Ál-Farabi atyndaǵy Qazaq ulttyq ýniversitetinde ǵylymi jetistikterdi yntalandyrý maqsatynda oqý ornynyń ǵalymdaryna Scopus halyqaralyq derekter bazasynda jariialanǵan maqalalary úshin jalpy kólemi 145 million teńge syiaqy taǵaiyndaldy.
Ǵylymi jariialanymdarǵa syiaqy taǵaiyndaý júiesi QazUÝ-dyń ǵylymi-zertteý áleýetin arttyrý, ǵalymdardy bedeldi halyqaralyq jýrnaldarda belsendi jariialanýǵa yntalandyrý maqsatynda jyl saiyn júzege asyrylyp keledi.
Scopus – álemdegi eń bedeldi halyqaralyq derekqorlardyń biri. Onda jariialaný ǵalym eńbeginiń joǵary sapasyn, jańashyldyǵyn, onyń halyqaralyq deńgeide moiyndalýyn kórsetedi. Ýniversitet tarapynan kórsetilip otyrǵan úlken qoldaý ýniversitettiń álemdik reitingterdegi ornyn nyǵaitýǵa jáne ǵylymi bedelin arttyrýǵa, sonymen qatar ǵylymi ortadaǵy ádil básekelestikti qalyptastyryp, zertteý sapasyn jańa deńgeige kóterýge eleýli úles qosary sózsiz.
Syiaqy iegerleri qatarynda jaratylystaný, tehnikalyq, áleýmettik jáne gýmanitarlyq ǵylym salalarynyń ókilderi bar. Biylǵy jyly ýniversitet ǵalymdarynyń halyqaralyq jariialanym belsendiligi aitarlyqtai artyp otyr. Birqatar zertteýler sheteldik jetekshi ýniversitettermen jáne ǵylymi ortalyqtarmen birlesip oryndalǵan, bul eńbekter qazirgi tańdaǵy ózekti máselelerdi sheshýge baǵyttalǵan.
2024 jyly QazUÝ ǵalymdary 1 591 maqala jariialady. Onyń ishinde 1 276-sy — sholý jáne zertteý maqalalary, al shamamen 400-ge jýyq maqala 1–2 kvartildegi jáne protsentili 50-den asatyn joǵary reitingti jýrnaldarda jaryq kórdi. Bul jariialanymdar tek sheteldik ǵylymi basylymdarda ǵana emes, QazUÝ-dyń óz ǵylymi jýrnaldarynda da jariialandy.
Qazirgi ýaqytta ýniversitette 26 ǵylymi jýrnal shyǵarylady, onyń beseýi Scopus bazasyna, al altaýy Web of Science bazasynda indeksteledi. QazUÝ ǵylymi jýrnaldarynyń deńgeii jyl saiyn ósip keledi.
Aldaǵy ýaqytta Scopus derekqoryndaǵy jariialanym sapasyn arttyrý maqsatynda arnaiy treningter men ǵylymi seminarlardy jalǵastyrý josparlanýda. Ǵalymdarǵa maqalalaryn joǵary reitingti jýrnaldarǵa joldaý úshin ádistemelik jáne redaktsiialyq qoldaý kórsetilýde. Sonymen qatar, jas zertteýshilerdiń ǵylymi belsendiligin qoldaý úshin granttar men stipendiialar baǵdarlamasy júzege asyrylýda. QazUÝ aldaǵy ýaqytta jariialanymdar sanyn jáne dáieksóz kórsetkishterin ulǵaitýdy kózdep otyr.
Scopus-ta jariialanǵan ár maqala – ýniversitet ǵalymdarynyń kásibi biliktiligi men qajyrly eńbeginiń nátijesi.
Ál-Farabi atyndaǵy QazUÝ-dyń Baspasóz qyzmeti
