Jol kartasy aiasynda jergilikti atqarýshy oryndar 6 506 jobany iske asyrýdy usynyp otyr. Onyń ishinde 2 410 joba respýblikalyq biýdjet esebinen qolǵa alynýda. Jumyspen qamtýdyń jol kartasy infraqurylymdyq jobalaryn iske asyrý 4 negizgi baǵyt boiynsha ótedi.
Birinshisi, áleýmettik-mádeni nysandardy kúrdeli jáne aǵymdaǵy jóndeý, qaita qurylymdaý jáne salý (2 703 joba), ekinshi turǵyn úi-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý, qaita qurylymdaý (1 039 joba), úshinshi injenerlik-kólik infraqurylymyn kúrdeli, ortasha jáne aǵymdaǵy jóndeý, qaita qurylymdaý jáne salý (1 799 joba) jáne tórtinshi baǵytta eldimekenderdi abattandyrý (965 joba).
Jol kartasynyń infraqurylymdyq jobalaryn iske asyrý kezinde otandyq óndirýshilerdiń keminde 90% taýarlary men qyzmetterin qoldanýdy qamtamasyz etý erekshe shart bolyp tabylady. Jumysshylardyń kem degende jartysy halyqty jumyspen qamtý ortalyqtary arqyly alynyp, basymdyq jumyssyz júrgen jastarǵa beriletin bolady. Merdigerler sanitarlyq-epidemiologiialyq sharalardy qoldana otyryp, qaýipsiz eńbek jaǵdaiyn qamtamasyz etýge tiis.
13 mamyrdaǵy jaǵdai boiynsha birqatar óńirde 3 096 joba turǵysynda jumys bastalyp, 26,3 myń jumys orny qurylyp, 11,8 myńy adamdy jumyspen qamtý ortalyqtary tartqan.
Jalpy Jumyspen qamtýdyń jol kartasy aiasynda barlyǵy 255 myń jumys ornyn ashý josparlanýda. Jańa joba bolashaqta 100 myńnan astam turaqty jumys ornyn ashýǵa múmkindik beredi.
Búginde 80 jańa bilim berý nysanynyń qurylysy apatty jáne úsh aýysymdy mektepterdiń máselelerin sheshýge, aýyldyq jerlerde bilim berý oryndaryna qoljetimdilikti arttyrýǵa, sondai-aq 7 myńǵa jýyq muǵalimdi turaqty jumysqa ornalastyrýǵa múmkindik beredi. 24 densaýlyq saqtaý nysanynyń qurylysy alǵashqy meditsinalyq-sanitarlyq kómekke qoljetimdilikti arttyrady, sondai-aq shamamen 1 myń meditsina qyzmetkerin jumysqa ornalastyrýǵa múmkindik beredi. 36 mádeniet jáne sport nysanynyń qurylysy buqaralyq sportty damytýǵa oń áser etip, jastar úshin bos ýaqyt máselesin sheshýge jáne 1,6 myń adamdy turaqty jumyspen qamtamasyz etýge múmkindik beredi.
Óz kezeginde, sý sharýashylyǵynyń 12 jańa nysanyn salý jáne qoldanystaǵylaryn jańǵyrtý halyq úshin aýyz sýdyń qoljetimdiligin arttyrady, sýarmaly jerlerdiń kólemin keńeitýge, paidalanylmaityn jerlerdi ainalymǵa tartýǵa, aralas salalarda 77 myń adamdy jumyspen qamtýdy qamtamasyz etýge múmkindik beredi. Turǵyn úi-kommýnaldyq sharýashylyqtyń 247 jańa nysanyn salý jáne qoldanystaǵylaryn jańǵyrtý turǵyn úi qurylysy úshin jaǵdai jasaidy, aýyl turǵyndary úshin kommýnaldyq qyzmetterdiń qoljetimdiligin qamtamasyz etedi, kommýnaldyq jeliniń tozýyn tómendetedi. Eldimekenderdi abattandyrý olardyń syrtqy kelbetin jaqsartyp qana qoimai, azamattardyń qaýipsiz jáne jaily demalysy úshin jaǵdai jasaidy.
