"QazMunaiGaz" UK AQ Jańaózen qalasyndaǵy «Ózenmunaigaz» AQ-daǵy jaǵdaiǵa qatysty málimdeme jasady, dep habarlaidy Dalanews.kz.
Ulttyq kompaniianyń baspasóz qyzmetiniń dereginshe, biylǵy 12 qarashada «Ózenmunaigaz» AQ-ǵa qarasty Burǵylaý jumystary basqarmasy (BJB) qyzmetkerleriniń kásipodaǵy ruqsatsyz aktsiia uiymdastyryp, birqatar talap qoiǵan. Ózenmunaigaz basshylyǵy BJB jumysshylarymen turaqty túrde kelissóz júrgizip keledi.
Sonymen qatar, 2024 jyly 3 jeltoqsanda «QazMunaiGaz» UK AQ Basqarma tóraǵasynyń orynbasary Bekzat Abaiyldanov Burǵylaý jumystary basqarmasy qyzmetkerlerimen kezdesip, olardy jumysqa shyǵýǵa shaqyrdy. Kelissóz qorytyndysy boiynsha hattama jasaldy:
- Ruqsatsyz aktsiiaǵa qatysqan BJB qyzmetkerleri tolyq quramda jumysqa shyǵýy kerek.
2. Hattamanyń birinshi tarmaǵy oryndalǵan jaǵdaida, jumysshylarǵa QMG jáne ÓMG tarapynan tártiptik jaza qoldanylmaidy;
3. Barlyq qoiylǵan talap QR zańnamasyna sáikes bitimgerlik komissiia otyrysynda qaralsyn.
Hattama ruqsatsyz aktsiiaǵa shyqqan jumysshylardyń nazaryna jetkizildi. Alaida, ÓMG BJB kásipodaq tóraǵasy oǵan qol qoiýdan bas tartty.
QR zańnamasyna sáikes eńbek qatynastary úshinshi tulǵalardyń aralasýynsyz tikelei jumys berýshi men jumysshylar arasynda rettelýi tiis ekenin habarlaimyz.
Sonymen qatar «QazMunaiGaz» komapniiasynyń Telegram arnasyna jariialanǵan habarlamada ÓMG zeinetkerleriniń (burynǵy qyzmetkerleriniń) balalary kompaniianyń shtatyna tikelei alynsa, 2020 jyly bekitilgen jumysqa ornalasý algoritmin buzalatynyn alǵa tartqan edi. Munda «Algoritmge sáikes ÓMG zeinetkerleriniń balalary men jumyssyz azamattar 50/50 proportsiiasy boiynsha teń dárejede jumysqa qabyldanady. Bul talapty oryndaý múmkin emes, óitkeni jumysqa ornalasý kezegin kútip otyrǵan Jańaózen qalasynyń basqa jumyssyz turǵyndarynyń quqyǵyn buzady» delingen.
Budan basqa habarlamada zeinetke erte shyqqanda tólem mólsherin 300 AEK ulǵaitý máselesine qatysty da jaýap qaitarylypty. «ÓMG-de jumysshylarǵa merziminen buryn zeinetke shyǵýǵa múmkindik beretin arnaiy baǵdarlama bar. Zeinet jasyna jaqyndaǵan qyzmetkerlerge arnalǵan baǵdarlamanyń talaptary ailyq eseptik kórsetkishke (AEK), munaishynyń ótili men jasyna bailanysty, sonymen qatar otbasy múshesin jumysqa ornalastyrý múmkindigi de qarastyrylǵan.
Tólem mólsheri jumysshynyń ótiline jáne zeinetke shyǵýǵa deiin qalǵan ailar sanyna bailanysty AEK negizinde esepteledi. Bul rette, tólemaqynyń eń joǵary mólsheri 125 AEK – 40 jyldan astam eńbek ótili bar qyzmetkerler úshin belgilengen.
Mysaly, ÓMG-de 40 jyldan astam jumys istegen qyzmetker búginde 60 jasqa kelip erte zeinetke shyqsa, 16,6 mln teńge alady» delenigen habarlamada.
Jumysshylar kásipodaǵy qoiyp otyrǵan talap – AEK mólsherin 125-ten 300 AEK-ke deiin ulǵaitý, bul tólem mólsherin eki eseden astamǵa arttyratyny belgili. Alaida kompaniia munaishylarǵa qazirdiń ózinde jaqsy jaǵdai jasalǵanyn, bir qyzmetkerge kórsetiletin áleýmettik qoldaý mólsheri – eń joǵary kórsetkishke sáikes keletinin alǵa tartypty.
Budan basqa uńǵymalarǵa qyzmet kórsetý basqarmasy janynan 1000 oryndyq arnaiy tehnikany jóndeitin baza salý isine qatysty da «QazMunaiGaz» AQ óz ustanymyn ashyq bildiripti.
«ÓMG jyl saiyn arnaiy tehnikany jańartyp otyrady. Qazirgi ýaqytta burǵylaý jumystary basqarmasynyń tehnikasyn qosa alǵanda, avtoparktiń 65% jańartyldy. 2022-2024 jyldar aralyǵynda buǵan 22 mlrd teńgeden asa qarjy jumsaldy, al 2029 jylǵa deiin taǵy 53 mlrd teńgeden astam bólinetin bolady. Tehnikany jańartýdyń nátijesinde jóndeý jumystary azaidy, sondyqtan jumysshylar talap etkendei jańa jóndeý bazasyn salý tiimsiz bolyp otyr. Arnaiy tehnikany jańartý jumystary QMG tobynyń barlyq kompaniiasynda júrgizilip jatyr» dep «QazMunaiGaz» buǵan da naqty jaýap qaitarypty.
Sondai-aq, munaishylar kótergen ujymdyq sharttyń 2013 jylǵy redaktsiiasyn qaitarý jáne derbes eńbekaqy tóleý júiesine ótý máselesine qatysty tómendegidei jaýap qaitarylǵan.
«Kásipodaq 2013 jyly qoldanysta bolǵan ÓMG ujymdyq shartynyń 5.19 tarmaǵyn qaitarýdy usynady. Bul tarmaq boiynsha jeke tabys salyǵy men mindetti zeinetaqy jarnalary jumys berýshiniń esebinen tólenip kelgen. Al 2017 jyldan beri qyzmetkerlerge jalaqy salyq ustalǵannan keiin beriledi, bul QR zańnamasyna tolyǵymen sáikes keledi.
2024 jyldyń shildesinde Ózenmunaigaz kompaniiasynda eńbekaqy tóleýdiń jańa júiesine ótý jumystary bastaldy. Kásipodaqtar men QR Eńbek ministrliginiń qatysýymen kúrdeli jumysty ádil baǵalaýǵa negizdelgen erejeler ázirlendi. Qazirgi ýaqytta ÓMG ishinde ózara kelisimder júrip jatyr» delingen habarlamada.
