«QazMunaiGaz» UK AQ-y óziniń Telegarm arnasynda «Ózenmunaigaz» AQ-daǵy jaǵdaiǵa qatysty málimdeme jasady, – dep habarlaidy Dalanews.kz.
2024 jyly 12 qarashada «Ózenmunaigaz» AQ-ǵa qarasty (budan ári – ÓMG) Burǵylaý jumystary basqarmasy (BJB) qyzmetkerleriniń kásipodaǵy ruqsatsyz aktsiia uiymdastyryp, birqatar talap qoiǵany belgili. Ózenmunaigaz basshylyǵy BJB jumysshylarymen turaqty túrde kelissóz júrgizip keledi.
Sonymen qatar, 2024 jyly 3 jeltoqsanda «QazMunaiGaz» UK AQ Basqarma tóraǵasynyń orynbasary Bekzat Abaiyldanov Burǵylaý jumystary basqarmasy qyzmetkerlerimen kezdesip, olardy jumysqa shyǵýǵa shaqyrdy. Kelissóz qorytyndysy boiynsha hattama jasaldy:
- Ruqsatsyz aktsiiaǵa qatysqan BJB qyzmetkerleri tolyq quramda jumysqa shyǵýy kerek.
- Hattamanyń birinshi tarmaǵy oryndalǵan jaǵdaida, jumysshylarǵa QMG jáne ÓMG tarapynan tártiptik jaza qoldanylmaidy;
- Barlyq qoiylǵan talap QR zańnamasyna sáikes bitimgerlik komissiia otyrysynda qaralsyn.
Hattama ruqsatsyz aktsiiaǵa shyqqan jumysshylardyń nazaryna jetkizildi. Alaida, ÓMG BJB kásipodaq tóraǵasy oǵan qol qoiýdan bas tartty.
QR zańnamasyna sáikes eńbek qatynastary úshinshi tulǵalardyń aralasýynsyz tikelei jumys berýshi men jumysshylar arasynda rettelýi tiis ekenin habarlaimyz.
«QazMunaiGaz» UK AQ osyǵan deiin ár talap boiynsha tolyq túsinikteme bergen bolatyn. Mysaly, ÓMG zeinetkerleriniń (burynǵy qyzmetkerleriniń) balalary kompaniianyń shtatyna tikelei alynsa, 2020 jyly bekitilgen jumysqa ornalasý algoritmin buzady. Algoritmge sáikes ÓMG zeinetkerleriniń balalary men jumyssyz azamattar teń dárejede jumysqa qabyldanady. Bul talapty oryndaý múmkin emes, óitkeni jumysqa ornalasý kezegin kútip otyrǵan Jańaózen qalasynyń basqa jumyssyz turǵyndarynyń quqyǵyn buzady.
Sondai-aq, QazMunaiGaz kompaniiasy ÓMG qyzmetkerlerine kórsetiletin áleýmettik kómek týraly tolyq aqparat berdi. ÓMG men úsh kásipodaq arasyndaǵy ujymdyq shart 2024 jyly 25 sáýirde jasaldy. Ujymdyq shartqa sáikes ÓMG qyzmetkerlerin áleýmettik qoldaýǵa 44 mlrd teńge qarastyrylǵan, sonyń 5 mlrd teńgesi (11%) kompaniianyń Burǵylaý jumystary basqarmasyna arnalǵan.
ÓMG-de jaqsy eńbek jaǵdaiy jasalǵan dep esepteimiz, árbir qyzmetkerdi áleýmettik qoldaýǵa jyl saiyn 3,8 mln teńge bólinedi.
BJB jumysshylaryn jumysqa shyǵýǵa jáne kelissózdi bitimgerlik komissiia aiasynda júrgizýge shaqyramyz.
