5 sáýirde QMG Basqarma tóraǵasy Maǵzum Myrzaǵalıev, Qyzylorda oblysynyń ákimi Nurlybek Nálibaev, sondaı-aq Ekologıa jáne tabıǵı resýrstar vıse-mınıstri Nurken Shárbıev Aral teńiziniń qurǵaǵan tabanyna sekseýil kóshetterin otyrǵyzý sharasyna qatysty.
Bul joba Memleket basshysy Qasym-Jomart Toqaevtyń eldi kógaldandyrý jónindegi ekologıalyq bastamasyn qoldaý maqsatynda iske asyrylyp otyr.
«Qazaq halqy sekseýil aǵashyn ejelden qasıet tutqan. Tabıǵattyń qorǵany, tirshiliktiń jańarýyn bildiretin bul ósimdiktiń baǵasy bólek bolǵan. Biz kásiporyndarymyz ornalasqan óńirlerdi kógaldandyrý jumysyna belsendi atsalysyp kelemiz.
QMG qurǵaǵan Aral túbinde 15 myń gektar alqapqa 4 mıllıonnan astam sekseýil kóshetin otyrǵyzý boıynsha mindetteme aldy. Osylaısha, kompanıanyń jasyl ekonomıkanyń damýyna jáne tabıǵatty bolashaq urpaq úshin qorǵap qalýǵa qosqan úlesin arttyramyz. Sondaı-aq bul — turaqty damý qaǵıdattaryn berik ustanatynymyzdyń is júzindegi kórinisi», — dedi Maǵzum Myrzaǵalıev.
Egilgen sekseýil kóshetteri Aral teńiziniń qurǵaý saldarynan jyl saıyn paıda bolatyn shań men tuzdan qorǵaýǵa kómektesedi. Sonymen birge bul óńirdegi janýarlar men ósimdikter álemin saqtap qalyp, shóleıttený prosesin baıaýlatýǵa múmkindik beredi.
Osylaısha, QazMunaıGaz elimizdiń ekonomıkalyq damýyna úles qosyp qana qoımaı, áleýmettik salaǵa jáne ekologıalyq jobalarǵa kórsetken qoldaýyn arttyryp otyr.
Sekseýildiń basqa ósimdikterden ereksheligin aıtsaq, bir túp sekseýil tórt myń tonna qum kóshinen saqtaı alady. Jeti jyldan keıin 15 myń gektar jerge egilgen sekseýil aǵashtary 15 myń tonna tuz, shań men qumnyń aýaǵa taraýyn toqtatyp, ustap qalatyn bolady.
Sekseýil aǵashtarynyń aımaqtaǵy mal sharýashylyǵyna da paıdasy bar. Sebebi sekseýil óskinderi mal-janýarǵa azyq bola alady.
Jobany QR Ekologıa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetine qarasty «Respýblıkalyq orman seleksıalyq tuqym ósirý ortalyǵy» iske asyratyn bolady.
Jalpy, «QazMunaıGaz» kompanıalar toby elimizdi kógaldandyrý isine óz úlesin qosyp, óńirlerde aǵash egýdi dástúrge aınaldyrǵan. Mysaly, 2023 jyly QazMunaıGaz óz kúshimen shamamen 40 myń jasyl jelek otyrǵyzdy.
