Atyraý oblysynda barlaý jumystaryn júrgizý týraly kelisimge "QazMunaiGaz" UK AQ (QMA) pen China National Offshore Oil Corporation International Limited (CNOOC) qol qoidy, dep habarlaidy Dalanews.kz.
Kelissóz barysynda "Jylyoi" jer qoinaýyn paidalaný jobasy boiynsha negizgi yntymaqtastyq sharttaryn aiqyndaityn qujatqa qol qoiyldy. Atap aitqanda, qos kompaniia jer qoinaýy ýchaskesinde kelesi jumystardy oryndaýǵa kelisti:
- 2D (400 boilyq km óńdeý jáne taldaý) jáne 3D (dala jumystary, 400 sharshy km óńdeý jáne taldaý) seismikalyq barlaý;
- 2000 m tereńdikte bir tuzústi barlaý uńǵymasyn burǵylaý (táýelsiz kezeń);
- 3D seismikalyq barlaý derekteriniń nátijelerine qarai tereńdigi 4500 m bir tuzasty barlaý uńǵymasyn (táýeldi kezeń) burǵylaý.
QMG-nyń aldyn ala baǵalaýy boiynsha jer qoinaýy ýchaskesiniń geologiialyq resýrstyq áleýeti 185 million tonnadan astam munaidy quraýy múmkin.
Negizgi yntymaqtastyq sharttaryna qol qoiý rásimi CNOOC kompaniiasynyń atalǵan jobany birlesip iske asyrýǵa degen qyzyǵýshylyǵyn rastai túsedi. Bul qadam kompaniialar úshin kómirsýtekterdi izdeý baǵytynda jańa múmkindikterge jol ashpaq.
QMG basshysy jobanyń Qazaqstan úshin mańyzyna toqtaldy:
"Álemdegi jetekshi energetikalyq kompaniialardyń birimen ornatqan bul seriktestik Qazaqstannyń munai-gaz sektorynyń damýyna jańa serpin beretinine senimdimiz. Sonymen qatar elimizge tartylatyn sheteldik investitsiialardyń kólemi artady. Óitkeni barlaý kezeńi CNOOC esebinen qarjylandyrylady", dep atap ótti "QazMunaiGaz" UK" AQ basqarma tóraǵasy Ashat Hasenov.
Aita ketsek, China National Offshore Oil Corporation (CNOOC) — barlaý men óndirýmen ainalysatyn munai-gaz salasyndaǵy álemdik kóshbasshy kompaniialardyń biri. Ol halyqaralyq seriktestermen belsendi yntymaqtastyq ornatyp, 20-dan astam elde iri jobalardy iske asyrýǵa atsalysady.
