Áielin óltirdi dep aiyptalyp otyrǵan Qýandyq Bishimbaevqa qatysty búgingi sot otyrysynda Bishimbaevtyń inisi ári ekinshi aiyptalýshy Baqytjan Baijanov ózine qysym jasalyp jatqanyn aityp, tosyn málimdeme jasady.
Áleýmettik jelide Qýandyq Bishimbaevtyń burynǵy áieli Nazym Qaharman da búgingi sot otyrysyna qatysty pikir bildirip, tek Baijanovqa emes, oǵan da qysym jasalyp jatqanyn jetkizdi, - dep habarlaidy Dalanews.kz.
Sot otyrysynda Baijanovtyń advokaty sotqa ótinish jasady. Onyń sózinshe, Baijanov Bishimbaevtan bólek otyrǵysy keledi.
"Bishimbaevty Baijanovtan alys otyrǵyzý qajet. Baijanov ózine qysym kórsetilip jatyr dep sanaidy. Olardyń arasynda kikiljiń bolyp jatyr. Tym quryǵanda erteńgi otyrysta Qýandyqtan aýlaq otyrsa bolar edi", - dedi Baijanovtyń advokaty.
Keiin muny Bishimbaevtyń inisi Baijanovtyń ózi de rastady.
"Ol maǵan jaýap berý kezinde "bylai ait, bylai ait" dep qysym kórsetip jatyr", - dedi Baijanov.
Baqytjan Baijanovqa Qylmystyq kodekstiń eki baby boiynsha aityp taǵylǵan:
- 432-baby (asa aýyr qylmysty jasyryp qalý);
- 434-baby (asa aýyr qylmysty habarlamaý).
Sonymen qatar, buǵan deiin prokýror Erlan Ótegenov Saltanat Núkenovanyń ólimi boiynsha ustalǵan ekinshi adam Qýandyq Bishimbaevtyń týysy ekenin rastaǵan edi. Iaǵni ol - Baijanov.
Al búgingi sot otyrysynan keiin Bishimbaevtyń burynǵy áieli Nazym Qaharman da ózine qysym kórsetilip jatqanyn jetkizdi.
"...Tipti sotta da búkil eldiń kózinshe oǵan (Baijanovqa - esk.) abiýzerlik qarym-qatynas jasap jatyr. Tek oǵan emes (ol sottalýshylar oryndyǵynda birge otyr), maǵan da qysym kórsetýge tyrysyp jatyr. Sondai qorqynyshty. Sot Baqytjandy odan alystatady dep úmittenemin", - dep jazdy ol.
Buǵan deiingi sot otyrysynda Baqytjan Baijanov qylmys jasady ma, joq pa, ony ózi de bilmeitinin aitqan edi.
"Men videony óshirýdi suraǵanymdy, sondai-aq, Saltanattyń telefonyn úiine alyp ketýdi suraǵanymdy moiyndaimyn, qylmys jasadym ba, bilmeimin. Men ol kezde Saltanattyń ólim aldynda jatqanyn nemese ólgenin bilmedim, túsinbedim", - dedi ol sotta.
Al keiingi sot otyrystarynyń birinde qaiǵyly oqiǵa bolǵan meiramhanada jumys istegen qyzmetker Bishimbaevtyń inisi videolardy qalai óshirtkenin aitqan bolatyn.
"9 qarashada tańǵy saǵat 10-da jumysqa keldim. Kabinetke kelip, noýtbýkty ashtym. Meniń jumysym jalǵa alýshylarmen kezdesý bolatyn. Ádettegidei jumysymdy istep júrdim. 12.00-13.00 shamasynda meiramhanalardy aralap shyǵamyn. Sol kúni 13.00-de meiramhanany aralap shyqtym, birinshi qabatta bári jumys istep turdy. Ekinshi qabattaǵy BAU meiramhanasy jumys istemei turdy. Ákimshiden nege ashylmaǵanyn suradym. Ákimshi olarda sanitarlyq kún ekenin aitty. Men jaqsy dep, óz jumysymmen kete berdim", - deidi kýáger.
Sol kúni 14.00 shamasynda ákimshi kelip, Baqytjan Baijanov (Bishimbaevpen birge sotta kúdikti retindegi adam ári onyń týysy) habarlasyp, beinekameradaǵy videolardy óshirýdi suraǵanyn aitqan.
"Búkil gastroortalyqtaǵy videony óshirýdi surady. Artynan Baqytjan Baijanov ta kelip videolardy óshirýimdi surady. Ne úshin óshirý keregin naqtylamadym", - deidi kýáger.
Meiramhananyń burynǵy qyzmetkeri shamamen 15 minýttai server kabinetinde bolyp, videolardy óshirip, shyǵyp ketken.
"Videolardy kórgen joqpyn. Men dispetcherlik kabinetten shyǵyp, kiltti ákimshige berip, kettim", - dedi buǵan deiingi sot otyrysynda kýáger.
