ەل تاۋەلسىزدىگىنىڭ 30 جىلدىعى قارساڭىندا ۇلكەن ومىرگە قادام باسقان جاس ورەندەردى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ سالتاناتتى جاعدايدا قۇتتىقتادى. ەگەمەن ەلىمىزدە جاستاردىڭ تاربيەسى مەن بىلىمىنە ايرىقشا ماڭىز بەرىلەتىنىن ايتا كەلە، رەكتور ەلباسى نۇرسۇلتان نازاربايەۆتىڭ «ەركىن ەلدە وسكەن ۇرپاقتىڭ رۋحى ءاردايىم بيىك بولۋى ءتيىس. جاستارى – جالىن جۇرەكتى، ءورشىل نامىستى، بيىك رۋحتى بولسا – ول ەلدىڭ ەڭسەسى دە بيىك بولادى» دەگەن قاناتتى سوزدەرىن مىسالعا كەلتىردى. جاستارعا قاراتا ەلدىڭ بولاشاعى مەن يگىلىگى ءبىلىمدى ۇرپاقتىڭ قولىندا ەكەنىن باسا ايتتى.
مەملەكەت باسشىسى قاسىم-جومارت توقايەۆ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا ارنالعان بيىلعى جولداۋىندا ءار ازاماتتىڭ تاۋەلسىزدىك يگىلىگىن سەزىنە الۋىنا، ونىڭ ىشىندە جاستاردىڭ بولاشاققا نىق سەنىممەن قاراۋىنا ماڭىز بەرگەنىن اتاپ ءوتتى.
سونداي-اق وقۋ ورنىنىڭ باسشىسى قاراشاڭىراقتا ءبىلىم، عىلىم، ونەر جانە سپورتپەن اينالىسۋ ءۇشىن زامان تالاپتارىنا ساي بارلىق جاعداي جاسالعانىن ايتىپ، 1 قىركۇيەكتەن باستاپ شاكىرتاقىنىڭ 20 پايىزعا وسكەنىن حابارلادى.
ستۋدەنتتەر ءوز كەزەگىندە ەلگە، جەرگە، تىلگە دەگەن قۇرمەتتى بيىك ۇستاپ، ءال-فارابي اتىنداعى قازۇۋ ستۋدەنتى دەگەن اتقا لايىق بولۋعا جانە باسەكەگە قابىلەتتى مامان بولىپ، ەلىمىزدىڭ كوركەيۋى ءۇشىن ادال قىزمەت ەتۋگە انت بەردى.
مەحانيكا-ماتەماتيكا فاكۋلتەتىنىڭ 1-كۋرس ستۋدەنتى شاپاعات مۇسىرەپوۆا: «ەلىمىزدىڭ ەڭ ۇزدىك ۋنيۆەرسيتەتىنىڭ ءبىلىم گرانتىنا يە بولعانىما اسا قۋانىشتىمىن. قازۇۋ ستۋدەنتى اتانۋ مەن ءۇشىن ۇلكەن مارتەبە. مۇندا كەلگەلى بويىمدى ەرەكشە سەزىپ بيلەپ، قالاشىقتىڭ اسەم كەلبەتىنە تاڭدانۋمەن كەلەم. ۇلكەن جاۋاپكەرشىلىكتى سەزىنەمىن جانە سەنىمدى اقتاۋعا بار كۇش-جىگەرىمدى سالامىن» دەپ ءوز اسەرىمەن ءبولىستى.
مەرەكەلىك جيىن سوڭىندا بىلىمگەرلەر «گاۋدەامۋس» حالىقارالىق ستۋدەنتتەر ءانۇرانىن حورمەن شىرقاپ، ەستەلىك سۋرەتكە ءتۇستى.
