جاپاروۆ بيلىككە كەلگەلى قىرعىزدىڭ ۇلتتىق قاۋىپسىزدىك كوميتەتى جەمقورلاردىڭ ساندىعىنداعى 8 ملرد سومدى مەملەكەتكە قايتارعان. پروكۋراتۋرانىڭ ارالاسۋىمەن ۇرلانعان 3 ملرد سوم جانە انىقتالعان. پاراقورلاردىڭ ەسەپ-شوتىنداعى اقشا باسى ءبۇتىن كۇيىندە قازىناعا قۇيىلعان.
«جەمقور شەندىلەردىڭ دۇنيە-مۇلكىن دە تاركىلەدىك. جىلجيتىن، جىلجىمايتىن مۇلىك مەملەكەتتىڭ ەسەبىنە ءوتتى. جەمقورلىقپەن كۇرەستە اشىق ساياسات ۇستانىپ وتىرمىز. كەز-كەلگەن قىرعىز ازاماتى ۇلتتىق قاۋىپسىزدىك كوميتەتى مەن باس پروكۋراتۋراعا باس سۇعىپ، اقشانىڭ قايدا اۋدارىلعانىن سۇراي الادى. بۇل تۋرالى انىق-قانىق مالىمەت بەرەمىز. قۇپيا دەيتىن ەمەس. ەگەر قانداي دا ءبىر سەبەپپەن اتالعان ورگاندار سىزگە مالىمەت بەرۋدەن باس تارتا، بىردەن ماعان ايتىڭىزدار»، – دەيدى ول.
...
پاراقورلارعا قارسى ىمىراسىز كۇرەس جاريالاعان جاپاروۆ قىرعىز كەدەن قىزمەتى باسشىسىنىڭ ەكس-ورىنباسارى رايىمبەك ماترايموۆتىڭ «جەگەنىن جەلكەسىنەن شىعارعانىن» مالىمدەدى.
قىزمەتىن اسىرا پايدالانىپ، ميلليونداعان دوللاردى قالتاعا باستى دەگەن كۇدىككە ىلىنگەن ماترايموۆ ەل اراسىندا "رايىم ميلليون" دەگەن اتپەن ايگىلى. ماترايموۆ اۋلەتى قىرعىزستاننىڭ ەڭ داۋلەتتى سەميالارىنىڭ ساناتىندا بولعان. جاپاروۆ اتىشۋلى شەندىنى اباقتىعا جاپپاسا دا، وعان تيەسىلى كاپيتالى تۇگەلدەي مەملەكەتكە قايتارعانىن ايتادى.
«ءبىز ودان 2 ملرد 150 ملن سوم ءوندىرىپ الدىق. وعان تيەسىلى «ەلدورادو» ساۋدا ءۇيىن كامپەسكەلەدىك. ماترايموۆتىڭ يەلىگىندەگى 10 ەليتالى پاتەردى مەملەكەتتىك باسپانا باعدارلاماسى ارقىلى حالىققا ۇلەستىرىپ بەردىك.
ىشتەگى بايلىعىنان بولەك، سىرتتاعى كاپيتالىن دا ىزدەستىردىك. شەتەلدەگى اكتيۆتەرىنىڭ ءىزىن جاسىرىپ ۇلگەرگەن ەكەن، ول تۋرالى تولىمدى اقپارات تابا المادىق.
ەسەپ-شوتىنداعى ەلدىڭ ەسەبىنەن جيعان-تەرگەنىن تۇگەلدەي سىپىرىپ الدىق. 2 ملرد سوم مەملەكەت قازىناسىنا اۋدارىلدى، ارتىنشا اباقتىدان بوساتىپ جىبەردىك. ونى ەلدىڭ ەسەبىنەن اسىراپ، تۇرمەدە ۇستاعاننان نە ۇتامىز؟
رايىم عانا ەمەس، حالىقتان ۇرلاعانىن ەسەلەپ قايتارعان وزگە دە شەنەۋنىكتەر كوپ ۇزاماي بوستاندىققا شىقتى. پاراقورلاردىڭ قوينى-قونىشىن ءتىنتىپ، جالپى سانى 8 ملرد سومدى بيۋدجەتكە اۋداردىق»، – دەيدى جاپاروۆ.
...
قىرعىز باسشىسى ءوزىنىڭ ماڭايىنداعى كادرلارعا قاتىستى پىكىر ءبىلدىرىپتى. جاپاروۆ ولاردىڭ بۇرناعى ىس-ارەكەتى مەن رەپۋتاسياسىنا نازار اۋدارمايتىنىن ايتادى.
«توڭىرەگىمە توپتاسقان ازاماتتارعا قويار جالعىز تالابىم بار:
«وتكەن ومىرىڭە ۇڭىلمەيمىن، وپپونەنتىمنىڭ كومانداسىندا بولعانىڭ ءۇشىن قۋدالايتىن ادەتىم جوق.
ەڭ باستىسى ۇرلىق-قارلىق، بارىمتا-سىرىمتا دەگەن تۇسىنىكتەن اۋلاق بول. مەملەكەت مۇددەسى ءۇشىن قارەكەت قىل! ال ەگەر تۋرا جولدان تايساڭ، مەنەن اياۋشىلىق كۇتپە.
جەگەنىڭدى جەلكەڭنەن شىعارامىن. اباقتىعا قامالىپ ازاپ شەگەسىڭ»، - دەيمىن.
ءيا، كەيبىرىنىڭ وتكەنى بۇلىڭعىر، ابىروي-بەدەلى كۇماندى. ءبىراق، ىسكە كەلگەندە شيراق، باتىل قيمىلدايدى. مەملەكەتتىك جۇمىستىڭ ۇڭعىل-شۇڭعىلىن بەسكە بىلەدى. تاۋ قوپارىپ تاستايتىن قاۋقارى بار. تازا جىگىتتەردىڭ كەيبىرى بولبىر، سىلبىر. ولاردى كۇتىپ وتىراتىن ۋاقىت تاپشى. مەملەكەتتىك قىزمەت تاۋەكەلگە بارىپ، باتىل شەشىم قابىلداۋدى تالاپ ەتەدى»، – دەيدى جاپاروۆ.
قىرعىز باسشىسى جەمقورلىقتىڭ تامىرىنا بالتا شاۋىپ، كوررۋپسيانىڭ كوزىن قۇرتۋعا كىرىسكەلى وتىر.
"انتيكوردىڭ نازارىنا ىلىككەن شەنەۋنىكتەر جەگەنىن ەسەلەپ قايتارادى، حالىقتىڭ سوزىمەن ساناسپايتىن ەسكى جۇيە كەلمەسكە كەتتى"، – دەيدى ول.
