قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جۇڭگو حالىق رەسپۋبليكاسىنا رەسمي ساپارى اياسىندا ءال-فارابي اتىنداعى قازاق ۇلتتىق ۋنيۆەرسيتەتى ءبىرقاتار حالىقارالىق ماڭىزدى كەلىسىمدەرگە قول جەتكىزدى.

قول قويۋ جانە قۇجاتتارمەن الماسۋ ءراسىمى بەيجىڭ قالاسىندا وتكەن قازاقستان-قىتاي ىسكەرلىك كەڭەسىنىڭ وتىرىسى بارىسىندا جۇزەگە استى.

اتاپ ايتقاندا ءال-فارابي اتىنداعى قازۇۋ مەن قىتايدىڭ Jiangsu Huibo Robotics Technology Co.، Ltd. كومپانياسى اراسىندا «سيفرلىق تەحنولوگيالار جانە روبوتوتەحنيكا» حالىقارالىق ينستيتۋتى مەن روبوتوتەحنيكا ورتالىعىن قازۇۋ بازاسىندا اشۋ ءراسىمى ءوتتى.

بۇل ماڭىزدى كەلىسىم ءال-فارابي اتىنداعى قازۇۋ مەن قىتايدىڭ جەتەكشى جوعارى تەحنولوگيالىق كومپانياسى – Jiangsu Huibo Robotics Technology Co.، Ltd. اراسىنداعى ستراتەگيالىق ارىپتەستىكتىڭ ناتيجەسى بولىپ تابىلادى.

سالتاناتتى اشىلۋ راسىمىنە ءال-فارابي اتىنداعى قازۇۋ باسقارما ءتوراعاسى – رەكتور جانسەيىت تۇيمەبايەۆ پەن Jiangsu Huibo Robotics Technology Co.، Ltd. (جۇڭگو) كومپانياسىنىڭ وكىلى لي ۆەن (Li Wen) حانىم قاتىستى.

بۇل جوبا سيفرلىق ترانسفورماسيا، جاساندى ينتەللەكت جانە روبوتوتەحنيكا سالالارىنداعى زاماناۋي ءبىلىم مەن عىلىمي جەتىستىكتەردى بىرىكتىرە وتىرىپ، جاڭا بۋىن ينجەنەرلەرىن دايارلاۋعا باعىتتالعان. تاراپتار بولاشاقتا عىلىم مەن ءبىلىم سالاسىندا بىرلەسكەن جوبالاردى جۇزەگە اسىرۋ ارقىلى ءوزارا ءتيىمدى ىنتىماقتاستىقتى ودان ءارى تەرەڭدەتۋگە نيەتتى ەكەندەرىن راستادى.

سونداي-اق ءال-فارابي اتىنداعى قازۇۋ مەن «يۋان چجەن» ينۆەستيسيالىق جانە دامۋ كومپانياسى اراسىندا ۇشقىشسىز ۇشۋ اپپاراتتارىن (ۇۇا) ازىرلەۋ، ءوندىرۋ جانە ەنگىزۋ بويىنشا ستراتەگيالىق ارىپتەستىك تۋرالى كەلىسىم جاسالدى. قۇجاتقا ءال-فارابي اتىنداعى قازۇۋ باسقارما ءتوراعاسى – رەكتور جانسەيىت تۇيمەبايەۆ جانە  «يۋان چجەن» كومپانياسىنىڭ باس ديرەكتورى تان سزيۋلۋن قول قويدى.

2024 جىلى قازاقستاندا قۇرىلعان «يۋان چجەن» كومپانياسى ۇۇا سالاسىن «ءبىلىم – عىلىم – ءوندىرىس – ساتۋ» قاعيداتىنا نەگىزدەلگەن ينتەگراسيالىق ۇلگى بويىنشا دامىتۋدى كوزدەيدى. قازۇۋ-مەن بىرلەسكەن كونسورسيۋم اياسىندا كادر دايارلاۋ، عىلىمي-زەرتتەۋ جانە تاجىريبەلىك-كونسترۋكتورلىق جۇمىستار (عزتكج)، سەريالىق ءوندىرىس پەن حالىقارالىق نارىققا شىعۋ باعىتىندا جۇيەلى جۇمىستار جوسپارلانعان.

قوس كەلىسىم قازاقستان مەن جۇڭگو اراسىنداعى عىلىمي-يننوۆاسيالىق ىنتىماقتاستىقتىڭ جاڭا كەزەڭگە قادام باسقانىن كورسەتەدى.

ءال-فارابي اتىنداعى قازۇۋ-دىڭ باسپا ءسوز قىزمەتى