Astanada bes ai boiy bes juldyzdy qonaqúilerde dostarymen birge turyp, qymbat meiramhanalardan as iship, elitalyq erler dúkenderinen kiim satyp alyp júrgen alaiaqqa sot úkimi shyqty, dep habarlaidy Dalanews.kz.
Prokýratýra málimetinshe, aiyptalýshy banktiń atynan jalǵan tólem tapsyrmalaryn jasap, olardy bank qosymshasy arqyly jiberip otyrǵan. Alaida shotynda naqty aqsha bolmaǵan. Qyzmet kórsetýshi taraptar tólem qujattarynyń shynaiylyǵyn teksermei, oǵan taýar men qyzmetter kórsetken.
Sotta mysal retinde alaiaqtyń birneshe kúnge otel nómirin brondap, dostarymen birge turyp, as-sýǵa tapsyrys bergeni aityldy.
"Qonaqúi qyzmetkerleriniń senimin paidalanyp, jalǵan tólem tapsyrmalaryn usynǵan. Sonyń saldarynan jábirlenýshige jalpy 4,4 mln teńge kóleminde materialdyq shyǵyn keltirilgen", – delingen prokýratýra habarlamasynda.
Tergeý barysynda anyqtalǵan jalpy shyǵyn kólemi 8 mln teńgeden asqan.
Sotta aiyptalýshy óz kinásin tolyq moiyndap, mundai áreketke áleýmettik jelilerde áser qaldyrý úshin barǵanyn, ózin tabysty kásipker retinde kórsetý maqsatynda sándi ómir saltyn nasihattaǵanyn túsindirgen.
Nátijesinde sot ony 3 jylǵa bas bostandyǵynan aiyrý jazasyna kesti. Alaida úkim áli zańdy kúshine engen joq.
Prokýratýra azamattarǵa alaiaqtyqtan saqtanyp, kez kelgen tólem qujattarynyń túpnusqalyǵyn ýaqytynda tekserýge keńes beredi.
