Bir top buzaqynyń qolynan qaza tapqan Sherzat Bolattyń isi qoǵamda úlken rezonans týdyrdy. Qazirgi tańda órimdei jas jigittiń ómirin qiǵan kúdiktiler qamaýǵa alyndy. Osy tusta kópshilik Talǵardaǵy tragediianyń ashyq sotta qaralýyn talap etip otyr. Belgili zańger Aigúl Orynbek halyqtyń bulai dabyl qaǵýy oryndy ekenin aitady. Onyń pikirinshe, zań ústemdigi joǵary turatyn elde ashyq sot ótýi kerek. Dalanews.kz agenttigine bergen suqbatynda zańger istiń mán-jaiyna qatysty oiyn ortaǵa saldy.
“Keide adamdar ózderin qorǵaý nemese qylmystaryn jasyrý maqsatynda rezonansty ádeii qoldan jasap jatady. Sondyqtan sot ádildigine jáne zań ústemdigine halyqtyń kózin jetkizý úshin daý týdyrǵan qylmystyq ister ashyq sot otyrysynda qaralýy kerek. Halyq aiqailaǵannyń bári shyndyqty aityp júr degen túsinikten arylyp, aqparatty saralap úirenýimiz kerek. Sońǵy ýaqytta sybailastyq pen jemqorlyq beleń alǵan zamanda el arasynda zańsyz jabylyp ketken ister rezonans arqyly ǵana ádil sheshimin tabady degen túsinik qalyptasyp keledi. Bul - quzyrly organdardyń zańdy túrde jumys istemeýiniń kórinisi. Halyq durys dúnie surap otyr. Zań ústemdigi joǵary túratyn elde ashyq sot ótýi kerek. Budan halyqqa paidasy bolmasa, ziiany timeidi”, - deidi ol.
Aitýynsha, mundai sharalar jurttyń quqyqtyq saýatyn arttyryp, zańdy tereńirek túsinýine múmkindik beredi. Sonymen qatar quzyrly organdardyń bilek sybana jumys isteýine túrtki bolmaq.
“Qazirgi tańda oryn alǵan qylmysty tirketý de ońaiǵa soqpaidy. Oǵan sebep, prokýratýra atalǵan aryzdardy sotqa deiingi tergep-tekserýdiń biryńǵai tizimine qospaidy. Al mundai jaǵdaida tek rezonans týǵyzý qajet. Sebebi oryn alǵan qylmysty tirkemei, biznes kózine ainaldyryp alǵan quzyrly organdar bar. Dál osy Sherzattyń isinde de oqiǵa oryn alǵan kúni ony kórip turǵan azamattardyń qylmystyq jaýapkershiligi qozǵalmaǵan bolatyn. Tek rezonans oryn alǵannan keiin ǵana atalǵan azamattar QR QK-niń 434-baby (Qylmys týraly habarlamaý) boiynsha jaýapkershiligi qaraldy”, - deidi ol.
Zańger rezonans týdyrǵan iste jazyqsyz adamdardyń jaýapkershilikke tartylylyp ketpeýi de mańyzdy ekenin jetkizdi.
“Dál osy qaiǵyla oqiǵada eki áieldiń shyn máninde kinásiniń bar-joǵyn ashyp kórsetý qajet. Ata-anasynyń kózinshe jas balany aiaýsyz uryp-soqqan kúdiktiler zań turǵysynan qanshalyqty ádil jazasyn alatyny da osy ashyq sot otyrysynda málim bolady. Olardyń is áreketine ádil sot qana baǵa beredi”, - dep qosty ol.
Zańger de Sherzattyń isi QR Bas Prokýrorynyń tikelei baqylaýynda ekenin eske saldy.
“Bul isti on kúnnen keiin QR Bas Prokýrory baqylaýyna alyp, tiisti qadaǵalaý júrgizbegeni úshin Almaty oblysynyń prokýroryn qyzmetinen bosatty. Qazirgi ýaqytta atalǵan is boiynsha tergep-tekserý arnaiy qurylǵan jedel tergeý tobyna tapsyrylǵan. Qylmys jasaǵan tulǵalardyń barlyǵy qoǵamnan oqshaýlanyp, qamaýǵa alyndy. Sol sebepti tergeý amaldaryna qandai da bir jolmen qysym jasaýdyń qajeti joq dep bilemin”, - deidi zańger.
Aitýynsha, Sherzat Bolattyń ólimine qatysty rezonansqa tek oqiǵa kýágerleri ǵana emes, zańsyzdyqqa jol bergen jergilikti quzyrly organdar da jaýapty.
“Birinshiden, qylmystyń oryn alýyna jergilikti quzyrly organ qyzmetkerleri kináli. Bul jerde jergilikti politsiia, ýchaskilik inspektor jumys istemegen. Túngi ýaqytta dúkende alkogoldi ishimdik satýǵa kim ruqsat berdi? Sherzattyń ákesi túngi ýaqytta ishimdik satýǵa bolmaitynyn bile tura satqany zańsyz ekenin bilmedi emes, bildi. Zańǵa baǵynbaýynyń sońy osyndai qylmysqa ákelýi múmkin ekenin árbir qazaqstandyq túsinýi kerek. Bul elimizdiń basqa da óńirlerindegi quzyrly organdarǵa sabaq bolýy kerek”, - deidi ol.
Zańger el shýlap jatqan “Hýtor” bandasyna qatysty da oiyn ortaǵa saldy. Onyń pikirinshe, elde qylmystyq toptarǵa qarsy kúres osal ári halyq olar týraly bilse de aýyz ashýǵa tartynady.
“Mundai uiymdasqan toptar óńirimizdiń barlyq jerinde bar. Alaida ony halyq ashyp aitýǵa qorqady. Bundai toptardyń osy kúnge deiin bolýy, ol bizdiń IIM tarapynan, naqty aitqanda Uiymdasqan qylmystyq topqa qarsy kúres departamenti, basqarmalary tarapynan jumystyń tiisti deńgeide júrgizilmeitindiginde. Tipti, bir-birimen sybailasyp ketken dep te ashyq aita alamyn”, - dep sózin túiindedi zańger.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
15 qazanda Ishki ister vitse-ministri taǵy úsh kúdiktini ustaǵanyn málim etti.
Al 18 qazanda taǵy bir kúdiktini qolǵa túsirdi.
Sonymen qatar, Almaty oblystyq politsiia departamenti bastyǵynyń mindetin atqarýshy Shalqarov tóbelesten keiin qansha qarý tárkilengenin aitty.
Odan keiin Sherzattyń úiine kúzet qoiyldy.
Kóp uzamai marqum Sherzattyń úii órtendi.
