QazUÝ-da Asqar Aqaevpen kezdesý-dáris ótti
Dáriske ýniversitet basshylyǵy, ǵalymdar men oqytýshy-professorlar quramy jáne bilim alýshy jastar qatysty.
Kezdesýdi ashqan Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev qatysýshylarǵa bir jyl buryn akademik Asqar Aqaev ýniversitette eki kún qatarynan kóshbasshylyq dáris oqyǵanyn eske saldy.
- Igi dástúrdi jalǵastyryp, Asqar Aqaiuly sizdermen taǵy da kezdesýge arnaiy keldi. Akademik Asqar Aqaev álemdegi saiasi, ekonomikalyq jáne áleýmettik máselelerdi taldaý men boljaý boiynsha óziniń ǵylymi mektebin qurdy. Kúrdeli júieler dinamikasyn matematikalyq modeldeý salasyndaǵy álemge áigili maman, Nobel beibitshilik syilyǵynyń aziialyq balamasy sanalatyn Gýzi Beibitshilik syilyǵymen marapattalǵan. 2021 jyly professor Asqar Aqaiulyna «kúrdeli júieler dinamikasyn matematikalyq modeldeý salasyndaǵy birinshi dárejeli ǵylymi jetistikteri» úshin I-dárejeli bedeldi M.Lomonosov syilyǵy berildi, - dep atap ótti ýniversitet basshysy.
QazUÝ basshylyǵyna airyqsha alǵys bildirgen Asqar Aqaev:
- Búginde Ál-Farabiatyndaǵy Qazaq ulttyq ýniversitetiniń órkendep kele jatqanyn kórip otyrmyz. Biz búgin ýniversitettiń nanospýtnikter jasalatyn zerthanalarynyń birine bardyq. Tsifrlyq dáýir STEAM-bilim berý salasynda joǵary bilikti mamandardy talap etedi. Osy baǵyttaǵy tehnoparktiń negizi QazUÝ-da qalanǵany qýantady, - dep atap ótti.
Óz kezeginde Asqar Aqaev 2006 jyly Braziliia, Resei, Úndistan, Qytai syndy 4 eldi biriktirgen BRIKS memleketaralyq uiymy týraly aitty. Keiin bul uiymǵa Ońtústik Afrika Respýblikasy da qosylǵanyn atap ótti. Bul bes órkeniet elderi: Latyn Amerikasy (Braziliia), eýraziialyq (Resei) jáne órkeniet memleketteri - Qytai, Úndistan jáne Ońtústik Afrika elderin qamtityn memleketterdiń alǵashqy órkenietaralyq birlestigi.
Spikerdiń pikirinshe, BRIKS qazirgi ýaqytta kóptegen memleketter múshe bolǵysy keletin tanymal halyqaralyq uiymnyń biri. Ol memleketterdiń ishki isterine aralaspaidy, biraq olardyń damýyn demokratiialyq jáne erekshe teń negizde qoldaidy. Orta Aziia musylman-túrki órkenietinde Qazaqstan kóshbasshy bolyp tabylady. BRIKS bolashaqta kópbaǵytty álemdik tártiptiń negizderin qalyptastyrady.
- Meniń oiymsha, Qazaqstan Eýraziialyq órkeniette keleshekte Ortalyq Aziia, túrki órkenietiniń kóshbasshysy retinde kirýge laiyqty kandidat. Qazaqstan óziniń barlyq kórsetkishteri boiynsha bolashaq kóppoliarly álemdik qurylymnyń bastaýyn kóteretin perspektivaly jáne keleshegi mol uiymnyń quramynda bolýǵa laiyqty memleket dep sanaimyn, - dep atap ótti lektor.
Kezdesý sońynda qatysýshylar ózderin qyzyqtyrǵan saýaldaryn qoiyp, ózara pikir almasty.
Ál-Farabi atyndaǵy QazUÝ-dyń Baspasóz qyzmeti
