ءبىر توپ بۇزاقىنىڭ قولىنان قازا تاپقان شەرزات بولاتتىڭ ءىسى قوعامدا ۇلكەن رەزونانس تۋدىردى. قازىرگى تاڭدا ورىمدەي جاس جىگىتتىڭ ءومىرىن قيعان كۇدىكتەلەر قاماۋعا الىندى. وسى تۇستا كوپشىلىك تالعارداعى تراگەديانىڭ اشىق سوتتا قارالۋىن تالاپ ەتىپ وتىر. بەلگىلى زاڭگەر ايگۇل ورىنبەك حالىقتىڭ بۇلاي دابىل قاعۋى ورىندى ەكەنىن ايتادى. ونىڭ پىكىرىنشە، زاڭ ۇستەمدىگى جوعارى تۇراتىن ەلدە اشىق سوت ءوتۋى كەرەك. Dalanews.kz اگەنتتىگىنە بەرگەن سۇقباتىندا زاڭگەر ءىستىڭ ءمان-جايىنا قاتىستى ويىن ورتاعا سالدى.
“كەيدە ادامدار وزدەرىن قورعاۋ نەمەسە قىلمىستارىن جاسىرۋ ماقساتىندا رەزونانستى ادەيى قولدان جاساپ جاتادى. سوندىقتان سوت ادىلدىگىنە جانە زاڭ ۇستەمدىگىنە حالىقتىڭ كوزىن جەتكىزۋ ءۇشىن داۋ تۋدىرعان قىلمىستىق ىستەر اشىق سوت وتىرىسىندا قارالۋى كەرەك. حالىق ايقايلاعاننىڭ ءبارى شىندىقتى ايتىپ ءجۇر دەگەن تۇسىنىكتەن ارىلىپ، اقپاراتتى سارالاپ ۇيرەنۋىمىز كەرەك. سوڭعى ۋاقىتتا سىبايلاستىق پەن جەمقورلىق بەلەڭ العان زاماندا ەل اراسىندا زاڭسىز جابىلىپ كەتكەن ىستەر رەزونانس ارقىلى عانا ءادىل شەشىمىن تابادى دەگەن تۇسىنىك قالىپتاسىپ كەلەدى. بۇل - قۇزىرلى ورگانداردىڭ زاڭدى تۇردە جۇمىس ىستەمەۋىنىڭ كورىنىسى. حالىق دۇرىس دۇنيە سۇراپ وتىر. زاڭ ۇستەمدىگى جوعارى ءتۇراتىن ەلدە اشىق سوت ءوتۋى كەرەك. بۇدان حالىققا پايداسى بولماسا، زيانى تيمەيدى”، - دەيدى ول.
ايتۋىنشا، مۇنداي شارالار جۇرتتىڭ قۇقىقتىق ساۋاتىن ارتتىرىپ، زاڭدى تەرەڭىرەك تۇسىنۋىنە مۇمكىندىك بەرەدى. سونىمەن قاتار قۇزىرلى ورگانداردىڭ بىلەك سىبانا جۇمىس ىستەۋىنە تۇرتكى بولماق.
“قازىرگى تاڭدا ورىن العان قىلمىستى تىركەتۋ دە وڭايعا سوقپايدى. وعان سەبەپ، پروكۋراتۋرا اتالعان ارىزداردى سوتقا دەيىنگى تەرگەپ-تەكسەرۋدىڭ ءبىرىڭعاي تىزىمىنە قوسپايدى. ال مۇنداي جاعدايدا تەك رەزونانس تۋعىزۋ قاجەت. سەبەبى ورىن العان قىلمىستى تىركەمەي، بيزنەس كوزىنە اينالدىرىپ العان قۇزىرلى ورگاندار بار. ءدال وسى شەرزاتتىڭ ىسىندە دە وقيعا ورىن العان كۇنى ونى كورىپ تۇرعان ازاماتتاردىڭ قىلمىستىق جاۋاپكەرشىلىگى قوزعالماعان بولاتىن. تەك رەزونانس ورىن العاننان كەيىن عانا اتالعان ازاماتتار ق ر قك-نىڭ 434-بابى (قىلمىس تۋرالى حابارلاماۋ) بويىنشا جاۋاپكەرشىلىگى قارالدى”، - دەيدى ول.
زاڭگەر رەزونانس تۋدىرعان ىستە جازىقسىز ادامداردىڭ جاۋاپكەرشىلىككە تارتىلىلىپ كەتپەۋى دە ماڭىزدى ەكەنىن جەتكىزدى.
“ءدال وسى قايعىلا وقيعادا ەكى ايەلدىڭ شىن مانىندە كىناسىنىڭ بار-جوعىن اشىپ كورسەتۋ قاجەت. اتا-اناسىنىڭ كوزىنشە جاس بالانى اياۋسىز ۇرىپ-سوققان كۇدىكتىلەر زاڭ تۇرعىسىنان قانشالىقتى ءادىل جازاسىن الاتىنى دا وسى اشىق سوت وتىرىسىندا ءمالىم بولادى. ولاردىڭ ءىس ارەكەتىنە ءادىل سوت قانا باعا بەرەدى”، - دەپ قوستى ول.
