Álemde tehnologıa kóz ilespes jyldamdyqpen kún saıyn jańaryp, damý ústinde. Bolashaqta eldiń baılyǵy, damý kórsetkishi jer asty baılyqtarynyń kólemine qaraı emes,  zamanaýı tehnologıany qanshalyqty  ıgergendigine, onymen jumys isteý úrdisiniń qalyptasýyna baılanysty bolmaq. Bul oraıda, Elbasy Nursultan Nazarbaev «Qazaq­stan­nyń Úshinshi jańǵyrýy: jahan­dyq básekege qabilettilik» atty Joldaýynda «Sıfrlyq Qazaqstan» baǵdarlamasyn júze­ge asyrýda 4 baǵytty kórsetip berdi. Birinshi baǵyt – aýyl-aımaqty keń jolaqty ınternetpen qam­­ta­­masyz etip, Qazaq­stan­nyń tranzıttik áleýe­­tin arttyrý. Ekinshi baǵyt – kólik jáne logıs­tıka, den­­­saý­lyq saqtaý, bilim berý, aýyl sharýa­shy­­ly­­ǵy jáne elektrondy saýda salalaryna sıfrly tehnologıany engizý. Úshinshisi –  memlekettik organdar jumysynyń  sapasyn arttyrý  jáne tór­tin­shi baǵyt – IT – mamandardy daıarlaý. Osy tórt baǵyttyń ishinde memlekettik organdar jumysynda sıfrlyq tehnologıany júzege asyrý qazirgi tańda qarqyndy damýda.

Qazaqstan Respýblıkasynyń 2025 jylǵa deıingi Strategıalyq damý josparynda quqyq qorǵaý organdary men sottardy sıfrlandyrý kózdelgen. Qylmystyq, azamattyq ister jáne ákimshilik quqyq buzýshylyq týraly ister kezeń-kezeńimen elektrondyq formatqa kóshiriledi.



Azamattardyń quqyqtaryn qorǵaý jáne jyldam ádil sot tóreligine qol jetkizýdi qamtamasyz etý maqsatynda «Sandyq Qazaqstan» baǵdarlamasy aıasynda qylmystyq sot isin kezeń-kezeńmen elektrondyq formatqa kóshirý júrgizilýde.

Abaı atyndaǵy Qazaq ulttyq pedagogıkalyq ýnıversıtetiniń «Sorbonna-Qazaqstan» ınstıtýtynda ótken İV Qazaqstan-Fransýz forýmynyń kún tártibine «Sıfrlandyrý dáýirindegi quqyq» máselesiniń qoıylýy beker emes. Qazirgi tańda Fransıada jáne Qazaqstanda sıfrlyq damý bizdiń qoǵamymyzdyń  uıymdastyrýshylyq jáne ekonomıkalyq modelderiniń ózgerýine yqpal etýde. Esepteý qýaty únemi ósip kele jatqan kompúterlerdiń kómegimen, kúrdeli algorıtmdermen óńdelgen derekterdiń úlken massıvterin paıdalaný keıde úshinshi ónerkásiptik revolúsıa retinde qabyldanady. Bul, sózsiz, quqyqtyq sanattardy qaıta qarastyrýǵa ákeledi,  sondaı-aq Fransıada jáne Qazaqstanda jeke, jarıa quqyqtyń barlyq salalaryna áser etedi.

Forýmǵa zań ǵylymdarynyń doktory, profesor N.Nazarbaev qorynyń atqarýshy dırektorynyń orynbasary Igor Rogov pen Qazaqstandaǵy Fransıa elshiligini attashesi Jıl Mamets moderatorlyq etti.



QR Konstıtýsıalyq Keńesiniń Tóraǵasy, zań ǵylymdarynyń doktory, profesor Qaırat Mámı Qazaqstandaǵy quqyq salasyn sıfrlandyrý baǵytynda atqarylyp jatqan ıgilikti ister týraly aıtty. Fransýz Respýblıkasynyń Qazaqstandaǵy Tótenshe jáne ókiletti elshisi Dıde Kaness, Fransıa Respýblıkasynyń Konstıtýsıalyq keńesiniń múshesi Kler Bazı-Malorı, Fransıadan tys jerde turatyn fransýz azamattarynyń  múddesin bildirýshi, senator Krıstof-Andre FRASA, (ENM) Ulttyq sýdıalar mektebi dırektorynyń orynbasary Elı RENAR, Sybaılas jemqorlyqqa qarsy Fransýz agenttiginiń jetekshisi Sharl DÚSHEN, Notarıýstardyń  Joǵary Keńesi Tóraǵasynyń orynbasary  Antýan DEJÝA Fransıadaǵy quqyq salasyn sıfrlandyrý jónindegi tájirıbelerimen bólisti. QR İshki ister mınıstri Erlan Turǵymbaev, QR Parlament Senaty Tóraǵasynyń orynbasary Nurlan Ábdirov jáne birqatar mınıstrlikterdiń basshylary elimizdegi sıfrlandyrýdyń barysy jáne ony damytý jóninde alda turǵan mindetter týraly óz oılaryn ortaǵa saldy.

Plenarlyq májilisten keıin «Sorbonna-Qazaqstan» ınstıtýtynyń túlekterine Qazaqstan men Fransıanyń dıplomdary tabys etildi. Forým óz jumysyn jeke-jeke seksıalar boıynsha jalǵastyrdy.

Myrzahan Ahmetov, Abaı atyndaǵy QazUPÝ-diń Qoǵammen baılanys bólimi