ءال-فارابي اتىنداعى قازاق ۇلتتىق ۋنيۆەرسيتەتىندە عىلىمي جەتىستىكتەردى ىنتالاندىرۋ ماقساتىندا وقۋ ورنىنىڭ عالىمدارىنا Scopus حالىقارالىق دەرەكتەر بازاسىندا جاريالانعان ماقالالارى ءۇشىن جالپى كولەمى 145 ميلليون تەڭگە سىياقى تاعايىندالدى.
عىلىمي جاريالانىمدارعا سىياقى تاعايىنداۋ جۇيەسى قازۇۋ-دىڭ عىلىمي-زەرتتەۋ الەۋەتىن ارتتىرۋ، عالىمداردى بەدەلدى حالىقارالىق جۋرنالداردا بەلسەندى جاريالانۋعا ىنتالاندىرۋ ماقساتىندا جىل سايىن جۇزەگە اسىرىلىپ كەلەدى.
Scopus – الەمدەگى ەڭ بەدەلدى حالىقارالىق دەرەكقورلاردىڭ ءبىرى. وندا جاريالانۋ عالىم ەڭبەگىنىڭ جوعارى ساپاسىن، جاڭاشىلدىعىن، ونىڭ حالىقارالىق دەڭگەيدە مويىندالۋىن كورسەتەدى. ۋنيۆەرسيتەت تاراپىنان كورسەتىلىپ وتىرعان ۇلكەن قولداۋ ۋنيۆەرسيتەتتىڭ الەمدىك رەيتينگتەردەگى ورنىن نىعايتۋعا جانە عىلىمي بەدەلىن ارتتىرۋعا، سونىمەن قاتار عىلىمي ورتاداعى ءادىل باسەكەلەستىكتى قالىپتاستىرىپ، زەرتتەۋ ساپاسىن جاڭا دەڭگەيگە كوتەرۋگە ەلەۋلى ۇلەس قوسارى ءسوزسىز.
سىياقى يەگەرلەرى قاتارىندا جاراتىلىستانۋ، تەحنيكالىق، الەۋمەتتىك جانە گۋمانيتارلىق عىلىم سالالارىنىڭ وكىلدەرى بار. بيىلعى جىلى ۋنيۆەرسيتەت عالىمدارىنىڭ حالىقارالىق جاريالانىم بەلسەندىلىگى ايتارلىقتاي ارتىپ وتىر. ءبىرقاتار زەرتتەۋلەر شەتەلدىك جەتەكشى ۋنيۆەرسيتەتتەرمەن جانە عىلىمي ورتالىقتارمەن بىرلەسىپ ورىندالعان، بۇل ەڭبەكتەر قازىرگى تاڭداعى وزەكتى ماسەلەلەردى شەشۋگە باعىتتالعان.
2024 جىلى قازۇۋ عالىمدارى 1 591 ماقالا جاريالادى. ونىڭ ىشىندە 1 276-سى — شولۋ جانە زەرتتەۋ ماقالالارى، ال شامامەن 400-گە جۋىق ماقالا 1–2 كۆارتيلدەگى جانە پروسەنتيلى 50-دەن اساتىن جوعارى رەيتينگتى جۋرنالداردا جارىق كوردى. بۇل جاريالانىمدار تەك شەتەلدىك عىلىمي باسىلىمداردا عانا ەمەس، قازۇۋ-دىڭ ءوز عىلىمي جۋرنالدارىندا دا جاريالاندى.
قازىرگى ۋاقىتتا ۋنيۆەرسيتەتتە 26 عىلىمي جۋرنال شىعارىلادى، ونىڭ بەسەۋى Scopus بازاسىنا، ال التاۋى Web of Science بازاسىندا يندەكستەلەدى. قازۇۋ عىلىمي جۋرنالدارىنىڭ دەڭگەيى جىل سايىن ءوسىپ كەلەدى.
الداعى ۋاقىتتا Scopus دەرەكقورىنداعى جاريالانىم ساپاسىن ارتتىرۋ ماقساتىندا ارنايى ترەنينگتەر مەن عىلىمي سەمينارلاردى جالعاستىرۋ جوسپارلانۋدا. عالىمدارعا ماقالالارىن جوعارى رەيتينگتى جۋرنالدارعا جولداۋ ءۇشىن ادىستەمەلىك جانە رەداكسيالىق قولداۋ كورسەتىلۋدە. سونىمەن قاتار، جاس زەرتتەۋشىلەردىڭ عىلىمي بەلسەندىلىگىن قولداۋ ءۇشىن گرانتتار مەن ستيپەنديالار باعدارلاماسى جۇزەگە اسىرىلۋدا. قازۇۋ الداعى ۋاقىتتا جاريالانىمدار سانىن جانە دايەكسوز كورسەتكىشتەرىن ۇلعايتۋدى كوزدەپ وتىر.
Scopus-تا جاريالانعان ءار ماقالا – ۋنيۆەرسيتەت عالىمدارىنىڭ كاسىبي بىلىكتىلىگى مەن قاجىرلى ەڭبەگىنىڭ ناتيجەسى.
ءال-فارابي اتىنداعى قازۇۋ-دىڭ باسپا ءسوز قىزمەتى
