كونفەرەنسياعا قازاقستاننىڭ جانە الىس-جاقىن شەت ەلدەردىڭ بەلگىلى قوعام جانە مەملەكەت قايراتكەرلەرى، بەلگىلى عالىمدار، كورنەكتى جازۋشىلار، مادەنيەت جانە ونەر قايراتكەرلەرى، اقش، تۇركيا، كورەيا، وزبەكستان، قىرعىزستان، ازەربايجان، رەسەي جانە تاعى باسقا ەلدەردىڭ جانە رەسپۋبليكانىڭ جەتەكشى وقۋ ورىندارى مەن عىلىمي-زەرتتەۋ ورتالىقتارىنىڭ باسشىلارى مەن عالىمدارى، ۋنيۆەرسيتەتتىڭ پروفەسسور-وقىتۋشىلار قۇرامى مەن جاس عالىمدارى قاتىستى.
ۋنيۆەرسيتەت رەكتورى دارحان ءبىلالوۆ قۇتتىقتاۋ ءسوز سويلەپ، كونفەرەنسيادا تالقىلاناتىن ماسەلەلەردىڭ وزەكتىلىگىن، سونداي-اق قازاقستاننىڭ تاۋەلسىزدىك جىلدارىنداعى جەتىستىكتەرىن اتاپ ءوتتى.
كونفەرەنسيادا ەلىمىزدىڭ وسى جىلدار ىشىندەگى دامۋ قورىتىندىلارى جانە كەلەسى وزەكتى ماسەلەلەر تالقىلاندى: تاۋەلسىزدىك جىلدارىنداعى ءتىل مەن ادەبيەتتى زەرتتەۋدىڭ جاڭا باعىتتارى؛ تاۋەلسىز قازاقستان جانە زاماناۋي ونەر؛ تۇركى حالىقتارىنىڭ رۋحاني مۇراسى: كەشە، بۇگىن، ەرتەڭ؛ تاۋەلسىز قازاقستان جانە شىعىس الەمى؛ قازاقستانداعى جانە الەمدەگى ورىس فيلولوگياسى: ينتەگراسيا اسپەكتىلەرى؛ شەتتىلدىك ءبىلىم بەرۋدىڭ زاماناۋي ءادىسنامالىق ۇستانىمدارى.
بەلگىلى اقىن جانە قوعام قايراتكەرى ولجاس سۇلەيمەنوۆ تاۋەلسىزدىكتىڭ 30 جىلدىعى ەل ءۇشىن ۇلكەن تاريحي كەزەڭ بولعانىن، «سەمەي-نيەۆادا» انتيادرولىق قوزعالىسىنىڭ ارقاسىندا سەمەي جەرىندەگى يادرولىق سىناقتار توقتاتىلىپ، پوليگوننىڭ جابىلۋى تاۋەلسىزدىك تاريحىنىڭ جارقىن بەتتەرى بولىپ تابىلاتىنىن اتاپ ءوتتى. الايدا پوليگون جابىلعان 1989 جىلدىڭ 17 قازانى قازاق تاريحىنا ارنايى داتا رەتىندە ول ءالى ەنبەگەنى وكىنىشتى ەكەنىن ايتتى.
كونفەرەنسيا بارىسىندا قازاقتىڭ تۇڭعىش عارىشكەرى، كەڭەس وداعىنىڭ باتىرى، حالىق قاھارمانى توقتار اۋباكىروۆ، ق ر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ، قازاقستاننىڭ رۋمىنياداعى توتەنشە جانە وكىلەتتى ەلشىسى نۇرباح رۇستەموۆ، م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ قازاقستان تاريحى، تاۋەلسىزدىك جىلدارىنداعى حالىقارالىق ارەناداعى جەتىستىكتەرى، ۇلتتىق ادەبيەتتىڭ دامۋ تەندەنسيالارى تۋرالى اڭگىمەلەدى. ولار قازاقستان تاۋەلسىزدىگىنىڭ 30 جىلى ەلدىڭ رۋحاني جانە جالپى دامۋىنىڭ ماڭىزدى كەزەڭى بولعانىن اتاپ ءوتتى.
كونفەرەنسياعا قاتىسۋشىلاردىڭ پىكىرىنشە، قازىرگى زامانعى ادەبيەت پەن ونەر - تاۋەلسىز ەلدىڭ رۋحاني-مادەني قۇندىلىقتارىنىڭ نەگىزى، ونىڭ الەمدىك مادەنيەتتەگى ورنى، وركەنيەت دامۋىنداعى كوركەمدىك سانا-سەزىمىنىڭ كورسەتكىشى. سوندىقتان، قازاقستاننىڭ رۋحاني دامۋ سالاسىنداعى جەتىستىكتەرىنە، وسى جەتىستىكتەرگە جەتۋدەگى وزىندىك ماسەلەلەرىن شەشۋگە دەگەن ساراپتاما وزەكتى بولىپ تابىلادى.
كەزدەسۋگە قاتىسۋشىلار قازاقستان رەسپۋبليكاسى تاۋەلسىزدىگىنىڭ مەرەيتويىنا ارنالعان وسىنداي اۋقىمدى شارانى وتكىزگەنى ءۇشىن ۋنيۆەرسيتەت باسشىلىعىنا العىستارىن ءبىلدىردى.
