Japarov bilikke kelgeli qyrǵyzdyń Ulttyq qaýipsizdik komiteti jemqorlardyń sandyǵyndaǵy 8 mlrd somdy memleketke qaitarǵan. Prokýratýranyń aralasýymen urlanǵan 3 mlrd som jáne anyqtalǵan. Paraqorlardyń esep-shotyndaǵy aqsha basy bútin kúiinde qazynaǵa quiylǵan.
«Jemqor shendilerdiń dúnie-múlkin de tárkiledik. Jyljityn, jyljymaityn múlik memlekettiń esebine ótti. Jemqorlyqpen kúreste ashyq saiasat ustanyp otyrmyz. Kez-kelgen qyrǵyz azamaty Ulttyq qaýipsizdik komiteti men Bas prokýratýraǵa bas suǵyp, aqshanyń qaida aýdarylǵanyn surai alady. Bul týraly anyq-qanyq málimet beremiz. Qupiia deitin emes. Eger qandai da bir sebeppen atalǵan organdar sizge málimet berýden bas tarta, birden maǵan aityńyzdar», – deidi ol.
...
Paraqorlarǵa qarsy ymyrasyz kúres jariialaǵan Japarov Qyrǵyz keden qyzmeti basshysynyń eks-orynbasary Raiymbek Matraimovtyń «jegenin jelkesinen shyǵarǵanyn» málimdedi.
Qyzmetin asyra paidalanyp, milliondaǵan dollardy qaltaǵa basty degen kúdikke ilingen Matraimov el arasynda "Raiym million" degen atpen áigili. Matraimov áýleti Qyrǵyzstannyń eń dáýletti semialarynyń sanatynda bolǵan. Japarov atyshýly shendini abaqtyǵa jappasa da, oǵan tiesili kapitaly túgeldei memleketke qaitarǵanyn aitady.
«Biz odan 2 mlrd 150 mln som óndirip aldyq. Oǵan tiesili «Eldorado» saýda úiin kámpeskeledik. Matraimovtyń ieligindegi 10 elitaly páterdi memlekettik baspana baǵdarlamasy arqyly halyqqa úlestirip berdik.
Ishtegi bailyǵynan bólek, syrttaǵy kapitalyn da izdestirdik. Sheteldegi aktivteriniń izin jasyryp úlgergen eken, ol týraly tolymdy aqparat taba almadyq.
Esep-shotyndaǵy eldiń esebinen jiǵan-tergenin túgeldei sypyryp aldyq. 2 mlrd som memleket qazynasyna aýdaryldy, artynsha abaqtydan bosatyp jiberdik. Ony eldiń esebinen asyrap, túrmede ustaǵannan ne utamyz?
Raiym ǵana emes, halyqtan urlaǵanyn eselep qaitarǵan ózge de sheneýnikter kóp uzamai bostandyqqa shyqty. Paraqorlardyń qoiny-qonyshyn tintip, jalpy sany 8 mlrd somdy biýdjetke aýdardyq», – deidi Japarov.
...
Qyrǵyz basshysy óziniń mańaiyndaǵy kadrlarǵa qatysty pikir bildiripti. Japarov olardyń burnaǵy is-áreketi men repýtatsiiasyna nazar aýdarmaitynyn aitady.
«Tóńiregime toptasqan azamattarǵa qoiar jalǵyz talabym bar:
«Ótken ómirińe úńilmeimin, opponentimniń komandasynda bolǵanyń úshin qýdalaityn ádetim joq.
Eń bastysy urlyq-qarlyq, barymta-syrymta degen túsinikten aýlaq bol. Memleket múddesi úshin qareket qyl! Al eger týra joldan taisań, menen aiaýshylyq kútpe.
Jegenińdi jelkeńnen shyǵaramyn. Abaqtyǵa qamalyp azap shegesiń», - deimin.
Iá, keibiriniń ótkeni bulyńǵyr, abyroi-bedeli kúmándi. Biraq, iske kelgende shiraq, batyl qimyldaidy. Memlekettik jumystyń uńǵyl-shuńǵylyn beske biledi. Taý qoparyp tastaityn qaýqary bar. Taza jigitterdiń keibiri bolbyr, sylbyr. Olardy kútip otyratyn ýaqyt tapshy. Memlekettik qyzmet táýekelge baryp, batyl sheshim qabyldaýdy talap etedi», – deidi Japarov.
Qyrǵyz basshysy jemqorlyqtyń tamyryna balta shaýyp, korrýptsiianyń kózin qurtýǵa kiriskeli otyr.
"Antikordyń nazaryna ilikken sheneýnikter jegenin eselep qaitarady, halyqtyń sózimen sanaspaityn eski júie kelmeske ketti", – deidi ol.
