Қырғызстанның Ұлттық қауіпсіздік мемлекеттік комитетінің төрағасы Камчыбек Ташиев елдің премьер-министрі Ақылбек Жапаровтың отставкасына қатысты пікір білдірді, деп хабарлайды Dalanews.kz 24.kg-ге сілтеп.
Қырғызстандықтар үшін Ақылбек Жапаровтың отставкасы күтпеген жаңалық болған. Себебі бір ай бұрын премьер "Отставкаға кетуімді күтпеңдер" деп мәлімдеген болатын. Бірақ өзі отставкаға кету туралы өтініш жазып, оған президент қол қойған.
Оның айтуынша, отставка туралы шешімді президент қабылдайды.
"Ақылбек Үсенбекұлы тәжірибелі адам және мемлекет үшін көптеген игі істер атқарды. Біз президенттің шешімдерін талқыламаймыз", – деді ол.
Журналистер салық қызметіндегі сыбайлас жемқорлықпен байланыс бар-жоғын сұрады. Камчыбек Ташиев бұл сұраққа: "Ол кетті, себебі бір нәрсемен байланысты болды. Жайдан-жай кеткен жоқ қой" деп жауап берді.
Қырғызстанның ҰҚМК төрағасы 2026 жылы өтетін президенттік сайлауда кандидат бола ма деген сұраққа жауап берді.
"Мен екі жылдан кейін өтетін сайлауда президенттікке өз кандидатурамды ұсынбаймын", – деді Ташиев.
Оның айтуынша, Садыр Жапаровтың мемлекет басшысы лауазымына қайтадан сайлауға түсуге толық құқығы бар.
"Мен қазіргі президентті қолдаймын. Кімді президент етеміз? Равшан Жээнбековты ма, немесе Бекназаровты ма? Әлде Алмазбек Атамбаевты қайтару керек пе? Мұның бәрін көрдік қой. Садыр Жапаровтың президенттікке өз кандидатурамды ұсынуға толық құқығы бар. Мен оның кандидатурасын толық қолдаймын", – деп атап өтті ҰҚМК төрағасы.
Ақылбек Жапаров 2021 жылдың 1 маусымы мен 12 қазаны аралығында Министрлер кабинетінің төрағасының орынбасары қызметін атқарды. Ол бұл қызметті атқара жүріп, Экономика және қаржы министрлігін басқарды. 2021 жылдың 13 қазанынан бастап Министрлер кабинетінің төрағасы және президент әкімшілігінің басшысы болып жұмыс істеді.
Еске салайық, бұған дейін, 16 желтоқсан күні Ақылбек Жапаровтың Қырғызстан министрлер кабинетінің басшысы қызметінен кеткені белгілі болды.
Бұған дейін Қырғызстанның Салық қызметінің басшысы Алтынбек Абдувапов пен оның орынбасары Исламбек Кыдыргычов тергеу шаралары кезеңінде уақытша қызметтерінен шеттетілгені хабарланған еді.
