Qazaqstan Respýblikasynyń Prezidenti Qasym-Jomart Toqaevtyń Qytai Halyq Respýblikasyna resmi sapary aiasynda Ál-Farabi atyndaǵy Qazaq ulttyq ýniversiteti birqatar halyqaralyq mańyzdy kelisimderge qol jetkizdi.
Qol qoiý jáne qujattarmen almasý rásimi Beijiń qalasynda ótken Qazaqstan-Qytai iskerlik keńesiniń otyrysy barysynda júzege asty.
Atap aitqanda Ál-Farabi atyndaǵy QazUÝ men Qytaidyń Jiangsu Huibo Robotics Technology Co., Ltd. kompaniiasy arasynda «Tsifrlyq tehnologiialar jáne robototehnika» halyqaralyq institýty men Robototehnika ortalyǵyn QazUÝ bazasynda ashý rásimi ótti.
Bul mańyzdy kelisim Ál-Farabi atyndaǵy QazUÝ men Qytaidyń jetekshi joǵary tehnologiialyq kompaniiasy – Jiangsu Huibo Robotics Technology Co., Ltd. arasyndaǵy strategiialyq áriptestiktiń nátijesi bolyp tabylady.
Saltanatty ashylý rásimine Ál-Farabi atyndaǵy QazUÝ Basqarma Tóraǵasy – Rektor Janseiit Túimebaev pen Jiangsu Huibo Robotics Technology Co., Ltd. (Qytai) kompaniiasynyń ókili Li Ven (Li Wen) hanym qatysty.
Bul joba tsifrlyq transformatsiia, jasandy intellekt jáne robototehnika salalaryndaǵy zamanaýi bilim men ǵylymi jetistikterdi biriktire otyryp, jańa býyn injenerlerin daiarlaýǵa baǵyttalǵan. Taraptar bolashaqta ǵylym men bilim salasynda birlesken jobalardy júzege asyrý arqyly ózara tiimdi yntymaqtastyqty odan ári tereńdetýge nietti ekenderin rastady.
Sondai-aq Ál-Farabi atyndaǵy QazUÝ men «Iýan Chjen» investitsiialyq jáne damý kompaniiasy arasynda ushqyshsyz ushý apparattaryn (UUA) ázirleý, óndirý jáne engizý boiynsha strategiialyq áriptestik týraly kelisim jasaldy. Qujatqa Ál-Farabi atyndaǵy QazUÝ Basqarma Tóraǵasy – Rektor Janseiit Túimebaev jáne «Iýan Chjen» kompaniiasynyń bas direktory Tan Tsziýlýn qol qoidy.
2024 jyly Qazaqstanda qurylǵan «Iýan Chjen» kompaniiasy UUA salasyn «bilim – ǵylym – óndiris – satý» qaǵidatyna negizdelgen integratsiialyq úlgi boiynsha damytýdy kózdeidi. QazUÝ-men birlesken konsortsiým aiasynda kadr daiarlaý, ǵylymi-zertteý jáne tájiribelik-konstrýktorlyq jumystar (ǴZTKJ), seriialyq óndiris pen halyqaralyq naryqqa shyǵý baǵytynda júieli jumystar josparlanǵan.
Qos kelisim Qazaqstan men Qytai arasyndaǵy ǵylymi-innovatsiialyq yntymaqtastyqtyń jańa kezeńge qadam basqanyn kórsetedi.
Ál-Farabi atyndaǵy QazUÝ-dyń Baspasóz qyzmeti
