaster qurý maqsatynda 51 mlrd. teńgege shveitsariialyq «Harvest agro» kompaniiasynyń tehnikalyq qarasora, júgeri men soia ósiretin, qaita óńdeitin zaýytynyń jáne 40 mlrd. teńgege júgeri daqylyn tereń óńdeitin krahmal-sirne zaýytynyń qurylysy bastaldy.
Úkimet qaýlysymen mamyr aiynda Qyzylorda qalasynda aýmaǵy 550 gektar «Qorqyt Ata» arnaiy ekonomikalyq aimaǵy quryldy.
Aimaqqa óndiristik nysandardy ornalastyrý maqsatynda otandyq, sheteldik investorlarmen kelissózder júrgizilýde. 
Bul jerde óńirimizdiń ónerkásiptik- logistikalyq áleýetine sáikes keletin ekonomikalyq qyzmettiń 18 túri iske asady. Qazirgi tańda injenerlik infraqurylymmen qamtamasyz etý jumystary bastalýda.