زاڭگەر دە شەرزاتتىڭ ءىسى ق ر باس پروكۋرورىنىڭ تىكەلەي باقىلاۋىندا ەكەنىن ەسكە سالدى.
“بۇل ءىستى ون كۇننەن كەيىن ق ر باس پروكۋرورى باقىلاۋىنا الىپ، ءتيىستى قاداعالاۋ جۇرگىزبەگەنى ءۇشىن الماتى وبلىسىنىڭ پروكۋرورىن قىزمەتىنەن بوساتتى. قازىرگى ۋاقىتتا اتالعان ءىس بويىنشا تەرگەپ-تەكسەرۋ ارنايى قۇرىلعان جەدەل تەرگەۋ توبىنا تاپسىرىلعان. قىلمىس جاساعان تۇلعالاردىڭ بارلىعى قوعامنان وقشاۋلانىپ، قاماۋعا الىندى. سول سەبەپتى تەرگەۋ امالدارىنا قانداي دا ءبىر جولمەن قىسىم جاساۋدىڭ قاجەتى جوق دەپ بىلەمىن”، - دەيدى زاڭگەر.
ايتۋىنشا، شەرزات بولاتتىڭ ولىمىنە قاتىستى رەزونانسقا تەك وقيعا كۋاگەرلەرى عانا ەمەس، زاڭسىزدىققا جول بەرگەن جەرگىلىكتى قۇزىرلى ورگاندار دا جاۋاپتى.
“بىرىنشىدەن، قىلمىستىڭ ورىن الۋىنا جەرگىلىكتى قۇزىرلى ورگان قىزمەتكەرلەرى كىنالى. بۇل جەردە جەرگىلىكتى پوليسيا، ۋچاسكىلىك ينسپەكتور جۇمىس ىستەمەگەن. تۇنگى ۋاقىتتا دۇكەندە الكوگولدى ىشىمدىك ساتۋعا كىم رۇقسات بەردى؟ شەرزاتتىڭ اكەسى تۇنگى ۋاقىتتا ىشىمدىك ساتۋعا بولمايتىنىن بىلە تۇرا ساتقانى زاڭسىز ەكەنىن بىلمەدى ەمەس، ءبىلدى. زاڭعا باعىنباۋىنىڭ سوڭى وسىنداي قىلمىسقا اكەلۋى مۇمكىن ەكەنىن ءاربىر قازاقستاندىق ءتۇسىنۋى كەرەك. بۇل ەلىمىزدىڭ باسقا دا وڭىرلەرىندەگى قۇزىرلى ورگاندارعا ساباق بولۋى كەرەك”، - دەيدى ول.
زاڭگەر ەل شۋلاپ جاتقان “حۋتور” بانداسىنا قاتىستى دا ويىن ورتاعا سالدى. ونىڭ پىكىرىنشە، ەلدە قىلمىستىق توپتارعا قارسى كۇرەس وسال ءارى حالىق ولار تۋرالى بىلسە دە اۋىز اشۋعا تارتىنادى.
“مۇنداي ۇيىمداسقان توپتار ءوڭىرىمىزدىڭ بارلىق جەرىندە بار. الايدا ونى حالىق اشىپ ايتۋعا قورقادى. بۇنداي توپتاردىڭ وسى كۇنگە دەيىن بولۋى، ول ءبىزدىڭ ءىىم تاراپىنان، ناقتى ايتقاندا ۇيىمداسقان قىلمىستىق توپقا قارسى كۇرەس دەپارتامەنتى، باسقارمالارى تاراپىنان جۇمىستىڭ ءتيىستى دەڭگەيدە جۇرگىزىلمەيتىندىگىندە. ءتىپتى، بىر-بىرىمەن سىبايلاسىپ كەتكەن دەپ تە اشىق ايتا الامىن”، - دەپ ءسوزىن تۇيىندەدى زاڭگەر.
ەسكە سالايىق، بۇعان دەيىن تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.
كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.
قازىرگى تاڭدا كىنالى دەپ تانىلعان 7 ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
15 قازاندا ىشكى ىستەر ۆيسە-مينيسترى تاعى ءۇش كۇدىكتىنى ۇستاعانىن ءمالىم ەتتى.
ال 18 قازاندا تاعى ءبىر كۇدىكتىنى قولعا ءتۇسىردى.
سونىمەن قاتار، الماتى وبلىستىق پوليسيا دەپارتامەنتى باستىعىنىڭ مىندەتىن اتقارۋشى شالقاروۆ توبەلەستەن كەيىن قانشا قارۋ تاركىلەنگەنىن ايتتى.
ودان كەيىن شەرزاتتىڭ ۇيىنە كۇزەت قويىلدى.
كوپ ۇزاماي مارقۇم شەرزاتتىڭ ءۇيى ورتەندءى.
