Sybaılas jemqorlyqqa qarsy is-qımyl ulttyq búrosy QR Investısıalar jáne damý mınıstrligi Geologıa jáne jer qoınaýyn paıdalaný komıtetiniń tóraǵasy B.Nurabaevty ustady. Oǵan qylmystyq top quryp, iri kólemde para alyp keldi degen aıyp taǵylyp otyr.
B.Nurabaev kásipkerlerden asa iri mólsherde para alyp otyrý úshin qylmystyq top qurǵan. Aqshany jer qoınaýyn paıdalaný týraly kelisimsharttar bekitýge suraǵan eken.
Atalǵan qylmystyq topqa Komıtet tóraǵasynyń senimdi ókilderi – orynbasary N.Qurbanov, «Qazjerqoınaýy» jáne «Ońtústikqazjerqoınaýy» basshylary A.Nurjaýbaı men E.Ádilhanov, ««Qazgeoınform» basshysy A.Ótegenov, Mańǵystaý oblystyq geologıa ıspeksıasynyń basshysy B.Mýtan, sondaı-aq Komıtettiń qurylymdyq bólimsheleriniń basshylary tartylǵan.
B.Nurabaevtyń senimdi ókili M.Ábdirashev qylmystyq top músheleriniń qoltyǵyna sý búrkip otyrǵan. Komıtet tóraǵasy synyptasy Ábdirashevpen dostyq baılanysta eken.
Búgin B.Nurabaev jer qoınaýyn memlekettik zertteýge kelisimshart bekitýge kómek kórsetkeni úshin «Aqmola Gold» JSHS ókilinen 20 myń AQSH dollary mólsherinde para alyp jatqan jerinen ustaldy.
Buǵan qosa, B.Nurabaev pen M.Ábdirashev para túrinde «AUDI Q7» markaly avtokólik pen Shymkenttegi quny 25 myń AQSH dollaryn quraıtyn 3 bólmeli páter alǵan.
B.Nurabaev alǵan paranyń jalpy somasy 100 myń AQSH dollarynan asty.
Sondaı-aq, B.Nurabaev pen N.Qurbanov qyzmettik ókilettigi men qupıa aqparatty paıdalanyp, perspektıvti ken oryndaryn enshiles kásiporyndarǵa zańsyz tirkep otyrǵan. Barlyǵy 30-dan astam ken orny tirkelipti.
B.Nurabaev, N.Qurbanov jáne qylmystyq toptyń taǵy on alty múshesi ustalyp, Astana İİD ýaqytsha ustaý abaqtysyna qamaldy.
Sotqa deıingi tergeý jalǵasyp jatyr.
Derekkóz: baq.kz
