El Táýelsizdiginiń 30 jyldyǵy qarsańynda úlken ómirge qadam basqan jas órenderdi QazUÝ-dyń Basqarma Tóraǵasy – Rektory Janseıit Túımebaev saltanatty jaǵdaıda quttyqtady. Egemen elimizde jastardyń tárbıesi men bilimine aıryqsha mańyz beriletinin aıta kele, rektor Elbasy Nursultan Nazarbaevtyń «Erkin elde ósken urpaqtyń rýhy árdaıym bıik bolýy tıis. Jastary – jalyn júrekti, órshil namysty, bıik rýhty bolsa – ol eldiń eńsesi de bıik bolady» degen qanatty sózderin mysalǵa keltirdi. Jastarǵa qarata eldiń bolashaǵy men ıgiligi bilimdi urpaqtyń qolynda ekenin basa aıtty.
Memleket basshysy Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty Qazaqstan halqyna arnalǵan bıylǵy Joldaýynda ár azamattyń Táýelsizdik ıgiligin sezine alýyna, onyń ishinde jastardyń bolashaqqa nyq senimmen qaraýyna mańyz bergenin atap ótti.
Sondaı-aq oqý ornynyń basshysy qarashańyraqta bilim, ǵylym, óner jáne sportpen aınalysý úshin zaman talaptaryna saı barlyq jaǵdaı jasalǵanyn aıtyp, 1 qyrkúıekten bastap shákirtaqynyń 20 paıyzǵa óskenin habarlady.
Stýdentter óz kezeginde elge, jerge, tilge degen qurmetti bıik ustap, Ál-Farabı atyndaǵy QazUÝ stýdenti degen atqa laıyq bolýǵa jáne básekege qabiletti maman bolyp, elimizdiń kórkeıýi úshin adal qyzmet etýge ant berdi.
Mehanıka-matematıka fakúltetiniń 1-kýrs stýdenti Shapaǵat Músirepova: «Elimizdiń eń úzdik ýnıversıtetiniń bilim grantyna ıe bolǵanyma asa qýanyshtymyn. QazUÝ stýdenti ataný men úshin úlken mártebe. Munda kelgeli boıymdy erekshe sezip bılep, qalashyqtyń ásem kelbetine tańdanýmen kelem. Úlken jaýapkershilikti sezinemin jáne senimdi aqtaýǵa bar kúsh-jigerimdi salamyn» dep óz áserimen bólisti.
Merekelik jıyn sońynda bilimgerler «Gaýdeamýs» halyqaralyq stýdentter ánuranyn hormen shyrqap, estelik sýretke tústi.
