Ál-Farabi atyndaǵy Qazaq ulttyq ýniversitetinde «Qytaida bilim alý jáne qytai tili emtihany (HSK)» taqyrybyndaǵy II Qytai ýniversitetteriniń kórmesi ótti. Aýqymdy is-sharany Halyqaralyq qytai tili test ortalyǵy men QazUÝ birlesip uiymdastyrdy,- dep habarlaidy Dalanews.kz
Munda qytailyq kóshbasshy jáne bedeldi 40-qa jýyq joǵary oqý oryndary kelýshilerge ýniversitet týraly tolyq aqparat berýge múmkindik aldy. Sonymen qatar jastarǵa halyqaralyq baǵdarlamalar arqyly oqýǵa túsý múmkindikterin tanystyryp, qabyldaý erejelerin túsindirdi. Buǵan qosymsha, Qytai ýniversitetteri bilikti jáne qytai tilin meńgergen mamandardy jumysqa shaqyrdy.
Kórmeniń ashylý saltanatyna QazUÝ-dyń Basqarma Tóraǵasy – Rektor Janseiit Túimebaev, Almatydaǵy QHR Bas konsýldyǵynyń bilim jónindegi konsýly Hýan Siaomin, Qytai tilin testileý ortalyǵy direktorynyń orynbasary Liý Siao Long, Qytai ýniversitetteriniń ókilderi, oqytýshy-professorlar quramy men bilim alýshy jastar qatysty.
Sharada QazUÝ basshysy Janseiit Túimebaev sóz sóilep, búgingi is-sharanyń mańyzdylyǵyna toqtaldy. Óz sózinde rektor QazUÝ-da ekinshi ret ótip jatqan kórme qos memleket arasyndaǵy ǵylym jáne joǵary bilim salasyndaǵy seriktestikti odan ári tereńdetýge tyń serpin beretinin atap ótti.
«Memleket basshysy Qasym-Jomart Toqaev óz sózinde: «Qytai – biz úshin tatý kórshi ǵana emes, jaqyn dosymyz ári senimdi seriktesimiz. Búginde berik dostyqqa negizdelgen qazaq-qytai qarym-qatynasy buryn-sońdy bolmaǵan qarqynmen damyp kele jatyr», – dep atap ótken bolatyn. Búginde QazUÝ-da 1440 qytailyq stýdent bilim alady. Sondai-aq Qytaidyń 65 joǵary oqý ornymen áriptestik bailanys ornatylyp, ortaq jobalar júzege asyrylýda. Sońǵy eki jylda qytailyq áriptestermen birlesip 15-ke jýyq ǵylymi ortalyqtar men zerthanalar ashyldy. Bul baǵyttaǵy jumystar aldaǵy ýaqytta da damitynyna senimdimin. Búgingi kórme QazUÝ men Qytai ýniversitetteri arasyndaǵy yntymaqtastyqty nyǵaitýdyń kórinisi», – dedi rektor.
Óz kezeginde Almatydaǵy QHR Bas konsýldyǵynyń bilim jónindegi konsýly Hýan Siaomin tehnologiiany igerý jáne qytai tilin jetik meńgerý úshin qazaq stýdentterin Qytaida bilim alýǵa shaqyrdy.
«Búgin – BUU-nyń bekitýi boiynsha halyqaralyq qytai tili kúni. Osy turǵyda aitýly kúni Qytai ýniversitetteriniń kórmesi QazUÝ-da ótkeni airyqsha mánge ie. Bul bastama qazaq-qytai arasynda stýdentter almasýǵa, tájiribemen bólisýge múmkindik beredi», – dedi konsýl orynbasary.
Kórmeniń ashylýynda sóz alǵan Qytai tilin testileý ortalyǵy direktorynyń orynbasary Liý Siao Long aýqymdy sharany uiymdastyrýǵa járdemdeskeni úshin QazUÝ basshylyǵy men ujymyna zor rizashylyǵyn jetkizdi.
«Bul kórme qazaqstandyq jastar úshin Qytaida bilim alý men qytai tilinde jumys isteý boiynsha bedeldi ári ártaraptandyrylǵan platforma bolmaq. Biz ýniversitet arasyndaǵy almasýlardy jalǵastyryp, mádeni bailanys pen innovatsiialyq yntymaqtastyqty qatar damytatyn jańa jobalardy júzege asyrýǵa niettimiz», – dedi Liý Siao Long.
Jiyn sońynda qatysýshylar kórmeni aralady.
