Ál-Farabı atyndaǵy QazUÝ-da Digital Farabi halyqaralyq forýmy aıasynda bos jumys oryndarynyń jármeńkesi ótti.
Jármeńkege Halyk bank, «Beam.kz», Bank Sentr Kredıt, Kaspi Bank jáne basqa da jalpy sany 35-ten astam iri kompanıalar men uıymdar qatysty. Jumys berýshiler stýdentterge ártúrli saladaǵy bos jumys oryndarynyń keń tańdaýyn usyndy.
«Búgin ýnıversıtetimizde dástúrge aınalǵan bos jumys oryndary jármeńkesi ótýde. Árbir kompanıa ókilderi ózderiniń basty qyzmeti, qurylymy jáne ujymy jaıly tolyq maǵlumat berýde. Bul óz kezeginde stýdent jastardy yntalandyryp, olardy eńbek naryǵyna baǵdarlaýǵa kómektesedi. Jármeńke jastarǵa ártúrli uıymdarda tájirıbeden, taǵylymdamadan ótýge ári jumysqa ornalasýǵa múmkindik beredi jáne mundaǵy bos jumys oryndaryn tańdaý aýqymy da óte keń», – dedi mehanıka-matematıka fakúltetiniń mamany Smaıyl Erkebulan.
«Jármeńkege bıyl alǵash kelýim. İri uıymdar men kompanıalardyń qatysqany meni qýantýda. Bul kóptegen stýdentter úshin kásibı joldy bastaýǵa sátti qadam jasaý dep esepteımin. Dál qazirgi ýaqytta atqaryp júrgen jumysym bar, biraq soǵan qaramastan, aldaǵa ýaqytta basqa salada da ózimdi synap kórsem degen nıetpen búgingi jármeńkege arnaıy keldim», – deıdi mehanıka-matematıka fakúltetiniń magıstranty Yrysdáýlet Qarsybaıuly.
«Beam.kz» kompanıasy – stýdentter men túlekterdi jumyspen qamtýǵa, ıaǵnı jas mamandarǵa negizdelgen platforma. Platformanyń basqalardan ereksheligi – bizdiń kompanıa únemi bilim ordalarymen tikeleı birlese jumys jasaı otyryp, jastardyń tájirıbesi bar-joǵyna qaramastan, olarǵa birinshi kezekte arnaıy kýrstar usynady jáne jumysty oqýmen qatar alyp júrýge múmkindik beredi», – deıdi «Beam.kz» kompanıasyndaǵy satý bóliminiń jetekshisi Darıa Nurǵajyqyzy.
Sondaı-aq jumys berýshiler jármeńkede jańa jumys kúshin tabýdyń naqty múmkindigin kóredi, sebebi ekonomıka, qarjy salasyndaǵy mamandar, zańgerler, IT-býhgalterler jáne basqa da mamandar árdaıym naryqta suranysta bolady.
