ءال-فارابي اتىنداعى قازۇۋ-دا Digital Farabi حالىقارالىق فورۋمى اياسىندا بوس جۇمىس ورىندارىنىڭ جارمەڭكەسى ءوتتى.

جارمەڭكەگە Halyk bank، «Beam.kz»، بانك سەنتر كرەديت، Kaspi Bank جانە باسقا دا جالپى سانى 35-تەن استام ءىرى كومپانيالار مەن ۇيىمدار قاتىستى. جۇمىس بەرۋشىلەر ستۋدەنتتەرگە ءارتۇرلى سالاداعى بوس جۇمىس ورىندارىنىڭ كەڭ تاڭداۋىن ۇسىندى.

«بۇگىن ۋنيۆەرسيتەتىمىزدە داستۇرگە اينالعان بوس جۇمىس ورىندارى جارمەڭكەسى وتۋدە. ءاربىر كومپانيا وكىلدەرى وزدەرىنىڭ باستى قىزمەتى، قۇرىلىمى جانە ۇجىمى جايلى تولىق ماعلۇمات بەرۋدە. بۇل ءوز كەزەگىندە ستۋدەنت جاستاردى ىنتالاندىرىپ، ولاردى ەڭبەك نارىعىنا باعدارلاۋعا كومەكتەسەدى. جارمەڭكە جاستارعا  ءارتۇرلى ۇيىمداردا تاجىريبەدەن، تاعىلىمدامادان وتۋگە ءارى جۇمىسقا ورنالاسۋعا مۇمكىندىك بەرەدى جانە مۇنداعى بوس جۇمىس ورىندارىن تاڭداۋ اۋقىمى دا وتە كەڭ»، – دەدى مەحانيكا-ماتەماتيكا فاكۋلتەتىنىڭ مامانى سمايىل ەركەبۇلان.

«جارمەڭكەگە بيىل العاش كەلۋىم. ءىرى ۇيىمدار مەن كومپانيالاردىڭ قاتىسقانى مەنى قۋانتۋدا. بۇل كوپتەگەن ستۋدەنتتەر ءۇشىن كاسىبي جولدى باستاۋعا ءساتتى قادام جاساۋ دەپ ەسەپتەيمىن. ءدال قازىرگى ۋاقىتتا اتقارىپ جۇرگەن جۇمىسىم بار، ءبىراق سوعان قاراماستان، الداعا ۋاقىتتا باسقا سالادا دا ءوزىمدى سىناپ كورسەم دەگەن نيەتپەن بۇگىنگى جارمەڭكەگە ارنايى كەلدىم»، – دەيدى مەحانيكا-ماتەماتيكا فاكۋلتەتىنىڭ ماگيسترانتى ىرىسداۋلەت قارسىباي ۇلى.

«Beam.kz» كومپانياسى – ستۋدەنتتەر مەن تۇلەكتەردى جۇمىسپەن قامتۋعا، ياعني جاس ماماندارعا نەگىزدەلگەن پلاتفورما. پلاتفورمانىڭ باسقالاردان ەرەكشەلىگى – ءبىزدىڭ كومپانيا ۇنەمى ءبىلىم وردالارىمەن تىكەلەي بىرلەسە جۇمىس جاساي وتىرىپ، جاستاردىڭ تاجىريبەسى بار-جوعىنا قاراماستان، ولارعا ءبىرىنشى كەزەكتە ارنايى كۋرستار ۇسىنادى جانە جۇمىستى وقۋمەن قاتار الىپ جۇرۋگە مۇمكىندىك بەرەدى»، – دەيدى «Beam.kz» كومپانياسىنداعى ساتۋ ءبولىمىنىڭ جەتەكشىسى داريا نۇرعاجى قىزى.

سونداي-اق جۇمىس بەرۋشىلەر جارمەڭكەدە جاڭا جۇمىس كۇشىن تابۋدىڭ ناقتى مۇمكىندىگىن كورەدى، سەبەبى ەكونوميكا، قارجى سالاسىنداعى ماماندار، زاڭگەرلەر، IT-بۋحگالتەرلەر جانە باسقا دا ماماندار ءاردايىم نارىقتا سۇرانىستا بولادى.