Naýryz aıynda İ. Jansúgirov atyndaǵy Jetisý ýnıversıtetiniń delegasıasy bilim men ǵylym, sondaı-aq agrarlyq sektordaǵy halyqaralyq yntymaqtastyqty nyǵaıtý maqsatynda Qytaı Halyq Respýblıkasyna resmı issaparmen bardy. İssapar barysynda delegasıa birneshe joǵary oqý ornynda bolyp, mańyzdy kezdesýler ótkizdi, dep habarlaıdy Dalanews.kz.
Alǵashqy kúni Shensı provınsıasynyń Sıan qalasynda ornalasqan Shensı ǵylym jáne tehnologıa ýnıversıtetiniń basshylyǵymen kezdesý ótip, yntymaqtastyq jónindegi memorandýmǵa qol qoıyldy.
Kezdesý barysynda eki oqý orny arasyndaǵy akademıalyq almasý, birlesken ǵylymı jobalar men ınovasıalyq bastamalardy júzege asyrý máseleleri keńinen talqylandy. Qytaılyq áriptester bilim berý men ǵylym salasyndaǵy ozyq tehnologıa jetistikterimen bólisýge jáne básekege qabiletti kadrlardy birlesip daıarlaýǵa daıyn ekendikterin bildirdi.
Atalǵan ýnıversıtet 1958 jyly qurylǵan memlekettik kópsalaly joǵary oqý orny. Bastapqyda jeńil ónerkásip salasyna beıimdelgen ınstıtýt retinde negizi qalanǵan oqý orny búginde ınjenerıa, materıaltaný, hımıa jáne tehnologıa baǵyttary boıynsha mamandar daıarlaıtyn zamanaýı ýnıversıtetke aınalǵan.
Jetisýlyq ǵalymdar sondaı-aq Northwest Agriculture and Forestry University bazasynda bolyp, aýyl sharýashylyǵy salasyndaǵy ozyq ǵylymı-zertteý ınfraqurylymymen tanysty. Ýnıversıtet ǵalymdary zerthanalar men tájirıbelik alańdarda arpa, bıdaı, soıa sıaqty mańyzdy daqyldardy ósirýdiń zamanaýı ádisterin keńinen qoldanady. Bul tájirıbe bolashaqta agrarlyq baǵyttaǵy mamandardy birlesip daıarlaýǵa jáne ǵylymı jobalardy júzege asyrýǵa zor múmkindik beredi.
İssapardyń taǵy bir mańyzdy bóligi — Yuchun Agricultural Mobile Orchard ortalyǵynyń jumysymen tanysý boldy. Ortalyq aqyldy jylyjaılar men sıfrlyq basqarý júıeleri arqyly maýsymnan tys kezeńde ónim alýǵa múmkindik beredi. Sonymen qatar óndiristi avtomattandyrý jáne ǵylymı zertteýlerdi tájirıbemen ushtastyrý arqyly joǵary nátıjelerge qol jetkizip otyr. Mundaı tájirıbe Jetisý óńiriniń agrarlyq sektoryn damytýda tıimdi bolmaq.
Qytaı Halyq Respýblıkasyndaǵy jetekshi ýnıversıtetter men ǵylymı ortalyqtarmen yntymaqtastyq Jetisý ýnıversıtetiniń áleýetin arttyryp qana qoımaı, elimizdiń bilim berý jáne agrarlyq sektorlaryn damytýǵa da oń yqpal etedi. Bul — Jetisý ýnıversıteti úshin úlken múmkindik ári halyqaralyq deńgeıde básekege qabiletti kadrlar daıarlaýdyń mańyzdy tetigi.
Búgingi tańda bilim men ǵylym jahandyq sıpatqa ıe. İ. Jansúgirov atyndaǵy Jetisý ýnıversıteti osy baǵyttaǵy jumystaryn júıeli túrde jalǵastyryp, akademıalyq utqyrlyqty damytyp, halyqaralyq yntymaqtastyqty odan ári nyǵaıtýǵa kúsh salýda.
