Qazaqstanda memlekettik qyzmetkerler arasyndaǵy zańbuzýshylyqtar sany biylǵy jyldyń alǵashqy jartysynda birshama tómendedi. Biraq asa aýyr qylmystardyń úlesi, kerisinshe kúrt ósken. Mundai derekterdi QR Bas prokýratýrasynyń Quqyqtyq statistika jáne arnaiy esepke alý jónindegi komiteti komiteti jariialady, dep habarlaidy Dalanews.kz.
2025 jyldyń qańtar-maýsym ailarynda elimizdiń memlekettik qyzmetkerleri 249 quqyqbuzýshylyq jasaǵan. Bul ótken jyldyń dál osyndai kezeńimen salystyrǵanda 24,1%-ǵa az. Naqtyraq aitsaq, 236 qylmystyq quqyqbuzýshylyq jáne 13 ákimshilik teris qylyq tirkelgen. Byltyrǵy jartyjyldyqta 322 qylmystyq quqyqbuzýshylyq pen 6 ákimshilik teris qylyq bolǵan edi.
"Qylmystyń sany azaiǵanymen, salmaǵy artyp barady. Máselen, aýyr sanatqa jatatyn qylmystar sany 32,1%-ǵa azaiyp, 180 oqiǵany quraǵanymen, asa aýyr qylmystar sany 4,3 esege bir-aq kóbeigen (13 oqiǵa). Ortasha aýyrlyqtaǵy qylmystar eki ese azaiyp, 20 oqiǵa tirkelgen, al jeńil qylmystar, kerisinshe 35,3%-ǵa ósip, 23 oqiǵa bolǵan", dep jazady ranking.kz.
Jalpy, byltyr memlekettik qyzmetkerler 681 zańbuzýshylyq jasaǵan edi, bul aldyńǵy 2023 jylmen salystyrǵanda 39,3%-ǵa artyq bolatyn. Onyń ishinde 516-sy aýyr qylmys, 21-i asa aýyr qylmys sanalǵan.
Osy jartyjyldyqta tirkelgen zańbuzýshylyqtardyń basym bóligi – múliktik qylmystar (111 jaǵdai). Odan keiin sybailas jemqorlyqqa qatysty jáne memlekettik basqarý múddelerine qarsy qylmystar tur (102 jaǵdai).
"Sondai-aq, memlekettik qyzmetkerler tarapynan jeke tulǵaǵa qarsy – 7, basqarý tártibine qarsy – 7, kólik salasynda – 6, otbasy men kámeletke tolmaǵandarǵa qarsy – 5, aqparat jáne bailanys salasynda – 4, ekonomikalyq qyzmetke qatysty – 4, halyq densaýlyǵy men adamgershilikke qarsy – 3 quqyqbuzýshylyq tirkelgen. Memlekettik qyzmetkerler arasynda eń jii kezdesetin qylmys – para alý jáne ózgeniń senip tapsyrǵan múlkin iemdený nemese ysyrap etý (árqaisysy boiynsha 59 jaǵdai). Alaiaqtyq – 45, laýazymdyq ókilettigin teris paidalaný – 24 jaǵdai tirkelgen", delinedi maqalada.
Buǵan qosa, memlekettik qyzmetkerler tarapynan úsh ret adam uryp-soǵý jaǵdaiy, bir-birden kisi óltirýge oqtalý, jeńil dene jaraqatyn salý, kámeletke tolmaǵandarǵa qarsy zorlyq-zombylyq áreketteri de anyqtalǵan.
Sarapshylardyń aitýynsha, qylmys jasaýdyń basty sebebi – jeke bas paidasy. Sheneýnikterdiń zorlyq-zombylyq áreketterine qaraǵanda, sybailas jemqorlyq jáne múliktik qylmystarǵa jiirek barýy olardyń emotsionaldy áserden góri qarjylyq paidaǵa sanaly túrde umtylatynyn kórsetedi.
Demek, memlekettik qyzmetkerlerdiń zańbuzýshylyqqa barýynyń negizgi faktory – qyzmet babyn paidalanyp, paidaǵa keńelý. Qyzmettik resýrsty tabys kózi retinde qarastyrý áli kúnge deiin memlekettik apparattaǵy negizgi problema bolyp otyr.
