Qyrǵyzstannyń Ulttyq qaýipsizdik memlekettik komitetiniń tóraǵasy Kamchybek Tashiev eldiń premer-ministri Aqylbek Japarovtyń otstavkasyna qatysty pikir bildirdi, dep habarlaidy Dalanews.kz 24.kg-ge siltep.
Qyrǵyzstandyqtar úshin Aqylbek Japarovtyń otstavkasy kútpegen jańalyq bolǵan. Sebebi bir ai buryn premer "Otstavkaǵa ketýimdi kútpeńder" dep málimdegen bolatyn. Biraq ózi otstavkaǵa ketý týraly ótinish jazyp, oǵan prezident qol qoiǵan.
Onyń aitýynsha, otstavka týraly sheshimdi prezident qabyldaidy.
"Aqylbek Úsenbekuly tájiribeli adam jáne memleket úshin kóptegen igi ister atqardy. Biz prezidenttiń sheshimderin talqylamaimyz", – dedi ol.
Jýrnalister salyq qyzmetindegi sybailas jemqorlyqpen bailanys bar-joǵyn surady. Kamchybek Tashiev bul suraqqa: "Ol ketti, sebebi bir nársemen bailanysty boldy. Jaidan-jai ketken joq qoi" dep jaýap berdi.
Qyrǵyzstannyń UQMK tóraǵasy 2026 jyly ótetin prezidenttik sailaýda kandidat bola ma degen suraqqa jaýap berdi.
"Men eki jyldan keiin ótetin sailaýda prezidenttikke óz kandidatýramdy usynbaimyn", – dedi Tashiev.
Onyń aitýynsha, Sadyr Japarovtyń memleket basshysy laýazymyna qaitadan sailaýǵa túsýge tolyq quqyǵy bar.
"Men qazirgi prezidentti qoldaimyn. Kimdi prezident etemiz? Ravshan Jeenbekovty ma, nemese Beknazarovty ma? Álde Almazbek Atambaevty qaitarý kerek pe? Munyń bárin kórdik qoi. Sadyr Japarovtyń prezidenttikke óz kandidatýramdy usynýǵa tolyq quqyǵy bar. Men onyń kandidatýrasyn tolyq qoldaimyn", – dep atap ótti UQMK tóraǵasy.
Aqylbek Japarov 2021 jyldyń 1 maýsymy men 12 qazany aralyǵynda Ministrler kabinetiniń tóraǵasynyń orynbasary qyzmetin atqardy. Ol bul qyzmetti atqara júrip, Ekonomika jáne qarjy ministrligin basqardy. 2021 jyldyń 13 qazanynan bastap Ministrler kabinetiniń tóraǵasy jáne prezident ákimshiliginiń basshysy bolyp jumys istedi.
Eske salaiyq, buǵan deiin, 16 jeltoqsan kúni Aqylbek Japarovtyń Qyrǵyzstan ministrler kabinetiniń basshysy qyzmetinen ketkeni belgili boldy.
Buǵan deiin Qyrǵyzstannyń Salyq qyzmetiniń basshysy Altynbek Abdývapov pen onyń orynbasary Islambek Kydyrgychov tergeý sharalary kezeńinde ýaqytsha qyzmetterinen shettetilgeni habarlanǵan edi.
