Qytai investorlary Túrkistan oblysynda eki zaýyt salmaq
Basqosý nátijesinde yntymaqtastyq týraly memorandýmǵa qol qoiyldy.
Qaýymdastyq prezidenti saýda-ekonomikalyq yntymaqtastyqty odan ári nyǵaitýǵa múddeli ekenin atap ótip, Túrkistan oblysynda óz biznesin damytqysy keletin qytailyq kásipkerlerdiń sany artqanyn jetkizdi.
– Qasietti Oraza ait kúni kezdesip otyrǵanymyzǵa qýanyshtymyz. Aitynyz qabyl bolsyn. Túrkistan oblysy óte qarqyndy damý ústinde. Qytaidyń kóptegen investorlary osy Túrkistan oblysyna kelip, jumys isteýdi armandaidy. Bizdiń qaýymdastyqta 20 myńnan astam orta jáne kishi kásiporyndar bar. Pandemiia jaǵdaiyna bailanysty investorlar kele almai otyr. Ázirge avtobýstar men elektrakkýmýliatoryn jasap shyǵaratyn eki zaýyt salýdy kózdep otyrmyz, – dedi Qytai Halyq Respýblikasynyń kásipkerlerin qoldaý qaýymdastyǵynyń prezidenti Hýan Lin.
Kezdesý barysynda taraptar ekijaqty qarym-qatynastardy, iskerlik bailanystar men yntymaqtastyqty damytý máselelerin talqylady. Oblys basshysy Hýan Lindi óńirdiń ekonomikalyq áleýetimen tanystyryp, birlesken jobalardy júzege asyrýǵa shaqyrdy. Oblys ákimi elektr qýatymen júretin avtokólikterge arnalǵan akkýmýliator jasap shyǵaratyn zaýyttyń qurylysyna erekshe mán berdi.
– Bul – bolashaǵy bar joba. Aldaǵy ýaqytta suranysqa ie bolary anyq. Sondyqtan qoldaýǵa daiynbyz. Indýstrialdy aimaqta bir aidyń ishinde erkin ekonomikalyq aimaq qalyptastyrylady. Investorlarǵa barlyq jaǵdai jasalady. Jer bólinedi. Elektr qýaty men gazben qamtamasyz etilip, temir jol qyzmeti usynylady. Sonymen qatar, salyqtan bosatylady. Elimizde suranysqa ie bolatyn jobalardy qoldaýǵa biz árqashan daiynbyz, –dedi Ómirzaq Shókeev.
Qysqa merzim ishinde erkin ekonomikalyq aimaq retinde qurylatyn indýstrialdy aimaqtyń jalpy aýmaǵy 350 gektar. Ondaǵy túrli alańdarda investitsiialyq jobalardy iske asyrýǵa mol múmkindik berilgen. Túrkistan oblysy qurylǵaly óńirge 3,5 mlrd AQSh dollary kóleminde investitsiia tartylǵan. Aldaǵy tórt jylda 3,6 mlrd. AQSh dollaryn quraityn 97 joba iske asyrylady. Nátijesinde 22 myń adamdy jumys oryndarymen qamtamasyz etiledi.
