ەلىمىز تاۋەلسىزدىك العان العاشقى جىلداردان باستاپ ەلباسىمىز ن.ءا.نازاربايەۆ قازاقستان حالقىنىڭ دەنساۋلىعىن نىعايتۋ، سپورتتىڭ بۇقارالىلىعىن ارتتىرۋ، سالاۋاتتى ءومىر سالتىن قالىپتاستىرۋ، وسى ارقىلى دەنى ساۋ ۇلت قالىپتاستىرۋ ماسەلەسىنە ۇزبەي كوڭىل ءبولىپ كەلەدى. مەملەكەت باسشىسىنىڭ قولداۋىمەن «سالاماتتى قازاقستان» باعدارلاماسى قابىلدانعانى دا بەلگىلى. ەلباسىنىڭ بيىلعى «بولاشاققا باعدار: رۋحاني جاڭعىرۋ» باعدارلامالىق ەڭبەگىنەن تۋىندايتىن جاڭا ادامدى تاربيەلەۋدە دە دەنى ساۋ ۇلت بولاشاعىنا قامقورلىق ايقىن سەزىلىپ تۇرادى.
وسىعان وراي اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە دە دەنى ساۋ ۇرپاق قالىپتاستىرۋعا ەرەكشە كوڭىل ءبولىنىپ كەلەدى. وقۋ ورنىندا جاقىندا عانا وتكەن «دەنساۋلىق كۇنى» سپارتاكياداسى وسى ءسوزىمىزدىڭ دالەلى. بۇل كۇنى ءار الۋان جالاۋلارمەن، جاس ۇرپاقتى سپورتتى سەرىك ەتۋگە شاقىرعان ۇلاعاتتى سوزدەر جازىلعان كورنەكتى بانەرلەرمەن بەزەندىرىلگەن «سپارتاك» سپورت كەشەنىنە جينالعان ستۋدەنتتەر مەن وقىتۋشىلاردا، جالپى كورەرمەندە ەسەپ جوق. اسكەري وركەستر سالتاناتتى مارشتى دابىلداتا شىرقاۋدا. سپارتاكيادا جالاۋى كوتەرىلگەن سوڭ ۋنيۆەرسيتەت رەكتورى، پروفەسسور تاكير وسپان ۇلى بالىقبايەۆ جينالعانداردى «دەنساۋلىق كۇنى» مەرەكەسىمەن قۇتتىقتاپ، ءىس-شارانى اشىق دەپ جاريالادى.
–دەنساۋلىعى مىقتى، شىمىر دا شىنىققان، جان-جاقتى دامىعان جاس ەلىمىزدىڭ ەرتەڭگى تىرەگى بولا الادى، – دەدى رەكتور تاكير وسپان ۇلى بالىقبايەۆ. – ءبىزدىڭ ۋنيۆەرسيتەتىمىزدە دە دەنە تاربيەسى مەن سپورتتى دامىتۋعا ەرەكشە كوڭىل بولىنۋدە. ساۋىقتىرۋ دەنە تاربيەسى كافەدراسىندا بۇگىندە سپورتتىڭ ءار تۇرىنەن 21 سەكسيا جۇمىس ىستەيدى جانە وعان 500 ستۋدەنت تۇراقتى قاتىسادى. ءبىزدىڭ ستۋدەنتتەرىمىز باراق مەيرامبەك، ءالجاپپار سامات، پيروجەنكو سۆەتلانا، نۇرلان ديدار، ەسداۋلەت قاراشاش، جولدىباي نۇرجان، حاحۋليا اناستاسيا، اشكەيەۆ ماديار، قالزيا بورتە – حالىقارالىق جانە رەسپۋبليكالىق جارىستاردىڭ جەڭىمپازدارى، قازاقشا كۇرەستەن، گرەك-ريم كۇرەسىنەن رەسپۋبليكا كۋبوگىنىڭ يەگەرلەرى، كاراتە-دو سپورتىنان الەمدىك چەمپيوناتقا، قىسقى جانە جازعى ۋنيۆەرسيالارعا قاتىسقاندار. ءبىز بۇلاردى ماقتان ەتەمىز. الداعى ۋاقىتتا سپورتتىڭ بۇقارالىلىعىن، جاستاردىڭ سپورتقا قىزعۋشىلىعىن ارتتىرۋ ءۇشىن قولدان كەلگەننىڭ ءبارىن دە جاسايمىز.
