Elimiz Táýelsizdik alǵan alǵashqy jyldardan bastap Elbasymyz N.Á.Nazarbaev Qazaqstan halqynyń densaýlyǵyn nyǵaıtý, sporttyń buqaralylyǵyn arttyrý, salaýatty ómir saltyn qalyptastyrý, osy arqyly deni saý ult qalyptastyrý máselesine úzbeı kóńil bólip keledi. Memleket basshysynyń qoldaýymen «Salamatty Qazaqstan» baǵdarlamasy qabyldanǵany da belgili. Elbasynyń bıylǵy «Bolashaqqa baǵdar: rýhanı jańǵyrý» baǵdarlamalyq eńbeginen týyndaıtyn jańa adamdy tárbıeleýde de deni saý ult bolashaǵyna qamqorlyq aıqyn sezilip turady.
Osyǵan oraı Abaı atyndaǵy Qazaq ulttyq pedagogıkalyq ýnıversıtetinde de deni saý urpaq qalyptastyrýǵa erekshe kóńil bólinip keledi. Oqý ornynda jaqynda ǵana ótken «Densaýlyq kúni» spartakıadasy osy sózimizdiń dáleli. Bul kúni ár alýan jalaýlarmen, jas urpaqty sportty serik etýge shaqyrǵan ulaǵatty sózder jazylǵan kórnekti banerlermen bezendirilgen «Spartak» sport keshenine jınalǵan stýdentter men oqytýshylarda, jalpy kórermende esep joq. Áskerı orkestr saltanatty marshty dabyldata shyrqaýda. Spartakıada jalaýy kóterilgen soń ýnıversıtet rektory, profesor Takır Ospanuly Balyqbaev jınalǵandardy «Densaýlyq kúni» merekesimen quttyqtap, is-sharany ashyq dep jarıalady.
–Densaýlyǵy myqty, shymyr da shynyqqan, jan-jaqty damyǵan jas elimizdiń erteńgi tiregi bola alady, – dedi rektor Takır Ospanuly Balyqbaev. – Bizdiń ýnıversıtetimizde de dene tárbıesi men sportty damytýǵa erekshe kóńil bólinýde. Saýyqtyrý dene tárbıesi kafedrasynda búginde sporttyń ár túrinen 21 seksıa jumys isteıdi jáne oǵan 500 stýdent turaqty qatysady. Bizdiń stýdentterimiz Baraq Meırambek, Áljappar Samat, Pırojenko Svetlana, Nurlan Dıdar, Esdáýlet Qarashash, Joldybaı Nurjan, Hahýlá Anastasıa, Áshkeev Madıar, Qalzıa Bórte – halyqaralyq jáne respýblıkalyq jarystardyń jeńimpazdary, qazaqsha kúresten, grek-rım kúresinen respýblıka kýboginiń ıegerleri, karate-do sportynan álemdik chempıonatqa, qysqy jáne jazǵy ýnıversıalarǵa qatysqandar. Biz bulardy maqtan etemiz. Aldaǵy ýaqytta sporttyń buqaralylyǵyn, jastardyń sportqa qyzǵýshylyǵyn arttyrý úshin qoldan kelgenniń bárin de jasaımyz.
«Densaýlyq kúni» spartakıadasynyń ashylý saltanatyna kelgen Almaty qalasy Medeý aýdanynyń ákimi Erjan Jylqybaev spartakıadaǵa qatysýshylardy quttyqtaı kelip bylaı dedi:
– Búgingi is-sharanyń Qazaqstandaǵy tuńǵysh joǵary oqý orny – Abaı atyndaǵy Qazaq ulttyq pedagogıkalyq ýnıversıtetiniń 90 jyldyǵyna arnalýynyń mánisi tereń. Osy bir ǵasyrǵa jýyq ýaqytta qazaq saharasy úshin júz myńdaǵan muǵalim kadrlaryn daıarlap, ilim-bilim shashqan oqý orny qazaq elıtasyn qalyptastyrýǵa da ólsheýsiz úles qosqanyn biz maqtan etemiz jáne ýnıversıtet mereıtoıyn joǵary deńgeıde ótkizýge Medeý aýdanynyń ákimshiligi de óz úlesin qosatyn bolady. Elbasynyń rýhanı jańǵyrý baǵdarlamasy aıasynda Deni saý, salamatty urpaq qalyptastyrýǵa baǵyttalǵan ıgilikti bastamalaryńyzǵa árdaıym qoldaý bildiremiz.
Budan keıin birkelki jarasymdy sporttyq forma kıgen stýdentter komandalary stadıon alańynda saltanatty sap túzep, mýzyka sazymen ár alýan sporttyq kórinister kórsetti.
Abaı atyndaǵy Qazaq ulttyq pedagogıkalyq ýnıversıtetiniń áskerı kafedrasy Almatydaǵy barlyq áskerı joǵary oqý oryndarymen turaqty baılanysta jumys isteıtindikten, bul merekege sol oqý oryndarynyń kýrsanttary da qatysyp, jaýyngerlik óner kórsetti. Mysaly, radıo-elektronıka baılanys ınstıtýtynyń kýrsanttary qarýdy sapqa daıyndaý jáne ustaý, qarýmen sapta júrý tásilderin kórsetse, desant áskerleri qarsylaspen jekpe-jek aıqasý, shabýldy toıtarý tásilderin kórsetip, kórermenderdi tánti etti.
Resmı bólim sporttyq jarystarǵa jalǵasyp, ınstıtýt janynan quralǵan komandalar fýtbol, voleıbol, qazaq kúresi, jeńil atletıka, ústel tenısi, shahmat,toǵyzqumalaq, qol kúresi oıyndar túrinen baq synasty. Ýnıversıtet boıynsha 35 komanda, 750 sportshy qatysty.
Komandalyq esep boıynsha profesor-oqytýshylar quramy men qyzmetkerler arasynda uıymdastyrylǵan sporttyq jarystar nátıjesinde 3 oryndy Matematıka, fızıka jáne ınformatıka ınstıtýty ıelense, Jaratylystaný jáne geografıa ınstıtýty 2 orynnyń jeńimpazy atandy, al júldeli 1 oryn Óner, mádenıet jáne sport ınstıtýtynyń eńshisine buıyrdy.
Komandalyq esep boıynsha stýdentter arasynda uıymdastyrylǵan sporttyq jarystar nátıjesinde Óner, mádenıet jáne sport ınstıtýty 3 oryn júldegeri, Matematıka, fızıka jáne ınformatıka ınstıtýty 2 oryn júldegeri, al Fılologıa jáne kóptildi bilim berý ınstıtýty 1 júldeli orynnyń jeńimpazy atandy. Barlyq jeńimpazdar ýnıversıtet rektorynyń gramotasy jáne arnaıy kýbogymen marapattaldy.
Spartakıada barysynda joǵary belsendilik tanytqan birqatar qyzmetkerler men profesor-oqytýshylar quramy rektordyń alǵys hatymen marapattaldy.
Abaı atyndaǵy QazUPÝ-dyń Qoǵammen baılanys jónindegi bólimi
