استانادا بەس اي بويى بەس جۇلدىزدى قوناقۇيلەردە دوستارىمەن بىرگە تۇرىپ، قىمبات مەيرامحانالاردان اس ءىشىپ، ەليتالىق ەرلەر دۇكەندەرىنەن كيىم ساتىپ الىپ جۇرگەن الاياققا سوت ۇكىمى شىقتى، دەپ حابارلايدى Dalanews.kz.
پروكۋراتۋرا مالىمەتىنشە، ايىپتالۋشى بانكتىڭ اتىنان جالعان تولەم تاپسىرمالارىن جاساپ، ولاردى بانك قوسىمشاسى ارقىلى جىبەرىپ وتىرعان. الايدا شوتىندا ناقتى اقشا بولماعان. قىزمەت كورسەتۋشى تاراپتار تولەم قۇجاتتارىنىڭ شىنايىلىعىن تەكسەرمەي، وعان تاۋار مەن قىزمەتتەر كورسەتكەن.
سوتتا مىسال رەتىندە الاياقتىڭ بىرنەشە كۇنگە وتەل ءنومىرىن برونداپ، دوستارىمەن بىرگە تۇرىپ، اس-سۋعا تاپسىرىس بەرگەنى ايتىلدى.
"ءقوناقۇي قىزمەتكەرلەرىنىڭ سەنىمىن پايدالانىپ، جالعان تولەم تاپسىرمالارىن ۇسىنعان. سونىڭ سالدارىنان جابىرلەنۋشىگە جالپى 4،4 ملن تەڭگە كولەمىندە ماتەريالدىق شىعىن كەلتىرىلگەن"، – دەلىنگەن پروكۋراتۋرا حابارلاماسىندا.
تەرگەۋ بارىسىندا انىقتالعان جالپى شىعىن كولەمى 8 ملن تەڭگەدەن اسقان.
سوتتا ايىپتالۋشى ءوز كىناسىن تولىق مويىنداپ، مۇنداي ارەكەتكە الەۋمەتتىك جەلىلەردە اسەر قالدىرۋ ءۇشىن بارعانىن، ءوزىن تابىستى كاسىپكەر رەتىندە كورسەتۋ ماقساتىندا ءساندى ءومىر سالتىن ناسيحاتتاعانىن تۇسىندىرگەن.
ناتيجەسىندە سوت ونى 3 جىلعا باس بوستاندىعىنان ايىرۋ جازاسىنا كەستى. الايدا ۇكىم ءالى زاڭدى كۇشىنە ەنگەن جوق.
پروكۋراتۋرا ازاماتتارعا الاياقتىقتان ساقتانىپ، كەز كەلگەن تولەم قۇجاتتارىنىڭ ءتۇپنۇسقالىعىن ۋاقىتىندا تەكسەرۋگە كەڭەس بەرەدى.
