QazUÝ-da Qazaqstan ǵalymdarynyń jobalary biznes ókilderine tanystyryldy
Kórmeniń basty maqsaty – ǵylym-bilim-óndiris arasynda bailanys arttyrý, ǵylymdy biznes arqyly damytý.
Aýqymdy sharaǵa QR Ǵylym jáne joǵary bilim ministri Saiasat Nurbek, Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev, Almaty qalasy ákiminiń orynbasary Álisher Ábdiqadyrov, «Atameken» ulttyq kásipkerler palatasy basqarma tóraǵasynyń birinshi orynbasary Maqsat Qiqymov jáne ózge de belgili tulǵalar qatysty.
Kórmede Ál-Farabi atyndaǵy QazUÝ, L.N.Gýmilev atyndaǵy EUÝ, Q.Sátbaev atyndaǵy QazUTÝ, S.Asfendiiarov atyndaǵy QazUMÝ, M.Áýezov atyndaǵy OQMÝ, Almaty tehnologiialyq ýniversiteti, M.Aithojin atyndaǵy Molekýliarlyq biologiia jáne biohimiia institýty, Iadrolyq fizika institýty jáne ózge de JOO men ǵylymi institýt ǵalymdary óz jobalaryn bolashaq biznes-áriptester nazaryna usynýǵa múmkindik aldy.
Ál-Farabi atyndaǵy QazUÝ-dyń biologiia fakýltetiniń ǵalymdary mikrobaldyrlar negizindegi biologiialyq belsendi qospalar jobasyn usyndy. Joba jetekshisi, professor Bolathan Zaiadan jobanyń basty jańalyǵy kóptegen salaǵa qajetti qaýipsiz biopreparattar daiyndaý ekenin alǵa tartty.
Ǵalymnyń aitýynsha, fototrofty mikroorganizmder tobyna kiretin mikrobaldyrlar men tsianobakteriialar – kóptegen qundy biologiialyq belsendi qosylystardyń kózi. Sondai-aq agrarlyq, meditsinalyq, kosmetikalyq jáne taǵam ónerkásibinde qaýipsiz biopreparattar alýǵa úlken qyzyǵýshylyq týdyrady.
Sonymen qatar QazUÝ-dyń jas ǵalymy Asan Ábdirahym qyzmetkerlerdiń qatty sharshaýyn boldyrmaýǵa arnalǵan «GoDays» startapy jaily aitty. Analitikalyq qural jasandy intellektige negizdelgen. «Joba emotsionaldyq sharshaýdyń aldyn alýǵa jáne jumys júktemesi men kestesin qyzmetkerdiń eń tiimdi jumys ýaqytyna sáikes retteýge kómektesedi», – deidi izdenýshi.
Kórmeden soń ǵylym men biznestiń tabysty áriptestigi máselelerine arnalǵan plenarlyq otyrys ótti. Sonymen qatar jiyn aiasynda «Qazirgi jaǵdaidaǵy ǵylym men biznes integratsiiasy» taqyrybyndaǵy dóńgelek ústel uiymdastyryldy.