«دەنساۋلىق كۇنى» سپارتاكياداسىنىڭ اشىلۋ سالتاناتىنا كەلگەن الماتى قالاسى مەدەۋ اۋدانىنىڭ اكىمى ەرجان جىلقىبايەۆ سپارتاكياداعا قاتىسۋشىلاردى قۇتتىقتاي كەلىپ بىلاي دەدى:
– بۇگىنگى ءىس-شارانىڭ قازاقستانداعى تۇڭعىش جوعارى وقۋ ورنى – اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ 90 جىلدىعىنا ارنالۋىنىڭ ءمانىسى تەرەڭ. وسى ءبىر عاسىرعا جۋىق ۋاقىتتا قازاق ساحاراسى ءۇشىن ءجۇز مىڭداعان ءمۇعالىم كادرلارىن دايارلاپ، ءىلىم-بىلىم شاشقان وقۋ ورنى قازاق ەليتاسىن قالىپتاستىرۋعا دا ولشەۋسىز ۇلەس قوسقانىن ءبىز ماقتان ەتەمىز جانە ۋنيۆەرسيتەت مەرەيتويىن جوعارى دەڭگەيدە وتكىزۋگە مەدەۋ اۋدانىنىڭ اكىمشىلىگى دە ءوز ۇلەسىن قوساتىن بولادى. ەلباسىنىڭ رۋحاني جاڭعىرۋ باعدارلاماسى اياسىندا دەنى ساۋ، سالاماتتى ۇرپاق قالىپتاستىرۋعا باعىتتالعان يگىلىكتى باستامالارىڭىزعا ءاردايىم قولداۋ بىلدىرەمىز.
بۇدان كەيىن بىركەلكى جاراسىمدى سپورتتىق فورما كيگەن ستۋدەنتتەر كوماندالارى ستاديون الاڭىندا سالتاناتتى ساپ تۇزەپ، مۋزىكا سازىمەن ءار الۋان سپورتتىق كورىنىستەر كورسەتتى.
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ اسكەري كافەدراسى الماتىداعى بارلىق اسكەري جوعارى وقۋ ورىندارىمەن تۇراقتى بايلانىستا جۇمىس ىستەيتىندىكتەن، بۇل مەرەكەگە سول وقۋ ورىندارىنىڭ كۋرسانتتارى دا قاتىسىپ، جاۋىنگەرلىك ونەر كورسەتتى. مىسالى، راديو-ەلەكترونيكا بايلانىس ينستيتۋتىنىڭ كۋرسانتتارى قارۋدى ساپقا دايىنداۋ جانە ۇستاۋ، قارۋمەن ساپتا ءجۇرۋ تاسىلدەرىن كورسەتسە، دەسانت اسكەرلەرى قارسىلاسپەن جەكپە-جەك ايقاسۋ، شابۋلدى تويتارۋ تاسىلدەرىن كورسەتىپ، كورەرمەندەردى ءتانتى ەتتى.
رەسمي ءبولىم سپورتتىق جارىستارعا جالعاسىپ، ينستيتۋت جانىنان قۇرالعان كوماندالار فۋتبول، ۆولەيبول، قازاق كۇرەسى، جەڭىل اتلەتيكا، ۇستەل تەننيسى، شاحمات،توعىزقۇمالاق، قول كۇرەسى ويىندار تۇرىنەن ب ا ق سىناستى. ۋنيۆەرسيتەت بويىنشا 35 كوماندا، 750 سپورتشى قاتىستى.
كوماندالىق ەسەپ بويىنشا پروفەسسور-وقىتۋشىلار قۇرامى مەن قىزمەتكەرلەر اراسىندا ۇيىمداستىرىلعان سپورتتىق جارىستار ناتيجەسىندە 3 ورىندى ماتەماتيكا، فيزيكا جانە ينفورماتيكا ينستيتۋتى يەلەنسە، جاراتىلىستانۋ جانە گەوگرافيا ينستيتۋتى 2 ورىننىڭ جەڭىمپازى اتاندى، ال جۇلدەلى 1 ورىن ونەر، مادەنيەت جانە سپورت ينستيتۋتىنىڭ ەڭشىسىنە بۇيىردى.
كوماندالىق ەسەپ بويىنشا ستۋدەنتتەر اراسىندا ۇيىمداستىرىلعان سپورتتىق جارىستار ناتيجەسىندە ونەر، مادەنيەت جانە سپورت ينستيتۋتى 3 ورىن جۇلدەگەرى، ماتەماتيكا، فيزيكا جانە ينفورماتيكا ينستيتۋتى 2 ورىن جۇلدەگەرى، ال فيلولوگيا جانە كوپتىلدى ءبىلىم بەرۋ ينستيتۋتى 1 جۇلدەلى ورىننىڭ جەڭىمپازى اتاندى. بارلىق جەڭىمپازدار ۋنيۆەرسيتەت رەكتورىنىڭ گراموتاسى جانە ارنايى كۋبوگىمەن ماراپاتتالدى.
سپارتاكيادا بارىسىندا جوعارى بەلسەندىلىك تانىتقان ءبىرقاتار قىزمەتكەرلەر مەن پروفەسسور-وقىتۋشىلار قۇرامى رەكتوردىڭ العىس حاتىمەن ماراپاتتالدى.
اباي اتىنداعى قازۇپۋ-دىڭ قوعاممەن بايلانىس جونىندەگى ءبولىمى
