Konferensıaǵa Qazaqstannyń jáne alys-jaqyn shet elderdiń belgili qoǵam jáne memleket qaıratkerleri, belgili ǵalymdar, kórnekti jazýshylar, mádenıet jáne óner qaıratkerleri, AQSH, Túrkıa, Koreıa, Ózbekstan, Qyrǵyzstan, Ázerbaıjan, Reseı jáne taǵy basqa elderdiń jáne respýblıkanyń jetekshi oqý oryndary men ǵylymı-zertteý ortalyqtarynyń basshylary men ǵalymdary, ýnıversıtettiń profesor-oqytýshylar quramy men jas ǵalymdary qatysty.
Ýnıversıtet rektory Darhan Bilálov quttyqtaý sóz sóılep, konferensıada talqylanatyn máselelerdiń ózektiligin, sondaı-aq Qazaqstannyń táýelsizdik jyldaryndaǵy jetistikterin atap ótti.
Konferensıada elimizdiń osy jyldar ishindegi damý qorytyndylary jáne kelesi ózekti máseleler talqylandy: táýelsizdik jyldaryndaǵy til men ádebıetti zertteýdiń jańa baǵyttary; táýelsiz Qazaqstan jáne zamanaýı óner; túrki halyqtarynyń rýhanı murasy: keshe, búgin, erteń; táýelsiz Qazaqstan jáne shyǵys álemi; Qazaqstandaǵy jáne álemdegi orys fılologıasy: ıntegrasıa aspektileri; shettildik bilim berýdiń zamanaýı ádisnamalyq ustanymdary.
Belgili aqyn jáne qoǵam qaıratkeri Oljas Súleımenov Táýelsizdiktiń 30 jyldyǵy el úshin úlken tarıhı kezeń bolǵanyn, «Semeı-Nevada» antıadrolyq qozǵalysynyń arqasynda Semeı jerindegi ıadrolyq synaqtar toqtatylyp, polıgonnyń jabylýy táýelsizdik tarıhynyń jarqyn betteri bolyp tabylatynyn atap ótti. Alaıda polıgon jabylǵan 1989 jyldyń 17 qazany qazaq tarıhyna arnaıy data retinde ol áli enbegeni ókinishti ekenin aıtty.
Konferensıa barysynda qazaqtyń tuńǵysh ǵaryshkeri, Keńes Odaǵynyń Batyry, Halyq Qaharmany Toqtar Áýbákirov, QR Ulttyq ǵylym akademıasynyń prezıdenti Murat Jurynov, Qazaqstannyń Rýmynıadaǵy Tótenshe jáne Ókiletti Elshisi Nurbah Rústemov, M.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov Qazaqstan tarıhy, táýelsizdik jyldaryndaǵy halyqaralyq arenadaǵy jetistikteri, ulttyq ádebıettiń damý tendensıalary týraly áńgimeledi. Olar Qazaqstan táýelsizdiginiń 30 jyly eldiń rýhanı jáne jalpy damýynyń mańyzdy kezeńi bolǵanyn atap ótti.
Konferensıaǵa qatysýshylardyń pikirinshe, qazirgi zamanǵy ádebıet pen óner - táýelsiz eldiń rýhanı-mádenı qundylyqtarynyń negizi, onyń álemdik mádenıettegi orny, órkenıet damýyndaǵy kórkemdik sana-seziminiń kórsetkishi. Sondyqtan, Qazaqstannyń rýhanı damý salasyndaǵy jetistikterine, osy jetistikterge jetýdegi ózindik máselelerin sheshýge degen saraptama ózekti bolyp tabylady.
Kezdesýge qatysýshylar Qazaqstan Respýblıkasy táýelsizdiginiń mereıtoıyna arnalǵan osyndaı aýqymdy sharany ótkizgeni úshin ýnıversıtet basshylyǵyna alǵystaryn bildirdi.
